Luka 9

Yecu ooro lupwonyene apar wiye aryo

(Mat 10:5-15; Mar 6:7-13)

1Yecu olwongo lupwonyene apar wiye aryo kacel, ci omiyo botgi tek ki twero ikom cen ducu, ki me cango two. 2Ci oorogi katito lok ikom ker pa Lubanga ki me cango lutwo. 31 Ci Yecu ocikogi ni, “Pe wuwot ki gin mo, kadi ki odoo, kadi opiru, kadi kwon, kadi lim, dok pe wubed ki kanyi aryo. 4Ot ma wubidonyo iye, wubed kunu, nio ka wubia, me cito woko ki itaun meno. 5Kama pe kijolowu iye, ka wua ki i taun meno, wuteng apwa tyenwu obed caden botgi.” 6Lukwena gua gucito ikin gang, ci gutito lok me Kwena Maber kun gicango lutwo bene ikabedo ducu.

Wi Kerode ocung woko

(Mat 14:1-12; Mar 6:14-29)

72

Ento ka Kerode rwot madit me Galilaya owinyo pi gin ducu ma obedo ka time, wiye ocung woko, pien jo mogo guwaco ni Jon Labatija aye ocer ki ikin jo ma oto. 8Jo mukene ni, Eliya aye dong onen, jo mukene ni, ngat acel ikin lunebi macon aye ocer. 9Kerode owaco ni, “Jon yam atongo wiye woko do; ento man anga ma dok awinyo lok macalo magi ikomeni?” Ci en obedo kayenyo yo me neno Yecu tutwal.

Yecu omiyo cam ki jo alip abic

(Mat 14:13-21; Mar 6:30-44; Jon 6:1-14)

10Ka lukwena gudwogo, ci gutite lok ducu ma gutiyo. Ci Yecu oterogi, ocito kwedgi i taun madit ma kilwongo Betecaida i mung. 11Ka lwak guwinyo, ci gulubu kore, en ojologi, ci otito botgi lok ikom ker pa Lubanga, ci ocango jo ma komgi lit. 12Ka piny dong mito yutu, ci Lukwenane apar wiye aryo gubino bote, guwace ni, “Cwal lwak gucit ikin gangi ki i paci ma orumu kany, wek guyeny kabutu, gunong cam; pien kany wan watye i dye tim.” 13Ento Yecu odok iye botgi ni, “Wun aye wumii botgi cam.” Ci gugamo ni, “Watye ki mugati abic ki rec aryo keken, nyo kece i mito ni wacit wawil cam pi lwak man ducu?” 14Pien onongo gimito romo co alip abic. Ci Yecu owaco ki lupwonyene ni, “Wumii dano gubed piny i dul, i dul acel acel dano obed pyere abic.” 15Gutimo kumeno, ci gumiyo dano ducu gubedo piny. 16Yecu okwanyo mugati abic ki rec aryonu, oneno malo i polo, ci olego iye gum, obaro iye, ci omiyo bot lupwonyene wek guket inyim lwak. 17Gin ducu gucamo guyeng. Kicoko ngide mudong oromo aduku apar wiye aryo.

Petero otucu lok ikom Yecu

(Mat 16:13-19; Mar 8:27-29)

18Inino mo acel ka Yecu onongo tye kalega kakene, kun lupwonyene bene tye kacel kwede, en openyogi ni, “Dano mono giwaco ni an anga?” 193 Gudok iye ni, “Jon Labatija, jo mukene giwaco ni Eliya, ki jo mukene ni ngat mo acel ikin lunebi macon aye dong ocer.” 204 Ci Yecu openyogi ni, “Wun kono wuwaco ni an anga?” Petero ogamo ni, “In i Kricito ma Lubanga oyero.”

Yecu otito pi to ne

(Mat 16:20-28; Mar 8:30—9:1)

21Ento Yecu ocikogi matek ni pe myero gutit lok man bot dano mo. 22Dok owaco ni, “Wod pa dano myero okany can madwong, dok ludongo ki ajwaki madito pa Lubanga ki Lupwonycik myero gukwere woko, ci guneke, ento myero kicere woko inino me adeke.” 235

Dok owaco bot dano ducu ni, “Ka dano mo mito lubu kora, myero okwong kwere kekene, ci oting yatariyane nino ducu, olub ki kora.” 246 Pien dano mamito laro kwone, birwenyone arwenya, ento dano ma rwenyo kwone pira, bilaro kwone. 25Pien kit mot ango ma dano mo binongo kace oloyo lobo ducu ento orwenyo nyo obalo kwone woko? 26Dano ma lewic make pira ki pi loka, Wod pa dano bene lewic bimake ikome, ikare ma en bidwogo ideyone ki deyo pa Lubanga Won kacel ki pa lumalaika maleng. 27Ento atito botwu ni, tye jo mogo ma gucung kany ma pe gibibilo to, ma pud peya guneno ker pa Lubanga.

Kom Yecu oloke mapat

(Mat 17:1-8; Mar 9:2-8)

287

Ka nino dong okato mamito romo aboro inge lok magi, Yecu otero Petero ki Jon ki Yakobo, oito kwedgi iwi got kalega. 29Ikare ma onongo en tye kalega, wange oloke mapat, ginarukane bene odoko matar maryeny lidangdang. 30Ci nen, jo aryo gubedo kalok kwede, jonu onongo gin aye Moses gin ki Eliya. 31Gin gunen kun gitye ki deyo, guloko pi a ne ki i lobo man, ma en myero ocob i Jerucalem. 32Petero ki jo matye kacel kwedgi onongo nino omako wanggi matek, ento ma guco woko ki iwang nino, guneno deyone ki jo aryo ma gucung kacel kwedeni. 33Ka jo aryonu mito a woko ki bote, ci Petero owaco ni, “Rwoda, bedo kany ber; wek wager bolo adek, acel meri, acel pa Moses, ki acel pa Eliya.” Petero onongo pe ngeyo gin ma en etye kaloko. 34Ikare ma onongo pud en tye kalok, pol obino, ci oumugi woko lipuk; ci lworo omakogi ka gudonyo i pol. 358 Dwon oa ki i polo ni, “Man aye Woda madong ayero; wuwinye.” 36Ka dwon man dong otyeko lok, ci gunongo Yecu odong kene. Lupwonyene guling alinga; ikare meno, pe gutito lok mo ikom gin ma guneno bot dano mo.

Yecu ocango awobi matye ki cen marac

(Mat 17:14-21; Mar 9:14-29)

37Orwune, madong gulor piny ki iwi got, lwak madwong gurwate kwede. 38Nen, laco acel ki ikin lwak odange ni, “Lapwony, abako doga boti, inen woda, pien anywalo en acel kene. 39Nen, cen bino ikome, ci miyo kok cut; ci ryeye woko weko jake matek, ci kelo bwoyo idoge, dok nyongo kome woko, ki bene pe a ki ikome oyotoyot. 40Abako doga bot lupwonyeni ni guryem woko, ento ryemone oloyogi.” 41Yecu odok iye ni, “Wun yalwak me kare man, pe wutye ki niye, kitwu pe atir dong obale woko. Abibedo kwedwu wa awene? Abidiyo cwinya pi kit kwowu nio wa awene? Kel wodi kany.” 42Ka awobini onongo tye kabino, cen orete woko piny, oryeye matek. Ento Yecu ogere iwi cen, ocango awobinu, ci odwoke bot wone. 43Dano ducu guuru dit pa Lubanga.

Yecu dok otito pi to ne

(Mat 17:22-23; Mar 9:30-32)

Ento ma pud gitye kauru gin ducu ma en otiyo, Yecu owaco bot lupwonyene ni, 44“Wuwek lok man odony i itwu; pien Wod pa dano kibimiye ite twero pa dano.” 45Ento lupwonyene pe guniang lok man; dok lok man okane woko ki botgi wek pe guniang iye; ci gulworo penye pi lok meno.

Anga maloyo ki dit?

(Mat 18:1-5; Mar 9:33-37)

469

Pyem yam dok ocake ikin gi, ni anga ma ikin gi ma rwome dit loyo. 47Ento ka Yecu ongeyo pyem matye i cwinygi, okwanyo latin matidi, omiye ocung ka ngete. 4810 Ci owaco botgi ni, “Dano ducu ma jolo latin man inyinga, nongo ojolo an, dano ducu ma jolo an, nongo ojolo ngat ma oora; pien ngat ma rwome tye tidi tutwal ikinwu ducu en aye obedo ngat rwome tye dit maloyo.”

Ngat ma pe lakworwu tye tung botwu

(Mar 9:38-40)

49Jon ogamo ni, “Rwoda, waneno ngat mo ma ryemo cen inyingi, wagenge, pien en onongo pe lubi kacel kwedwa.” 50Ento Yecu odok iye ni, “Pe wugenge, pien ngat ma pe lakworwu, nongo tye tung botwu.”

Lucamaria mogo gukwero jolo Yecu i ganggi

51Ka kare dong mito romo me tinge malo, Yecu omoko tame matek me cito i Jerucalem. 52En ooro lukwenane mogo gukwongo nyime; ci gucito, gudonyo i taun madit mo ma pa Lucamaria pi yube kabedo. 53Ento Lucamaria pe gujole, pien guniang ni en dong tye ma okeme me cito i Jerucalem aye pi woro Lubanga. 5411 Ka lupwonyene Yakobo ki Jon guneno, ci guwaco ni, “Rwot, i mito walwong mac oa ki i polo, otyekgi woko?” 55Ento Yecu oloke, ojukugi. [En owaco ni, “Pe wungeyo kit cwiny ma wutye kwede; 56pien Wod pa dano pe obino ka tyeko kwo pa dano, ento pi larogi.”] Ci Yecu ki lupwonyene dong gucito i gang mukene.

Jo ma onongo gimito lubu Yecu

(Mat 8:19-22)

57Ka gitye kawot i yoo, dano mo owace ni, “Abilubi kama icito iye ducu.” 58Yecu odoke iye ni, “Too tye ki boro, winyo me polo bene tye ki odigi, ento Wod pa dano pe tye ki kama myero opyel iye wiye.” 59En owaco bot dano mukene ni, “Luba.” Ento danonu ogamo ni, “Ladit, kong iwek acit ayik wora.” 60Yecu odoke iye ni, “Wek jo ma oto guyik jo ma oto wadigi; ento in icit, inya lok ikom ker pa Lubanga” 6112 Ngat mukene owaco ni, “Abilubi, ladit; ento kong iwek acit, acik jotuwa.” 62Yecu owace ni, “Pe tye dano mo ma mako kweri dyang, ka dok neno ngeye, ma biromo bedo ma opore pi tic maber i ker pa Lubanga.”