1 Luker

Buk mukwongo pa

LUKER

Lanyut wilok madito ma i buk man

Buk man mukwongo pa Luker kicoyo pi tito kit ma ker pa Luicrael obedo kakube kwede kun kubu tekwarogi kit malube ki coc ma ceng kicoyo i Buk pa Camuel. Dong buk man kitwero pokone i dul adek mapatpat: (1) Lok me acakine tito kit ma Solomon wod pa Daudi ocamo kwede ker macalo laloc me Icrael ki me Juda, ki to pa wone Daudi. (2) Me aryone tito pi loc pa Solomon kacel ki jami ducu ma en obedo ki kero me tiyo. Atikane en aye gedo Ot pa Lubanga madit ma nen mwonya tutwal i Jerucalem. (3) Me adeke tito kit ma ker me Icrael opoke kwede i dul aryo ma dongo; ker me tung kupiny (Juda), ki ker ma tung kumalo (Icrael), ki kit kwayi lok ikom jo ducu ma gubedo luloc kun gitelo lobo Icrael i yo me loc nio wa ikine ka mwaka alip acel ki miya abongwen nono ma pud peya kinywalo Yecu Kricito.

I buk pa Luker me acel ki Luker me aryo, laloc acel acel kingolo kop i wiye kun lubu kit ma en otiyo maber kwede bot Lubanga, ka bene kit tela maber ma en otiyo pi lobone ci man gire nen kun lube ki gin mabeco ma okati ki i tic meno. Woro cal jogi ki kwero bedo lawiny bot Rwot Lubanga ki tung cel kono kelo mere can malit. Ento luloc me Icrael i ker me tung kumalo pole gurweny woko ki inyim Rwot ite atema macalo man, kadi bed luloc me Juda gin ticgi gurubu aruba maber ki maracune bene.

Jo ma gingene pi ticgi matego dok mabeco bot lwak i buk man pa Luker me acel en aye obedo Lunebi pa Rwot, gin gubedo katito lok pa Rwot kun gijuku dano ni pe guwor cal apaya ka dok bene pe gujem ikom Lubangagi. Atikane dano macalo Eliya ki kit ma en oloyo kwede ajwaki pa Baal tye i coc me cura 18 me buk man.

Lacim wilok madito ma i buk man

Kit ma Daudi ogiko kwede loc mere i lobo Icrael

Solomon odoko laloc manyen i lobo Icrael

Kit ma loc pa Solomon obedo kwede

a. Acaki me loc pa Solomon

b. Gedo Ot pa Rwot otum

c. Kare me agiki me loc pa Solomon

Ker opoke iye aryo

a. Jemo pa lukaka me kumalo

b. Luloc me Juda ki Icrael

c. Lanebi Eliya

d. Rwot Akab me Icrael

e. Rwot Yekocapat me Juda ki Ajaria me Icrael