Luka 5

Yecu olwongo lucik rec

(Mat 4:18-22; Mar 1:16-20)

11

Inino mo acel ma Yecu ocung i dog nam Genecaret lwak dano gudine cok bote pi winyo lok pa Lubanga. 2Ci en oneno yeya aryo i dog nam; lumak rec onongo gua woko ki i igi, gitye ka lwoko obwogi. 3Yecu oito i yeya acel ma onongo pa Cimon, olege ni kong okwang manok i nam. En obedo piny, opwony lwak kun tye ki i yeya. 4Ka en dong otyeko lok, ci owaco bot Cimon ni, “Kwang icit i kut, ci wubol obwowu wumak rec.” 52 Cimon odoke iye ni, “Rwoda, wayele dyewor benebene, pe wamako gin mo. Ento pi loki abibolo obwo.” 63 Ka gutimo kitmeno, ci gumako lwak rec mapol ata, ma obwogi ocako cot. 7Ci gugwelo lumak rec wadgi ma i yeya mukene ni gubin gukonygi. Gubino ci guloko rec i yeya aryo ducu gupong woko, omiyo gucako mwuny. 8Ka Cimon Petero oneno gin man, ci oryebe piny inyim Yecu, kun waco ni, “Rwot, cit giri, iweka, pien an labalo.” 9Pien en ki dano ducu ma onongo gitye kwede guuru pi rec ma gumako. 10Yakobo ki Jon lutino pa Jebedayo, ma gin yam ribe ki Cimon i dog tic, bene guuru. Yecu owaco bot Cimon ni, “Pe ilwor; cake koni dong i bimako dano.” 11Ka dong gukelo yeyagi iwi tera, ci guweko jamigi ducu gulube.

Yecu ocango kom ladobo

(Mat 8:1-4; Mar 1:40-45)

12Ikare ma onongo tye i taun madit mo, dano mo obino ma dobo orwato ikome. Ka en oneno Yecu, ci oryebe piny olege ni, “Ladit, ka in imito, itwero canga.” 13Yecu oryeyo cinge ogudu kome, kun wace ni, “Amito; komi ocang.” Cutcut dobo ocang ki ikome. 144 Yecu ocike ni pe myero otit bot dano mo; ento ni, “Citi, inyute keni bot ajwaka pa Lubanga, dok imii gityer pi komi madong ocang woko ni, kit mayam Moses ociko pire, wek obed lanyut botgi ni in dong icang.” 15Ento pire oywek matek makato, lwak mapol ocoke ka winye dok wek ocang gi ki ikom twogi. 16Ento Yecu yam lwite kare ki kare cito kalega i tim.

Yecu ocango dano ma twoyo two akweya kom

(Mat 9:1-8; Mar 2:1-12)

17Inino mo acel onongo Yecu tye ka pwony, kun Luparicayo ki Lupwonycik ma gua ki ikin gangi ducu me Galilaya ki Judaya ki Jerucalem gubedo kunu; tek pa Rwot me cango dano onongo tye ikome. 18Cutcut jo mogo gukelo bote lagoro mo ma twoyo two akweya kom, ma obutu iwi kitara. Guyenyo yo me tere i ot wek kikete inyim Yecu. 19Ento ma pe gunongo yo, pi pol pa lwak, guito iwi ot, guelo wi ot ci gucwale ki kitarane i dye ot inyim Yecu. 20Ka Yecu oneno niyegi, ci owaco ni, “Larema, bali dong kiweko woko.” 21Lupwonycik ki Luparicayo gucako penye keken gi, kun giwaco ni, “Man anga ma loko lok me yeto Lubangani? Anga matwero weko bal, kono Lubanga keken?” 22Ka Yecu oniang penygi, ci odok iye botgi ni, “Pingo wutye ka penye kitmeno icwinywu? 23Mene ma yot, me waco ni, ‘Bali dong kiweko,’ nyo ni, ‘Aa, iwoti’? 24Ento meno wek wunge ni Wod pa dano tye ki twero me weko bal iwi lobo,” ci ociko lagoro ni, “Awaci ni, a, ikwany kitarani, idok paco.” 25Cutcut lagoro oa malo ocung inyimgi, ci okwanyo gin ma onongo obutu iye odok paco kun pako Lubanga. 26Dano ducu guuru matek tutwal, gupako Lubanga. Lworo omakogi, guwaco ni, “Waneno gin me aura tin.”

Yecu olwongo Levi

(Mat 9:9-13; Mar 2:13-17)

27Ka man otum, ci Yecu okato woko, oneno lajog mucoro mo ma nyinge Levi, kun obedo piny i ka jogo mucoro; ci owace ni, “Luba.” 28Levi oweko jamine ducu, oa olubu kore.

29Ci Levi otedo karama madit i ode pi Yecu, lwak lujog mucoro mapol ki jo mukene gubedo piny i dog cam kacel kwedgi. 305 Luparicayo ki Lupwonycik gungur ikom lupwonyene, kun gipenyo ni, “Pingo wucamo dok wumato kacel ki lujog mucoro ki lubalo?” 31Yecu odok iye botgi ni, “Jo ma komgi yot pe gimito daktar; ento jo ma komgi lit aye gimito. 32An pe abino kalwongo jo ma kitgi atir, ento lubalo, wek gunguti.”

Peny ikom lok me rii kec

(Mat 9:14-17; Mar 2:18-22)

33Guwace ni, “Lupwonye pa Jon girii kec kare ki kare, dok gilego bene, ki pa Luparicayo bene kitmeno, ento lupwonyeni gicamo dok gimato do.” 34Yecu openyogi ni, “Wutwero miyo wele pa lanyom rii kec ma kun lanyom tye kwedgi? 35Ento kare bibino ma ka kikwanyo lanyom woko ki botgi, ka dong gibirii kec ikare meno.”

36Yecu dok obolo botgi carolok ni, “Pe tye ngat mo ma yeco kiraka ki ikom ginaruka manyene woko, ci dabo ikom ginaruka ma otii; ka otimo kitmeno, ci nongo oyecu ginaruka manyeni woko, dok bene kiraka ma ikom manyeni pe birwate ki ma otii ni. 37Dok pe tye ngat mo ma piko kongo bwino manyen i opiru macon; ka opiko, ci kongo bwino biyeco opiru woko, opiru bene bibale. 38Ento kongo bwino manyen myero kipik i opiru manyen bene. 39Pe tye ngat mo ma ka omato kongo bwino macon ci dok mito manyene, pien waco ni, ‘Macon ni mit.’”