1 Luker 16

1Ikare me loc pa Baaca Rwot Lubanga oloko bot latice Yeko wod pa Kanani ma okemo kom Baaca kun waco ni, 2“Ikare ma apilo wii aketo in i doko dit, ma kun akwanyo in ki i apwa ci aketo in ibedo latel wi jona jo Icrael, ci nen in i cako lubu kit pa Jeroboam, imiyo jona jo Icrael bene gudoko lubalo, omiyo kiniga omaka ikomgi pi balgi ducu. 3Nen ba, abiyweyi woko in Baaca ki jo me odi ducu liweng, dok abimiyo odi bedo calo ot pa Jeroboam wod pa Nebat. 4Danoni ducu ma gibito ki i taun madit, gwogi aye bimwodo komgi, ki dano ma gibito ki i dye tim ata, winyo aye bicamogi.”

5Lok kom Baaca mudonge ducu, ki gin ma en otiyo, ki teke, kityeko coyone i Buk me Tekwaro pa Luker me Icrael. 6Baaca oto, oywe kacel ki kwarine, ci kiyike i Tirja. Ela ma wode aye oleyo katyene.

7Lok pa Rwot ma ceng oloko bot lanebi Yeko wod pa Kanani ma okemo Baaca ki jo ma i ode obedo pi gin ma en otimo ma onen marac iwang Rwot. En omiyo kiniga omako Rwot ikome pi gin ma ceng otiyo marom ki kit tim pa Jeroboam, ki dok bene pien en oneko jo me ot pa Jeroboam woko ducu.

Loc pa rwot Ela me Icrael

8I mwaka me pyere aryo wiye abicel me loc pa Aca rwot me Juda en aye Ela wod pa Baaca ocako loyo iye jo Icrael ki i Tirja, ci obedo kaloc pi mwaka aryo. 9Ento latice Jimri, ma ladit maloyo nucu gadigadi lwenye, opiro lok ikome. Ikare ma Ela tye i Tirja en obedo kamat ci omer woko i ot pa Arja ma lalo jami ma i ode ma i Tirja. 10Ci Jimri odonyo i ot, ocobo Ela otugi neko woko cut, i mwaka me pyere aryo wiye abiro me loc pa Aca rwot me Juda, ci Jimri oleyo katyene.

11Cutcut ka Jimri ocako loyo lobo Icrael, oneko jo me ot pa Baaca woko liweng; pe oweko latin laco mo makwo ki i dogolagi, kadi wa lureme bene. 12Ci Jimri oneko jo me ot pa Baaca otyeko woko ducu kitmeno, kit ma Rwot yam owaco con ki i dog lanebi Yeko ma kemo lok kom Baaca, 13pi bal pa Baaca ducu ki pi bal pa Ela ma wode, ma gin gubalo ka dok gumiyo jo Icrael bene gubalo, omiyo kiniga omako Rwot Lubanga me Icrael. 14Lok kom Ela mudonge ducu, ki gin ducu ma en otiyo, kityeko coyone i Buk me Tekwaro pa Luker me Icrael.

Loc pa Jimri rwot me Icrael

15I mwaka me pyere aryo wiye abiro me loc pa Aca rwot me Juda en aye Jimri obedo kaloc i Tirja pi nino abiro. Onongo mony pa jo Icrael gutongo gonygi ma gikemo Gibeton ma taun madit pa jo Piliciti, 16ci lumony guwinyo ki i gonygi ni Jimri opiro lok, oneko rwot woko. En aye lok ma omiyo jo Icrael ducu guketo Omri ma ladit me mony aye odoko rwot maloyo Icrael inino meno ikare ma gitye i gony kunu. 17Omri oa woko ki i Gibeton ki jo Icrael ducu kacel kwede, ci guwoto gurumu taun madit me Tirja. 18Ka Jimri oneno ni mony dong omako taun madit woko, ci owoto i gogo me ot pa rwot, ka owango ot i wiye kene, ci oto iye. 19Jimri oto pi bale ma otiyo dok pi tiyo gin manen marac iwang Rwot kun lubu kit pa Jeroboam ki bale ma con omiyo jo Icrael gubaloni. 20Lok kom Jimri mudonge ducu, ki lok ma en opiro, kityeko coyone i Buk me Tekwaro pa Luker me Icrael.

Loc pa Omri rwot me Icrael

21Ikare meno onongo jo Icrael gupoke woko i dul aryo; nucu lwak tungcel aye gudok ikom Tibni wod pa Ginat pi keto en me bedo rwotgi, ki nucu tungcel gupoke gudok ikom Omri. 22Ento lwak ma gudok ikom Omri guloyo lwak ma gudok ikom Tibni wod pa Ginat; kitmeno Tibni oto woko, ci Omri odoko rwot. 23I mwaka me pyere adek wiye acel me loc pa Aca rwot me Juda en aye Omri ocako loyo iye jo Icrael, ci obedo kaloc pi mwaka apar wiye aryo, kun oloyo mwaka abicel i Tirja. 24Ci owilo got me Camaria ki bot Cemer ki lim ryal maromo talanta aryo, ka ogero iye taun gogo matek, ocako nyinge ni Camaria, macalo nying Cemer mayam obedo won got meno.

25Omri otiyo gin manen marac iwang Rwot, dok otiyo gin marac makato jo ma gutelo nyime ducu. 26En obedo kalubu kit pa Jeroboam wod pa Nebat ducu, ki bal ducu ma en omiyo jo Icrael gubalo, kun gumiyo kiniga omako Rwot Lubanga pa Icrael pi cal jogigi. 27Lok kom Omri mudonge ducu, ki gin ma en otiyo, ki teke ducu, kityeko coyone i Buk me Tekwaro pa Luker me Icrael. 28Omri oto, oywe kacel ki kwarine, ci kiyike i Camaria; Akab ma wode aye oleyo katyene.

Loc pa Akab rwot me Icrael

29I mwaka me pyere adek wiye aboro me loc pa Aca rwot me Juda en aye Akab wod pa Omri ocako loyo iye jo Icrael, ci obedo kaloc i Camaria pi mwaka pyere aryo wiye aryo. 30Akab wod pa Omri otiyo gin manen marac iwang Rwot makato rwodi ducu ma gutelo nyime. 31Dok macalo en otamo pire kene ni lubu kit bal pa Jeroboam wod pa Nebat obedo gin manok mo, omiyo en ocito i Cidon ci onyomo Jejebel ma nya pa Etibaal rwot pa jo Cidon, ka dok en bene ocito kunu ci oryebe inyime kun oworo jok Baal. 32Ka en ogero ot pi jok Baal i Camaria, ci ocano iye keno tyer. 33Akab ocibo cal jok ma dako ma kilwongo Acera, dok otiyo gin ma omiyo kiniga omako Rwot Lubanga pa Icrael makato luker me Icrael ducu ma gutelo nyime. 341I karene aye Kiel, dano me Betel, ogero iye Jeriko odoco. Abiram ma latin kayone okwongo to ci oketo gutine i wiye, ci wode matidine oto, ma nyinge Cegub, ka ki gero dog cel i wiye, macalo lok ma Rwot yam oloko ki i dog Yocwa wod pa Nun.