Luka 24

Yecu ocer

(Mat 28:1-10; Mar 16:1-8; Jon 20:1-10)

1Inino mukwongo me cabit, mon ma gupuk kwarpiny, gubino iwi lyel, kun gikelo angwecegi ma guyubu. 2Gunongo ni kingilo got woko ki i dog lyel, 3ento ka gudonyo ilyel, ci pe gunongo kom Rwot Yecu. 4Ka onongo pud gitye kauru lok man, ci nen, co aryo gucung ingetgi ma guruku jor maryeny lidangdang. 5Komgi oryange, ci guryebe piny, co nu gupenyogi ni, “Pingo wuyenyo dano makwo ikin jo ma oto? 6[En pe tye kany, ento ocer woko.] Wupo lok mayam en owaco botwu ikare ma pud en tye i Galilaya,1 7ni, Wod pa dano myero kimiye i cing lubalo, wek kigure ikom yatariya, ci bicer woko inino me adeke.” 8Ci mon gupo loke, 9ka gua ki iwi lyel gudok, ci gutito lok man ducu bot lupwonye apar wiye acel ca, ki bot jo mukene ducu. 10Ci Maliam Lamagdala, gin ki Joana, ka Maliam min Yakobo, ki mon mukene ma onongo gitye kwedgi gutito lok man bot lukwena. 11Ento lokgi obedo calo lok mingo ki bot lukwena, ci pe guye lokgi. [12Ento Petero oa, oringo ocito iwi lyel; ka ocung oneno lyel, oneno bongi matar maryeny lidangdang matye ken gi pat; odok paco kun uru gin ma otime.]

Wot me cito Emau

(Mar 16:12-13)

13Ininonu kikome lupwonyene aryo pa Yecu ki ikin gi onongo nene gicito i paco ma kilwongo ni Emau, ma bore mito romo mairo abiro me o i Jerucalem. 14Gin onongo gitye kaboko lok keken gi ikom gin ma otime. 15Ka onongo giboko lok man kun bene gilaro loke kacel, ci Yecu kikome onyiko cok, owoto kwedgi. 16Ento wanggi oume woko, oweko pe gumedo kingeyo ni meno Yecu. 17Ci Yecu owaco botgi ni, “Wularo lok ango kekenwu kun wutye ka woti?” Gutugi cung woko mot ma wanggi nen ki can. 18Ci ngat acel ikin gi ma nyinge Kelopa, odok iye bote ni, “In i welo keni i Jerucalem ce, ma pe ingeyo lok ma otime kunu ikare man?” 19Ci Yecu openyogi ni, “Gin ango?” Gin gudoke iye ni, “Lok ikom Yecu Lanajaret, mayam obedo lanebi matek i loke ki itice inyim Lubanga, ki inyim dano ducu, 20ki kit ma ajwaki madito pa Lubanga ki lulocwa gudobe ci gingolkop ikome me neke, ci gugure ikom yatariya. 21Ento yam wageno ni en aye ngat ma bikoko Icrael. Eyo, medo ikom meno ducu, tin dong nino me adek nia ma lok man otime. 22Mon mogo ikinwa bene gumiyowa ur. Gupuk iwi lyel odiko con, 23ci pe gunongo kome i lyel; ci gudwogo cen kun giwaco ni gineno lumalaika ma onyute botgi, kun giwaco ni en kwo gire. 24Ci jo mukene ma onongo gitye kacel kwedwa gucito iwi lyel, gunongo tye kit macalo mon ca guwaco; ento pe guneno kome.” 25Ci Yecu owaco botgi ni, “Wun luming, dok bene cwinywu nyap pien wugale me ye lok ducu ma lunebi yam guloko! 26Wutamoni pe onongo myero ni Kricito ma Lubanga oyero onen can magi ducu, wek odony ideyone?” 27Ci Yecu otito ki gin lok ducu ma mako kome matye i ginacoya ducu, cake wa ikom Moses, nio kwede wa ikom coc pa lunebi ducu.

28Ka dong gunyiko cok ki paco ma onongo gicito iyeni, Yecu otime calo mito kato akata ki wote, 29ento gudiye matek kun giwaco ni, “Bed botwa, pien piny dong cok yutu, dok ceng bene dong cok poto woko.” Piman en odonyo i ot ci obedo kwedgi. 30Ka tye i dog cam kacel kwedgi, ci omako mugati, opwoyo Lubanga, ci obaro iye, omiyo botgi. 31Wanggi oyabe, gungeye; ci cutcut en orwenyo woko ki iwang gi. 32Ci gucako penye keken gi ni, “Pe cwinywa nakanen obedo ka puke ikare ma en tye kalok kwedwa i wangayo, kun gonyo te ginacoya botwa?” 33Ci gua woko icawanu kikome, gucako dok i Jerucalem; ci gunongo lupwonyene apar wiye acel ca gucoke kacel, ki jo ma onongo tye botgi. 34Ci lupwonyene aryonu guwaco botgi ni, “Rwot ocer ada, dok bene onyute bot Cimon!” 35Lacen jo aryo ni gutito lok ma otime botgi i wangayo, ki kit ma gungeye kwede ikare ma obaro i mugati.

Yecu onyute bot Lupwonyene

(Mat 28:16-20; Mar 14:14-18; Jon 20:19-23; Tic 1:6-8)

36Ka pud gitye kaloko lok man, [ Yecu kikome ocung ikin gi, ci owaco botgi ni, “Kuc obed kwedwu!”] 37Ento komgi oto woko lirut, gulworo pien gutamo ni gineno tipu. 38Ci Yecu openyogi ni, “Pingo cwinywu poto? Pingo wupenye kekenwu icwinywu? 39Wunen cinga, ki tyena, man an kikoma; wubonga, wunena; pien tipu pe tye kikom ki cogo kit macalo wuneno an atye kwede.” 40Ka dong Yecu owaco lok man, ci onyutu cinge ki tyene botgi. 41Pe onongo gin gitwero ye, gupong ki yomcwiny, kun giuru; ci Yecu openyogi ni, “Wutye ki gin mo kany me acama?” 42Ci gumiye but rec ma gubulu, 43ka ogamo, ci ocamo inyimgi.

44Lacen owaco botgi ni, “Man aye loka mayam aloko botwu ikare ma onongo pud atye kwedwu, ni, lok ducu ma kicoyo ikoma i cik pa Moses, ki i coc pa lunebi, ki i jabuli myero ocobe kakare.” 45Ci oyabo tamgi wek guniang ginacoya, 46ci lacen owaco botgi ni, “Yam kicoyo kit man ni, Kricito ma Lubanga oyero myero onen can, ci inino me adeke myero ocer ki ikin jo ma oto, 47dok myero kitit lok ikom ngut makelo weko bal inyinge bot rok ducu kun kicako ki i Jerucalem. 48Wun wucaden me lok man. 492 Nen, abicwalo botwu gin ma Wora ociko; ento myero wubed i Jerucalem, nio ka wubipong ki tek ma a ki i polo.”

Kitingo Yecu malo i polo

(Mar 16:19-20; Tic 1:9-11)

503

Lacen Yecu otero lukwenane nio wa Betania, ka otingo cinge malo ci omiyo gum ikomgi. 51Ka en pud tye kamiyo gum ikomgi, ci opoke woko ki ikin gi, [ kitinge, kitere i polo.] 52Guwore, lacen gudwogo i Jerucalem ki yomcwiny madit, 53gurii i Ot pa Lubanga jwijwi, kun gipwoyo Lubanga.