Luka 2

Kit ma kinywalo kwede Yecu

(Mat 1:18-25)

1Ikare meno cik oa ki bot Cecar Augucito ni kicoo nying dano ducu ma gitye i teloc pa jo Roma. 2Man obedo coc mukwongo ma kicoyo, ikare ma Kurenio loyo lobo Ciria. 3Dano ducu gucito ka cone, ngat acel acel i taun madit gi. 4Yucepu bene oa ki i Galilaya, ki i taun madit me Najaret, ocito i Judaya, i taun madit kal pa Daudi ma kilwongo Beterekem, pien en yam ngat acel ikin likwayo pa Daudi. 5En ocito ka cone ki dakone Maliam ma onongo otongo keny ikome, ma onongo oyac. 6Ikare ma gitye kunu, kare me nywale oromo. 7Onywalo latin kayone ma laco, oumu kome ki bongo, opyele kwede i wee me pito dyangi, pien onongo ot welo opong woko.

Lukwat ki lumalaika

8I lobo kunu onongo tye iye lukwat ma gibedo i olet, kun gigwoko romigi dyewor. 9Cutcut lamalaika pa Rwot oturu ki bino, onen botgi, deyo pa Rwot oryeny orumugi, ci lworo omakogi matek. 10Lamalaika owaco botgi ni, “Pe wulwor, pien nen, akeliwu lok maber me yomcwiny ma bibedo bot dano ducu. 11Tin i taun madit kal pa Daudi kinywalo pirwu Lalar, en Kricito Rwot. 12Man bibedo gin ma nyutu: wubinongo latin ma kiumu ki bongo, ma kipyele, obutu i wee me pito dyangi.” 13Oyotoyot lwak mony me polo onongo tye kacel ki lamalaika meno; ci gupako Lubanga kun giwaco ni,

14“Deyo obed bot Lubanga malo i lalenge lenge polo,

kuc obed i lobo ikin jo ma en pwoyo!”

15Ka dong lamalaika oa woko ki botgi, odok i polo, ci lukwat guloko keken gi ni, “Kong wacitu mono wa i Beterekem, wek wacinenu gin man ma otime, ma Rwot otitiwa pireni.” 16Gucito oyotoyot, ci gunongo Maliam ki Yucepu, ki latin lakere ma kipyelo i wee me pito dyangi. 17Ka guneno, gutito bot dano lok mayam kitito botgi ikom latin meno; 18dano ducu ma guwinyo guuru lok ma lukwat gutito botgi. 19Ento Maliam okano lok magi ducu, kun tamo pire ki i cwinye. 20Lukwat gudok kun kimiyo deyo bot Lubanga, gupake pi gin ducu ma guwinyo, dok guneno, kit mayam kitito botgi.

Cako nying Yecu

211

Ka nino aboro dong oromo me liro latin, kicako nyinge Yecu, nying ma lamalaika yam ocako ma en pud peya tye i ic.

Kidyero latin Yecu i Ot pa Lubanga

222

Ka kare dong oromo me lonyegi kit macalo tye i Cik pa Moses, ci gutero latin Yecu i Jerucalem wek kidyere bot Rwot, 233 kit macalo kicoyo i Cik pa Rwot ni “Lutino kayo ducu ma co kibidyerogi bot Rwot”, 24dok wek kityer gitum, kit ma kicoyo i cik pa Rwot ni: Amam aryo, nyo lutino akuri aryo.

25Ikare meno onongo tye laco mo i Jerucalem ma nyinge Cimeon. En yam dano ma kite atir ma lworo Lubanga, kun kuru kare ma kibikweyo iye cwiny jo Icrael; Cwiny Maleng onongo tye kwede. 26Cwiny Maleng onongo otyeko nyutu bote ni, en pe bito ma peya oneno Kricito pa Rwot. 27En obino i Ot pa Lubanga kun Cwiny Maleng aye tele. Ka lunyodo gukelo latin Yecu wek kitime kit macalo tye i Cik, 28Cimeon otinge ikore ci opwoyo Lubanga kun waco ni,

29“Koni dong icik latici, Rwot,

ocit ki kuc kit macalo yam iciko;

30pien wanga dong oneno lari,

31ma iyubu inyim rok ducu, 324

me bedo dero ma yabo mungi bot Lurok,

ki deyo bot joni Icrael.”

33Wone ki mine guuru lok ma kiwaco ikome. 34Cimeon olego gum ikomgi, kun waco bot mine Maliam ni, “Nen, latin man kiketo me reto ki me ilo jo Icrael mapol, ki me bedo lanyut ma kibilok marac ikome, 35dok pala lucwane bicobo cwinyi pil, wek tam ma i cwiny dano mapol oyabe kamaleng.”

36Yam tye lanebi mo ma dako, nyinge Ana, nya pa Panuel, pa jo Acer. Onongo dong otii tutwal. En yam obedo otyeko mwaka abiro keken bot cware cake ikare ma ki nyome. 37Inge to pa cware, en orii nio mwaka pyere aboro wiye angwen me dite kun en dato. En yam pe a ki i Ot pa Lubanga, obedo ka woro Lubanga kun rii kec dok lego dyewor ki dyeceng. 38En obino icawanu, ci opwoyo Lubanga, ka otito pi latinu bot dano ducu mayam kuru kare me koko jo Jerucalem.

Gudok cen i Najaret

395

Ka Yocepu gin ki Maliam dong gutyeko cobo lok ducu matye i cik pa Rwot, ci gudok i Galilaya, i taun madit gi i Najaret. 40Latin odongo odoko matek, kun opong ki ryeko; ci cwiny Lubanga obedo yom ikome.

Latin Yecu i Ot pa Lubanga

416

Lunyodo pa Yecu yam gicito i Jerucalem mwaka ki mwaka pi nino madit me Karama me Kato. 42Ka mwaka me dite oromo apar wiye aryo, ci gucito kunu kit macalo tye i cik me nino madito. 43Ka nino me karama dong otum, magidok paco, latin Yecu odong woko i Jerucalem. Lunyodone onongo pe gingeyo, 44ento gutamo ni en tye ikin lwak. Guwoto wot me nino acel, guyenye ikin lutugi ki ikin luwotgi; 45ka pe gunonge, ci gudok cen i Jerucalem ka yenye. 46Ka nino adek okato, ci gunonge i ot pa Lubanga; obedo ikin lupwonye, kun winyo pwonygi, dok penyogi. 47Dano ducu mayam guwinye guuru niange, ki kit ma en dok kwede i peny. 48Ka lunyodone gunene, guuru; mine openye ni, “Latina, pingo itimowa kit man? Nen woru ki an wabedo ka yenyi kun wakumu.” 49En ogamo dogi ni, “Wuyenya pingo? Pe wungeyo ni myerona me bedo i Ot pa Abana?” 50Ento pe guniang lok ma en oloko botgi. 51Ci en owoto kacel kwedgi, obino i Najaret, obedo kun winyogi; mine okano lok meno ducu i cwinye. 527

Yecu odongo kun mede i ryeko, dok bene mede ki nongo cwak, pwoc ki bot Lubanga wa ki bot dano bene.