Luka 6

Lapeny ma mako ceng Cabit

(Mat 12:1-8; Mar 2:23-28)

11

Inino mo acel ka Yecu onongo owoto kun ngolo ki i poto ngano i ceng Cabit. Lupwonyene gurito wit ngano, gutinyo i cinggi, ci gubedo ka mwodone. 2Ento jo mogo ikin Luparicayo gupenyogi ni, “Pingo wutimo gin ma cik okwero ni pe kiti i ceng Cabit?” 32 Yecu odok iye botgi ni, “Wun pe wukwano gin ma nene Daudi otiyo ce, ka nene kec oneke, en ki jo ma onongo gitye kacel kwede? 43 En odonyo i Ot pa Lubanga, ci ocamo mugati ma kiketo inyim Lubanga, mayam cik okwero ni dano mo pe ocam, kono ajwaki pa Lubanga keken, dok omiyo mogo bene bot jo ma onongo en tye kwede.” 5Ci owaco botgi ni, “Wod pa dano aye Rwot me Cabit.”

Labade otal

(Mat 12:9-14; Mar 3:1-6)

6I ceng Cabit mukene Yecu odonyo i kacoke, ci opwonyo; kunu onongo tye iye dano mo ma bade ma lacuc otal. 7Lupwonycik ki Luparicayo gukiye ka ce en bicange i ceng Cabit, wek giyeny yo mo me kelo kop ikome. 8Ento Yecu ongeyo tamgi woko, ci owaco bot labade otal ni, “Bin icung kany.” Ci danonu oa, ocung kunu. 9Yecu owaco botgi ni, “Apenyowu ni, i ceng Cabit cik ye ni kitim iye gin maber, nyo gin marac, kilaro iye kwo nyo kityek woko?” 10Olworo wange ikomgi ducu, ci owaco bot danonu ni, “Rye badi.” Ci labade otal oryweyo bade, ci bade ocang. 11Ento kiniga omakogi matek, guporo lok ikin gi keken gi, pi gin ma myero kitim ikom Yecu.

Yecu oyero Lukwena apar wiye aryo

(Mat 10:1-4; Mar 3:13-19)

12Ikare meno Yecu ocito iwi got kalega; ci obedo kalego Lubanga dyewor benebene. 13Ka piny oru, en olwongo lupwonyene bote, ci oyero jo apar wiye aryo ki ikin gi, omiyogi nying ni gin lukwena; gin ene: 14Cimon ma en ocako nyinge ni Petero, ki Anderiya ma omine, Yakobo ki Jon, Pilipo ki Bartolomayo, 15Matayo ki Tomaci, Yakobo wod pa Alipayo, Cimon ma kilwongo ni Jealot (en nene obedo ngat mamito locken), 16Juda wod pa Yakobo, ki Juda me Keriot, mayam oloke odobe.

Yecu opwonyo dok ocango dano

(Mat 4:23-25)

17Ikare ma Yecu lor kwedgi piny, ci ocung kama olaane. Lwak ki lupwonyene mapol onongo gitye kunu, ki lwak dano mapol ma gua ki i Judaya ki i Jerucalem ki i dog nam me Turo ki Cidon. 18Gin gubino pi winyo pwonye, dok wek ocanggi woko ki ikom twogi. Ci jo ma cen maracu onongo bene yelogi gucang. 19Ci lwak ducu gubedo kayenyo yo me gudu kome, pien onongo tek tye a ki ikome pi cango gin ducu.

Yomcwiny ki cwercwiny

(Mat 5:1-12)

20Yecu oilo wange bot lupwonyene, ci owaco botgi ni,

“Wutye ki gum wun jo ma lucan i lok me cwiny,

pien ker pa Lubanga mewu!

21Wutye ki gum, wun jo ma kec nekowu kombedi, pien wubiyeng!

Wutye ki gum, wun jo ma wukok kombedi,

pien wubinyero! 224

Wutye ki gum ka dano dagwu, kace kiryemowu woko ki ikin gi, ka kiyetowu, ka kicayo nyingwu ni rac, pi Wod pa dano! 235 Cwinywu obed yom inino meno, kun wupye ki yomcwiny, pien mot ma kibimiyowu me pwoc dit, tye i polo; pien kwarigi yam gutimo lunebi kitmeno.

24Ento wubineno can, wun lulonyo pien dong wutyeko gamo gin maber me kweyo cwinywu!

25Wubineno can, wun jo ma yeng kombedi,

pien kec binekowu!

Wubineno can, wun jo ma nyero kombedi,

pien wubikumu, dok wubikok!

26Wubineno can, ka dano ducu pwoyowu, pien kwarigi yam gupwoyo lunebi ma lugoba kitmeno.

27Ento wun jo ma winyo, awaco botwu ni, wumar lukworwu, wutim ber bot jo ma dagwu. 28Wuleg gum ikom jo ma cenowu, wuleg pi jo ma nywarowu. 29Ngat ma odongo lemi tungcel, loke tungcel bene; ngat ma omayo kanyini, pe itwone koti bene. 30Mi bot dano ducu ma legi; ngat ma omayo jami ni, pe ipeny pi jaminu doki ki bote. 316 Kit ma wumito dano gutimwu, wun bene wutimgi kumeno!

32Ka wumaro dano mamarowu keken, pwoc ango ma wulimo iye? Pien lubalo bene maro jo mamarogi! 33Ka wumito ber bot dano ma timowu ber, pwoc ango ma wubilimo iye? Pien lubalo bene gimito kitmeno! 34Dok ka wumiyo banya bot dano ma wugeno ni gitwero culuwu, pwoc ango ma wulimo iye? Lubalo bene miyo banya bot lubalo wek guculgi marom. 35Ento wun wumar lukworwu, wutimgi ber, wumii banya, kun pe wugeno ni kibiculuwu, ci mot me pwoyowu bibedo madwong, dok wubibedo lutino pa En Mamalo Twal; pien en timo ber bot jo ma pe pwoye ki bot jo maracu. 36Wubed lukica kit macalo Wonwu bene lakica.”

Ngolo kop ikom jo mukene

(Mat 7:1-5)

37“Pe wungolkop ikom jo mukene, wek wun bene pe kingolkop ikomwu; pe wungolkop oloo jo mukene, wek wun bene pe kingolo kop olowu. Wutim kica bot dano pi balgi, ci wun bene kibiweko balwu. 38Wumii, ci kibimiyowu bene. Ci wubinongo gin mabeco ma kipimo maber, ma kidilo, ma kiyengo, ma o. Pien kit ma wutero kwede ki dano en aye bene kit ma Lubanga biterowu kwede.” 397

Ci Yecu obolo botgi carolok man. Kun waco ni, “Latowang pe twero peyo latowang lawote? Gin aryo ducu gibipoto woko i bur? 408 Lapwonye pe dit kato dano ma pwonye; ento dano ducu ka dong kipwonyogi maber, gibidoko macalo lapwonygi. 41Pingo ineno cung kal matye iwang omeru, ento dul yat matye i wangi in kikomi pe ineno. 42Nyo itwero waco bot lawoti ningning ni, ‘Lawota, wek akwany cungkal matye i wangini woko,’ kun in kikomi pe ineno dul yat matye i wangi? In labwolo, kong ikwong kwanyo dul yat matye i wangini woko, ci miyo dong ineno piny maber me kwanyo cung kal matye iwang lawoti ca.”

Yat maber kingeyo ki ikom nyige

(Mat 7:16-20; 12:33-35)

43“Pien pe tye yat maber matwero nyako nyige maracu; ki yat marac bene pe twero nyako nyige mabeco. 449 Yat acel acel ki ngeyo ki nyige. Pe kipwono olam ki ikom okutu oryang, dok bene pe kipwono olok ki ikom ocok. 4510 Dano maber kwanyo gin maber ki ikin jami mabeco ma en okano i cwinye, dano marac kwanyo gin marac ma ikin jami maracu ma en okano, pien dog dano loko gin ma opong i cwinye.”

Lugedo aryo

(Mat 7:24-27)

46“Pingo wulwonga ni, ‘Rwot, Rwot,’ kun pe wutiyo gin ma acikowu? 47Dano mo keken ma bino bota ma winyo loka, dok tiyo ki loka, abinyutu botwu ngat ma en cal kwede. 48En bedo rom ki dano ma ogero ot ma okwinyo matut, ma ocibo gutine ikom pata got; ka pii opong, ci lalele ocore ikom ote, ento pe otwero yengone, pien kigero maber. 49Ento dano ma winyo loka kun pe tiyo kwede, rom ki dano ma ogero ote i ngom labongo guti; ka kulu omol ki tek ikome, ci opoto oyotoyot, oganye woko piny lirubuku!”