Luka 4

Catan obito Yecu

(Mat 4:1-11; Mar 1:12-13)

1Yecu odwogo ki i Jordan kun opong ki Cwiny Maleng, cutcut Cwiny Maleng otere wa i tim. 2Ci orii i tim pi nino pyere angwen, kun Catan obedo ka bite. En pe ocamo gin mo ikare meno ducu; ka otyeko rii kec, ci kec oneke. 3Catan owace ni, “Ka in i Wod pa Lubanga, wac ki gweng man wek oloke odok kwon.” 41 Ento Yecu odok iye ni, “Yam kicoyo ni, ‘Dano pe bibedo kwo ki kwon keken.’” 5Catan dok otere malo, onyute ker ducu ma iwi lobo ikine me kare manok mo, 6ci owace ni, “Abimiyi twer man ducu ki deyo man ducu, pien kityeko miyo bota, atwero miyo bot ngat ma an amito. 7Pimeno, ka iwora, ci jami magi ducu bibedo meri.” 82 Yecu odoke iye ni, “Yam kicoyo ni,

‘Wor Rwot Lubangani,

dok bene itii pire keken.’”

9Dok otere i Jerucalem, ci ocibe ocung iwi labila Ot pa Lubanga, ci owace ni, “Ka in i wod pa Lubanga, a ki malo kany ipot piny, 103 pien yam bene kicoyo ni,

‘En biciko lumalaikane piri,

wek gugwoki,’

11dok bene ni,

‘Gin bijoli ki cinggi,

wek pe iyok tyeni ikom got.’” 124

Yecu dok ogamo doge owace ni, “Yam kiwaco ni, ‘Pe item i Rwot Lubangani.’” 13Ka Catan dong otyeko bite, ci oweke kun kuru kare maber.

Yecu ocako tice i Galilaya

(Mat 4:12-17; Mar 1:14-15)

14Yecu odwogo i Galilaya ma opong ki tek pa Cwiny Maleng; pire oywek i lobo ducu ma orumu kunu. 15En opwonyo ikacokegi, ci dano ducu guketo deyo ikome.

Kikwero Yecu i Najaret

(Mat 13:53-58; Mar 6:1-6)

16Yecu obino i Najaret kama yam en odongo iye, ci odonyo i kacoke i ceng Cabit, kit macalo kite onongo tye. En oa malo ka kwan; 17ci kimiye buk pa lanebi Icaya. En oyabo buk, ci oyenyo kama kicoyo ni, 185

“Cwiny pa Rwot tye ikoma,

pien Rwot dong oyera woko

wek atit lok me Kwena Maber bot lucan.

Oora me tito bot jo matye i opii ni kibigonyogi,

ki bot jo ma wanggi oto ni kibiyabo wanggi,

ki me gonyo jo ma kidiyogi wek gucit ki kuc,

19dok pi tito pi mwaka ma Rwot binyutu iye kica mere bot dano.”

20Ci Yecu odolo buk, odwoko bot latic me kacoke, ci obedo piny katito lok; dano ducu ma ikacoke guciko wanggi ikome. 21Ocako tito botgi ni, “Tin ginacoya man ocobo kakare kun wuwinyo ki itwu.” 22Dano ducu guloko lok maber ikome, kun giuru lok me kica ma oa ki idoge. Gupenyo ni, “Man pe wod pa Yucepu?” 23En ogamo dog gi ni, “Angeyo atir ni wubibolo carolok man ikoma, ni, ‘Daktar, cangge keni, tic mayam wawinyo itiyo i Kapernaum, tii kany bene i pacowa kikome.’” 246 Dok omede ki lok kwedgi ni, “Adada awaco ki wun ni, pe tye lanebi mo ma kijolo i lobo tuggi. 257 Ento atito botwu atir ni, i lobo Icrael ikare pa Eliya yam tye iye mon mapol ma coggi oto, ma kot okwero cwer pi mwaka adek ki dwe abicel, ci kec laparanat opoto i lobo meno ducu; 268 ento Lubanga pe ocwalo Eliya bot ngat mo ikin gi, kono bot dato mo ma i Carepat i lobo Cidon. 279 Dok i lobo Icrael ikare pa lanebi Elica onongo yam tye iye ludobo mapol; ento pe kicango mo ikin gi, kono Naaman Laciria keken.” 28Ka dano ducu ma ikacoke guwinyo lok man, kiniga omakogi matek. 29Gutware malo, gutere woko ki i taun madit, gukele iwi got ma gugero gangi iwiye wek gicore piny. 30Ento Yecu opuce woko ki idyergi, ci ocito gire.

Dano matye ki cen marac

(Mar 1:21-28)

31Yecu ocito i Kapernaum ma en aye taun madit ma i Galilaya. Obedo ka pwonyogi kunu iceng Cabit; 3210 ci guuru pwonye, pien en nongo loko ki twero. 33I kacoke meno onongo tye iye dano matye ki cen marac ci en odange ki dwon malongo ni, 34“Ilaro gin ango kwedwa ka, in Yecu Lanajaret? Dong ibino ka tyekowa bo? An angeyi, in i Ngat Maleng pa Lubanga” 35Ento Yecu ojuke kun wace ni, “Ling mot, a woko ki ikome!” Cen orete piny inyimgi, ci oa woko ki ikome kun pe otime marac. 36Dano ducu guuru, kun gipenye keken gi ni, “Man lok ango? Pien en ciko cen marac ki twero dok ki tek, ci gia woko.” 37Pire oywek ikabedo ducu ma orumu kunu.

Yecu ocango maro Cimon Petero

(Mat 8:14-15; Mar 1:29-31)

38Yecu oa okato woko ki i kacoke, odonyo i ot pa Cimon. Maro pa Cimon onongo tye ki two lyeto ma obwoye matek; gubako dogi bote pire. 39Yecu ocung ka ngete, ocoko lyeto, ci two ocang woko ki ikome; cutcut oa malo, ocako gwokogi.

Yecu ocango jo mapol otyeno

(Mat 8:16-17; Mar 1:32-34)

40Ka ceng dong mito poto, dano ducu matye ki lutwo, ma twogi patpat, gukelogi bote. En oketo cinge ikomgi ki acel acel ci ocangogi. 41Cen maracu bene oa ki ikom jo mapol, kun gidange ni, “In i Wod pa Lubanga!” Ento Yecu ojukugi, kun pe oye cen mo oloko, pien onongo gingeye, ni en Kricito ma Lubanga oyero.

42Ka piny oru, Yecu ocito ikabedo mo ma dano peke iye. Ento lwak gubedo ka yenye, ci gubino bote, gutemo juke wek en pe oa ki botgi. 43Ento en owaco botgi ni, “Myero atit lok me Kwena Maber me ker pa Lubanga i taun madito mukene bene, pien pi lok man Lubanga ceng iora ni atii.” 44Ci en obedo katito lok i kacoke ma i Judaya.