Luka 3

Lok ma Jon Labatija otito

(Mat 3:1-12; Mar 1:1-8; Jon 1:19,20)

1I mwaka me apar wiye abic me loc pa Tiberio Cecar, ikare ma Pilato onongo loyo Judaya, Kerode onongo loyo lobo Galilaya. Omine Pilipo kono onongo loyo lobo Ituria ki Trakoniti, Lucania onongo loyo Abilene, 2Anac ki Kayapa gin aye onongo ajwaki madito pa Lubanga, ikare meno lok pa Lubanga obino bot Jon wod pa Jakaria i tim. 3En owoto i lobo ducu ma cokcok ki Judaya kun tito lok me kwenane ni, “Wungut, wek kibatijawu, ci Lubanga biweko balwu,” 41 kit macalo kicoyo i buk pa lanebi Icaya ni:

“Dwon dano mo ma dange i tim ni,

wuger yo pa Rwot,

wutir yone ocung atir.

5Lung ducu kibitoro woko,

godi ki cere ducu kibidwokogi woko piny,

kama ogone kibitiro cung atir,

dok yo ma obedo burbur kibipiro woko.

6Dano ducu gibineno lar pa Lubanga.” 72

Jon owaco bot lwak ma gubino bote pi batija ni, “Wun lutino ororo, anga ma otito botwu ni wuring woko ki i akemo pa Lubanga matye ka binoni? 83 Dong wutii gin ma nyutu ni wungut ikom balwu, pe dok wucak tamo ni, ‘Watye ki kwarowa Abraim.’ Kong wunen, awaco botwu ni, Lubanga tye ki twero me miyo gweng magi loke doko likwayo Abraim. 94 Kombedi dong kiketo latong woko ilwit yadi; yat acel acel ma pe nyako nyige mabeco, kitongo kireto woko piny, ci kibolo woko i mac.”

10Lwak gupenye ni, “Watim ango dong?” 11En odok iye botgi ni, “Ngat matye ki kanyi aryo opok bot ngat ma pe kwede; ngat matye ki cam otim kitmeno bene.” 125 Lujog mucoro bene gubino wek kibatijagi, ci gupenye ni, “Lapwony, wan kono watim ango?” 13Owaco botgi ni, “Pe wujog makato wel ma kicikowu.” 14Acikari bene gupenye ni, “Wan kono watim ango?” En owaco botgi ni, “Pe wuyak ngat mo, pe wudot dano mo ki lok goba, wek mucarawu oromwu.”

15Ka lwak gitye kakuru, kun gipenye ki i cwinygi pi Jon, ka kono en Kricito ma Lubanga oyero, 16Jon odok iye botgi ni, “An abatijawu ki pii, ento ngat ma kata ki tek tye kabino, ma an pe amyero me gonyo ware. En bibatijawu ki Cwiny Maleng, dok ki mac. 17Oderone tye i cinge me pyeto ngano ducu ma i larone, en bidilo nganone idero, ento cunge en biwango woko ki mac ma pe to.”

18Ki lwak lok meno ducu Jon obedo katito lok me Kwena Maber bot lwak kun cuko ki cwinygi me dwogo bot Lubanga kun giloke gibwoto timgi maracu. 196 Ento Jon yam bene ojuku Kerode rwot madit pi bedo ki Kerodia ma ciomine, ki pi time maracu ducu, 20Ci Kerode dok omede i yone me timo bal, en opongo wiye ki tweyo Jon woko i buc.

Jon obatija Yecu

(Mat 3:13-17; Mar 1:9-11)

21Ka dong Jon obatija dano ducu, ma Yecu bene dong kibatija, kun en onongo tye kalega, 227 ci polo oyabe, Cwiny Maleng olyane piny i cal pa akuri, ci opye ikome. Ci dwon owinye ma a ki i polo kun waco ni, “In aye i Woda ma amaro, ma cwinya yom ikomi.”

Kwari pa Yecu Kricito

(Mat 1:1-17)

23Ikare ma Yecu ocako tice onongo dong tye ki mwaka mamito romo pyere adek me dite. Yam onongo kitamo ni, en wod pa Yucepu, ma en wod pa Eli, 24wod pa Matat, wod pa Levi, wod pa Melki, wod pa Janai, wod pa Yucepu, 25wod pa Matatia, wod pa Amoc, wod pa Nakum, wod pa Eceli, wod pa Nagai, 26wod pa Maat, wod pa Mattatia, wod pa Cemein, wod pa Yocek, wod pa Yoda, 27wod pa Yoanan, wod pa Reca, wod pa Jerubabel, wod pa Cealtiel, wod pa Neri, 28wod pa Melki, wod pa Adi, wod pa Kocam, wod pa Elmadam, wod pa Er, 29wod pa Yocwa, wod pa Eliejer, wod pa Yorim, wod pa Matat, wod pa Levi, 30wod pa Cimeon, wod pa Juda, wod pa Yucepu, wod pa Yonam, wod pa Eliakim, 31wod pa Melea, wod pa Mena, wod pa Matata, wod pa Natan, wod pa Daudi, 32wod pa Yece, wod pa Obed, wod pa Boaj, wod pa Cala, wod pa Nakucon, 33wod pa Aminadab, wod pa Admin, wod pa Arni, wod pa Kejeron, wod pa Perej, wod pa Juda, 34wod pa Yakobo, wod pa Icaka, wod pa Abraim, wod pa Tera, wod pa Nakor, 35wod pa Cerug, wod pa Reu, wod pa Peleg, wod pa Eber, wod pa Cela, 36wod pa Kainan, wod pa Arpakcad, wod pa Cem, wod pa Nua, wod pa Lamek, 37wod pa Metucela, wod pa Enoka, wod pa Jared, wod pa Maalalel, wod pa Kainan, 38wod pa Enoci, wod pa Ceji, wod pa Adam, wod pa Lubanga.