Luka 7

Yecu ocango latic pa ladit maloyo acikari

(Mat 8:5-13)

1Ka Yecu dong otyeko tito loke ducu bot dano, ci en odonyo i Kapernaum. 2Ladit mo ma Laroma maloyo wi acikari miya yam tye ki latice ma en maro tutwal, ma kome lit, cok to. 3Ka en owinyo pi Yecu, ci ooro ludongo pa Lujudaya bote kun lege ni obin ocang latice. 4Ka gubino bot Yecu, ci gubako dogi bote ki cwinygi ducu kun giwace ni, “Laco man obedo dano ma kite ber mada, myero ikonye, 5pien maro rokwa, en aye ogero ot me kacokewa.” 6Yecu ocito kacel kwedgi. Ka dong oo cok ki gang, ladit maloyo acikari ooro lureme bote, kun wace ni, “Ladit, pe icane, pien an pe amyero me wek ibin idony i oda, 7an aye gin ma omiyo atamo, ni kadi wa an bene pe aromo bino boti. Ento wac lok awaca keken ci latica bicang. 8An bene abedo dano ma kiloya i dog tic, dok kiketa bene atye ki acikari mukene ma an aloyogi. Ka awaco bot acikari mo acel ni, ‘Cit,’ ci cito, dok ka awaco bot ngat mukene ni, ‘Bin’, ci bino dok ka awaco bene bot opiina ni, ‘Tim man,’ ci timo.” 9Ka Yecu owinyo lok man, ci ouru tutwal, oloke bot lwak malube, owaco botgi ni, “Atito botwu ni, peya anongo niye marom ki man, kadi i Icrael.” 10Ka jo ma kiorogi dong gudok paco, ci gunongo latic dong kome yot.

Yecu ocero wod pa dato i Nain

111

Ka kare okato manok, Yecu ocito i taun madit ma kilwongo Nain; lupwonyene ki lwak madwong guwoto kacel kwede. 12Ka dong onyiko cok ki dogcel me gang kal me taun madit, ci nen, onongo gitye ka lebo dano ma oto, latin ma mine onongo onywale en kene, mine yam dato. Lwak dano ma gua ki i gang kal madit meno onongo gitye kacel kwede. 13Ci ma Rwot onene, kica omake ikome, owace ni, “Wek koko obedi.” 14En obino ogudu kitara, kun jo ma gitye ka lebo lato gucung mot. Yecu owaco ni, “Awobi, awaci ni, a malo.” 15Dano ma otoni oa, obedo, ocako lok. Ci Yecu omiye bot mine. 16Lworo omakogi ducu, gupako Lubanga kun giwaco ni, “Lanebi madit dong onen ikinwa!” Dok ni, “Lubanga dong olimo jone!” 17Lok man ma en otiyoni oywek i lobo Judaya ducu ki i lobo ducu ma orumu.

Jo ma Jon Labatija ooro bot Yecu

(Mat 11:2-19)

18Lupwonye pa Jon gutito bote lok magi ducu. 19Ci Jon olwongo jo aryo ki ikin lupwonyene oorogi bot Rwot ka penye ni, “In aye ngat ma myero obin ni, nyo dok wakur ngat mukene?” 20Ka jonu gubino bot Yecu, guwace, ni, “Jon oorowa boti, kun penyo ni, ‘In aye i ngat ma myero obin ni, nyo dok wakur ngat mukene?’” 21Ikare meno onongo Yecu ocango lutwo mapol ma gitye ki arem ki cen, omiyo lutowang mapol bene guneno piny. 222 Yecu odok iye botgi ni, “Wucitit bot Jon gin ma wuneno ki ma wuwinyo; lutowang wanggi oyabe guneno piny, lungolo guwoto, ludobo kicangogi, ki ludingit guwinyo lok, ki jo ma oto kicerogi woko, ki dok lucan bene kitito botgi lok me Kwena Maber. 23Dong dano ma tye ki niyene ikoma Lubanga ma cwinye pe oa woko ki ikoma tye ki gum.”

24Ka dong lukwena pa Jon gudok cen, Yecu ocako lok ki lwak ikom Jon ni, “Onongo wucito i tim kaneno gin ango? Onongo wucito kaneno lagada ma yamo obedo ka yengone? 25Onongo wucito kunu kono kaneno gin ango? Wucito kaneno dano ma oruku bongi mabeco? Nen, jo ma ruku bongi me deyo, dok ma bedo ki jami me wel, gin gibedo i odi pa luker. 26Dong onongo wucito kunu kaneno gin ango? Wucito kaneno lanebi mo? Eyo, awaco botwu ni ngat madit makato lanebi. 273 Man aye ngat mayam kicoyo lok ikome ni,

‘Nen, acwalo lakwenana otelo nyimi,

ma bigero yoni ma peya nongo in ibino.’

28Awaco botwu ni, pe tye dano mo ki ikin jo ma mon onywalogi makato Jon ki dit; ento ngat ma rwome tidi tutwal i ker pa Lubanga aye dit kate.” 294 Lwak ducu guwinyo lok man, wa lujog mucoro ci guye ni Lubanga opore, pien yam kibatijagi ki batija pa Jon, 30ento Luparicayo ki Lupwonycik gukwero gin ma Lubanga oyubu pirgi, pien nene pe gulimo batija ki bot Jon.

31Yecu dok owaco ni, “Kit gin ango dong ma abiporo ki jo me kare man? Gin calo ango? 32Girom ki lutino ma gibedo i cuk ma gilwongo lutino wadigi kun giwaco ni,

‘Yam wakutu nyamulere botwu wun pe wumyelo;

wawero wer lyel, wun pe wukok.’

33Pien Jon Labatija dong obino kun bedo i niriikec, dok pe mato kongo bwino bene ci wun wuwaco ni, ‘En tye ki cen.’ 34Wod pa dano obino kun camo cam dok mato mat bene, wun wuwaco ni, ‘Nen, dano ma owor dok lamero, larem lujog mucoro ki lubalo.’ 35Ento lutino pa Lubanga kikome guniang ni gin ma wan watiyo obedo tic me ryeko.”

Yecu iot pa Cimon ma Laparicayo

36Ngat acel ikin Luparicayo olwonge kacam i paco bote; ci Yecu ocito iot pa Laparicayo obedo piny i dog cam. 375 Ci onongo tye dako mo ma labalo i taun meno. Ka ongeyo ni Yecu tye kacam iot pa Laparicayo, ci okelo adomo moo ma ngwece kur. 38Ocung inget Yecu tung kutyene kun kok, ma pig wange ton ityen Yecu, ci obedo ka dunyune ki yer wiye kun noto tyene, ka dok bene owiro ki moonu. 39Ma Laparicayo ma onongo olwongeni oneno, oloko i iye kekene ni, “Kono dano man lanebi, kono oniang ikom dako ma ogudeni, ki kite, ni en labalo.” 40Yecu odoke iye ni, “Cimon, atye ki lok mo ma amito awaci.” Cimon ogamo ni, “Waca, Lapwony.” 41Yecu ogamo ni, “Ngat mo ma lami banya yam tye ki dano aryo ma gudeno banya bote. Ngat acel onongo tye ki banya me denari miya abic, ki ngat mukene pyere abic. 42Ka culune oloyogi, ci en otimo kica botgi gin aryo ducu. Mene ikin gi ma bimare makato?” 43Cimon odoke iye ni, “Atamo ni en ma kitimo kica pi wel banya madwongi.” Yecu ogamo ni, “Ingolo kakare.” 44Ci oloke bot dako man, ka openyo Cimon ni, “Ineno dako man? Adonyo i odi, ci pe imiya pii me lwoko tyena, ento en olwoko tyena ki pig wange, ci odunyu ki yer wiye. 45In pe imota kun inoto lema, ento cake ikare ma en adonyo i ot, en pe oweko noto tyena. 46In pe iwiro wiya ki moo, ento en owiro tyena ki moo ma ngwece kur. 47Pimeno atiti ni, dong kitimo ki en kica pi bale mapolgu ducu, kit ma mar ne madwongi nyutuni; ento ngat ma kiweko bale manok, nyute mar manok bene.” 48Owaco bot dakonu ni, “Bali dong kiweko.” 49Jo ma onongo tye i dog cam gucako lok ikin gi keken gi ni, “Man anga, ma weko balli?” 50Owaco bot dakonu ni, “Niyeni olari; wot dong giri ki kuc.”