Luka 8

Mon mogo guwoto kacel ki Yecu

1Kare okato manok, ci Yecu owoto ikin taun madongo ki gangi kun tito dok nyutu lok me Kwena Maber ma mako ker pa Lubanga. Lupwonyene apar wiye aryoni onongo tye kacel kwede, 21 kacel ki mon mogo mayam en ocangogi ikom cen ki ikom two. Maliam ma kilwongo ni Maliam me Magdala, ma cen abiro yam oa woko ki ikome, 3Joana dako pa Kuja, lagwok lim pa Kerode, Cucana, ki mon mukene mapol, mayam gikonyo Yecu ki lukwena ki limgi.

Carolok ikom laco kodi

(Mat 13:1-9; Mar 4:1-9)

4Ka lwak mapol gucoke kacel, kun dano gubino bote ma gua ki i taun madit mapol, ci Yecu oloko i carolok ni, 5“Laco kodi ocito ka coyo kodine. Ikare ma en coyo kodi, ci kodi mogo okir i yoo, dano gunyono, winyo me polo bene gubino gucamo woko. 6Kodi mukene okir ikom pata; ma gudongo, ci gutwo woko, pien pii peke i tergi. 7Kodi mukene okir ikin okutu; okutu odongo kacel kwedgi, ci odiyogi woko. 8Kodi mukene okir i ngom maber, ci gudongo, gunyak guceko nyiggi ma dodo tyen miya.” Ikare madong oloko lok man, ci odange kun waco botgi ni, “Ngat matye ki it me winyo lokman, owiny.”

Pwony ikom carolok

(Mat 13:10-17; Mar 4:10-12)

9Ka lupwonyene gupenyo Yecu telok me carolok man, 102 ci en ogamo ni, “Wun kimiyowu me ngeyo mung me ker pa Lubanga; ento jo mukene kimiyogi i carolok wek ka gineno, pe gunen, dok ka giwinyo, pe guniang tere.”

Yecu ogonyo te carolok ikom laco kodi

(Mat 13:18-23; Mar 4:13-20)

11“Caroloki tere ene: Kodi aye lok pa Lubanga. 12Kodi ma opoto i yoo gin aye jo ma winyo lok pa Lubanga; ci lacen Catan bino, kwanyo lok ki i cwinygi woko, wek pe guye, ci pe gilare. 13Kodi ma gupoto ikom pata got aye jo ma winyo lok pa Lubanga, ci gigamo lok ki yomcwiny; ento pe gitye ki lwitgi, ci giye pi kare manok, ento ikare me omo cwiny gipoto woko. 14Kodi ma okir ikin okutu, gin aye jo ma winyo lok pa Lubanga, ento ka kare okato, ci tam mapol, ki maro lonyo, ki maro yomcwiny me kwo man diyogi woko, miyo nyiggi pe cek maber. 15Kodi ma opoto i ngom maber, gin aye jo ma ka guwinyo lok pa Lubanga, ci gimako matek ki cwiny ma gene ki maber, miyo ginyak nyiggi kun gidiyo cwinygi.”

Mac tara ma kiumu ki aduku

(Mar 4:21-25)

163

“Pe tye ngat mo ma cwinyo tara, ci dok umu woko ki aduku, nyo keto ite kitanda, ento kingabo iwi lacib tara, wek jo ma bino i ot gunen dero mac ce. 174 Pien pe tye gin mo ma kikano ma pe binen kamaleng, dok pe tye gin mo ma kiumu ma pe kibingeyo, dok ma pe kibiyabo kamaleng. 185 Pimeno wugwoke kit ma wuwinyo ki lok; pien ngat ma gin mere mo tye kibimede, ngat ma gin mere mo peke, kibikwanyo woko ki bote kadi wa gin ma en tamo ni etye kwede.”

Min Yecu ki omegi Yecu

(Mat 12:46-50; Mar 3:31-35)

19Mine ki omegine gubino, ento onongo pe gitwero oo bote pi lwak. 20Kitite ni, “Meni ki omegini gitye gucung woko, gimito neni.” 21Ento Yecu odok iye botgi ni, “Maa ki omegina gin aye jo ma giwinyo lok pa Lubanga, dok gilubu.”

Yecu ojuku yamo ki nam

(Mat 8:23-27; Mar 4:35-41)

22Inino mo acel ka Yecu odonyo i yeya kacel ki lupwonyene, ci owaco botgi ni, “Wakatu wacitu loka nam tung ca.” Ci gucako kwango yeya; 23ikare ma gitye ka kwango yeya, ci Yecu onino woko. Yamo ocako kodo matek i dye nam i atura kun twago pii me nam, ma omiyo pii ocako pong i yeya, ci onongo gitye marac! 24Ci gucito, gucoye kun giwaco ni, “Rwoda, Rwoda, wabito watum woko do!” Ka Yecu oco, ci ocoko yamo, ki pii me nam ma onongo twage ni; ci yamo opye mot, ki pii nam bene opye mot. 25Ci Yecu openyogi ni, “Niyewu tye kwene?” Ci lworo omakogi, dok guuru kun gupenye keken gi ni, “Man kono kit dano ango ni, ma juku yamo ki pii ki twero, ci bene giwinyeni?”

Yecu ocango dano me Geraca matye ki cen marac

(Mat 8:28-34; Mar 5:1-20)

26Gubino i lobo pa Lugeraca, ma okeme ki Galilaya. 27Ka Yecu okato iwi tera, ci dano mo me taun meno matye ki cen obino bote. Danonu onongo orii pi kare malac ma pe ruku bongo, pe bedo i ot bene, ento bedo mere ikin lyel keken. 28Ka oneno Yecu, en odange, ci oryebe inyime, owaco ki dwon malongo ni, “Yecu Wod pa Lubanga Mamalo Twal, ilaro ango kweda in? Abako doga boti, pe iyela.” 29Pien onongo Yecu ociko cen marac ki twero ni oa woko ki ikom danonu. Pien tyen mapol onongo poto ikome. Dok onongo kigwoke agwoka kun kitweye ki nyor ki nyonyo, ento yam turu gin ma kitweye kwede woko, cen ryeme, tere i tim. 30Yecu openye ni, “Nyingi anga?” Ogamo ni, “Legion”;6 pien cen mapol onongo tye ikome. 31Cen gubako dogi bote ni pe ocwalogi ni gicit i bur kapiny. 32Lwak opego mapol onongo gitye kacam ikor got kunu. Cen gubako doggi bote ni owek gidony i opego. 33Cen gua ki ikom danonu, gudonyo i opego, ci lwak opego gutware ki ngwec nia ki i kor got malo, ci gumuny woko i nam.

34Ka lukwat guneno gin ma otime, ci guringo, gutero loke i taun madit ki ikin paco. 35Dano gucito kaneno gin ma otime, ci gubino bot Yecu, gunongo dano ma cen oa ki ikomeni obedo katyen Yecu, oruku bongo, odoko dano; ci lworo omakogi. 36Jo ma guneno gin man gutito botgi kit ma dano meno mayam tye ki cen ikomeni ocang kwede. 37Jo ducu ma gibedo i lobo pa Lugeraca ma orumu kunu gulego Yecu ni myero oa woko ki botgi, pien onongo lworo omakogi matek; omiyo Yecu odonyo iyeya, ci oa odok gire oweko lobo meno. 38Dano ma cen oa ki ikomeni obako doge bot Yecu ni myero ebed bote; ento Yecu pe oye ocwale woko kun cike ni, 39“Dok i paconi, citi itit gin madit ma Lubanga otimo ikomi.” Ci ocito otito ikin taun meno ducu lok madit ma Yecu otimo ikome.

Nya pa Yairo ki dako ma ogudu dog bongo pa Yecu

(Mat 9:18-26; Mar 5:21-43)

40Ka Yecu odwogo, lwak gujole ki yomcwiny, pien onongo gin ducu gitye ka kure. 41Dano mo obino, nyinge Yairo, ma onongo ladit me kacoke. Ci oryebe piny katyen Yecu, obako doge bote ni obin i ode, 42pien onongo yam tye ki nyare ma onywalo acel keken ma onongo dong cok to; mwaka me dite mito romo apar wiye aryo.

Ikare ma Yecu tye kawot, lwak odiye. 43Dako mo onongo tye kunu mayam onongo twoyo two agobi pi mwaka apar wiye aryo, madong obalo lime ducu ka wilo yat, ento pe otwero cang. 44Obino cok inge Yecu, ci ogudu dog ginarukane; cutcut remo ma cwer ocok woko. 45Yecu openyo ni, “Anga ma ogudani?” Ma dano ducu gukwero woko, ci Petero ki jo matye kacel kwede, gugamo ni, “Rwoda, lwak orumi woko dyere, kun gidiine ikomi.” 46Ento Yecu owaco ni, “Ngat mo oguda gire, pien awinyo tek oa woko ki ikoma.” 47Ka dakonu oneno ni pe etwero kane, ci obino kun kome myel, ci oryebe inyime, ka otito inyim lwak ducu gin ma omiyo egude, ki kit ma ecang kwede lawang acel. 48Yecu owace ni, “Nyara, niyeni ocangi, wot ki kuc.”

49Ikare ma Yecu pud tye kalok, ci dano mo obino ma oa ki i gang madit pa ladit me kacoke, owaco ni, “Nyari dong oto woko, pe dong iyel Lapwony.” 50Ento ka Yecu owinyo, ci owace ni, “Pe ilwor, ye ayeya keken, ci en bikwo.” 51Ka Yecu obino i ot, ci pe oye ni dano mo odony kwede iot, kono Petero ki Jon, ki Yakobo, ki won latin ki min ne keken. 52Dano ducu onongo gitye kakoko kun gikumu pire; ento Yecu owaco ni, “Wuwek koko obedi; pien nyakoni pe oto, ento onino anina.” 53Gunyere matek, pien gingeyo ni nyakoni dong oto woko. 54Ento Yecu omako bad latin, olwonge, ci owace ni, “Nyako, a malo.” 55Ka cwinye odwogo, ci en oa malo oyotoyot, Yecu ociko ni gumiye gin mo me acama. 56Lunyodone guuru mada; ento Yecu ocikogi matek ni pe myero gutit pi gin ma otimeni bot dano mo.