1 Luker 15

Loc pa Abijam rwot me Juda

(2 Tek 13:1—14:1)

1I mwaka me apar wiye aboro me loc pa Jeroboam wod pa Nebat en aye Abijam ocako loyo iye jo Juda. 2Ci obedo kaloc i Jerucalem pi mwaka adek. Nying mine Maaka ma nya pa Abcalom. 3En yam otimo kit bal ducu ma wone ma otelo nyime otiyo; en pe obedo ki lengic ikom Rwot Lubangane kit mayam kwarone Daudi obedo kwede. 41Kadi bed kumeno, Rwot Lubangane oweko mar mere obedo i Jerucalem pi Daudi, kun bene omiyo wode aye oleyo katyene, dok Rwot omiyo Jerucalem ocung matek ite gwok mere ki ikom lukwore. 52Rwot yam otiyo man ducu pien Daudi otimo gin manen atir i wange. En pe oweko lubu gin ducu mayam Rwot ociko ikare me kwone, ento oroco i lok kom Uria ma Lakit keken. 6Lweny ma ocake ikin Rekoboam ki Jeroboam omede o wa ikare me kwo pa Abijam ducu. 7Lok kom Abijam mudonge ducu, ki gin ma en otiyo ducu, kityeko coyone i Buk me Tekwaro pa Luker me Juda. Lweny obedo ikin Abijam ki Jeroboam. 8Abijam oto, oywe kacel ki kwarine, ci kiyike i gangkal pa Daudi. Wode Aca aye oleyo katyene.

Loc pa Aca rwot me Juda

(2 Tek 15:16—16:6)

9I mwaka me pyere aryo me loc pa Jeroboam rwot me Icrael en aye i mwakanu rwot Aca ocako loyo iye jo Juda. 10En obedo kaloc i Jerucalem pi mwaka pyere angwen wiye acel. Nying mine Maaka ma nya pa Abcalom. 11Aca otiyo gin manen atir iwang Rwot kit ma kwarone Daudi yam otiyoni. 12En oryemo co ki mon ma lutim kwele kama giworo iye jogigi ki i lobone, ka dok okwanyo cal jogi ducu mayam kwarine gutiyo. 13Aca okwanyo wa mine Maaka woko dok pe oyeni omede kibedo daker, pien onongo ikare meno Maaka omiyo ni ki tiine cal me kipyeda pi Acera ma jok ma dako; ci Aca otongo cal joke ongido woko, ci owango woko i laora kulu Kidron. 14Ento wang jogi ma iwi godi pe ki mukugi woko. Kadi bed kumeno, Aca obedo ki lagen ikom Rwot pi kare me kwone ducu. 15En okelo i Ot pa Rwot mot mayam wone odyero bot Lubanga, kacel ki mere kikome bene ma odyero, ryal ki jabu ki weergu.

Aca oribe ki Ben-adad

(2 Tek 16:1-14)

16Lweny obedo ikin Aca ki Baaca rwot me Icrael pi kare me kwogi ducu. 17Baaca rwot me Icrael otugu lweny ikom Juda, ci ogero gang me Rama, wek ogeng dano mo pe okat woko ki i lobo Juda nyo odonyo iye kun nongo oa ki bot Aca rwot me Juda. 18Aca okwanyo jami ducu me ryal ki me jabu ma onongo odong i ot kano lim pa Rwot Lubanga, ki jami ma i Ot kano lim ma mere en rwot, ci omiyogi i cing lutice, kun cwalogi kwede bot Ben-adad wod pa Tabrimmon, wod pa Kejion rwot me Ciria ma bedo i Damaciko, kun waco bote ni, 19“Wek waket gicike mo ikinwa an ki in, kit mayam obedo ikin kwara ki kwaru. Nen ba, an dong acwali ryal ki jabu me mot; ber icit itur gicikewu ki Baaca rwot me Icrael, wek en oa woko ki i lobona.” 20Ci Ben-adad owinyo dog rwot Aca, ocwalo ludito wi monye kalweny ikom taun madito pa jo Icrael, ci omayo Ijon, Dan, Abel-bet-maaka ki lobo Kinerot ducu, ki lobo pa jo Naputali ducu. 21Ka Baaca owinyo pire, ci obwoto gero Rama woko, odok obedo mere i Tirja. 22Rwot Aca olwongo jo Juda ducu ka dong ociko ni ngat mo pe odong, ci guyweko godi ki bao ma i Rama ducu, ma onongo Baaca obedo ka gero ki Rama ni; ci rwot Aca ocako gero kwede gang me Geba ma i lobo pa jo Benjamin, ki Mijpa.

23Lok kom Aca mudonge ducu, teke ducu ki gin ducu ma en ceng otiyo, ki taun ma ogerogi, kityeko coyone i Buk me Tekwaro pa Luker me Juda. Ento ikare me tiyone aye two mo omako tyene ikare meno. 24Aca oto, oywe kacel ki kwarine, ci kiyike kacel ki kwarine i gangkal pa kwarone Daudi. Yekocapat ma wode aye oleyo katyene.

Loc pa Nadab rwot me Icrael

25Nadab wod pa Jeroboam ocako loyo lobo Icrael ma kumalo i mwaka me aryo me loc pa Aca rwot me Juda, ci oloyogi pi mwaka aryo. 26En otiyo gin manen marac iwang Rwot, pien obedo kalubu kit pa wone, ki pi bale ma en omiyo jo Icrael bene gubaloni.

27Baaca wod pa Akija ma oa i dog ot pa Icakar opiro lok ikom Nadab, ci ocobe oneke woko i Gibeton ma gang pa jo Piliciti. Onongo Nadab ki jo Icrael ducu gurumu taun madito me Gibeton woko. 28Baaca oneko Nadab i mwaka me adek me loc pa Aca rwot me Juda, ci oleyo katyene. 293Ka dong otyeko doko rwot, ci oneko jo me dog ot pa Jeroboam woko ducu. Baaca pe dok oweko dano mo obwot ki ikin gi, nio ka orido wi jo ot pa Jeroboam woko liweng, kit mayam Rwot owaco ki i dog latice Akija lanebi me Cilo. 30Can meno opoto pi bal pa Jeroboam mayam obaloni, ma en omiyo jo Icrael bene gubalo, dok pien omiyo kiniga omako Rwot Lubanga pa Icrael.

31Lok kom Nadab mudonge ducu, ki gin ducu mayam en otiyo, kityeko coyone i Buk me Tekwaro pa Luker me Icrael. 32Lweny obedo ikin Aca ki Baaca rwot me Icrael pi kare me kwogi ducu.

Loc pa Baaca rwot me Icrael

33I mwaka me adek me loc pa Aca rwot me Juda en aye Baaca wod pa Akija ocako loyo iye jo Icrael ducu ki i Tirja, ci obedo kaloc pi mwaka pyere aryo wiye angwen. 34En otiyo gin manen marac iwang Rwot, pien obedo kalubu kit pa Jeroboam, ki bale ma en omiyo jo Icrael bene gubaloni.