1 Luker 17

Eliya ojuku cwer pa kot

11

Ikare meno Eliya Laticbe, ma taun Ticbe ma i Gilead, owaco bot rwot Akab ni, “An akwongo i nying Rwot Lubanga pa Icrael matye makwoni, ma an acung inyime, i mwaka ma binoni toyo bibedo peke kadi wa kot bene, nio ka doga aye dok bilokone.” 2Ci Rwot Lubanga oloko bot Eliya ni, 3“A woko ki kany, i dok tung kunyango, i cit i kane inget laora kulu Kerit ma inget kulu Jordan tung kunyango. 4I bimato pii ma i kulunu, dok atyeko ciko winyo agak ma gibipiti ki kunu.” 5Eliya ocito kit ma Rwot oloko boteni, en ocito ci obedo inget laora kulu Kerit matye tung kunyango me kulu Jordan. 6Ci agak gumede kitero kwon ki ringogu bote i odiko, ka dok otyeno bene gumede ki tere kwon ki ringogu. En obedo kamato pii ma i kulu Kerit. 7Lacen pii ma i kuluni otwo woko, pien kot onongo dong pe tye kacwer i lobo.

Eliya ki dato me Jarepat

8Ci Rwot dok oloko lok man bot Eliya ni, 92“A malo, wek icit wa i Jarepat, macok ki Cidon, wek icit ibed kunu. Atyeko ciko dako mo kunu ma cware oto me miyo ki in cam.” 10Ci Eliya oa malo ocito i Jarepat. Ka en oo cok ki dog taun meno ci nen, dato mo tye obedo ka coko yen rido. Ci Eliya olwonge kun waco bote ni, “Alegi icit ikela pii mo i agwata wek amati.” 11Ka dakonu ocako wote me cito ka kele pii, ci dok olwonge kun wace ni, “Cit ikela kwon mo manok i cingi bene.” 12Ci dakonu ogamo doge kun waco ni, “Akwongo inying Rwot Lubangani matye makwoni, pe atye ki mugati mo. Ento atye ki moko ngano pong cing acel keken ma odong ite agulu moko kwon, ki moo tedo mo manok ite atabo moo. Atye ka coko rido yen mogo wek adok kwede ka wek acit ated pira ki pi woda, ka dong wacam ci wato.” 13Ento Eliya ogamo ni, “Pe ilwor, cit i tim kit ma iwaco ni; ento kong i teda mugati manok i kela, ka dok lacen icit ited piri ki pi wodi. 14Pien Rwot Lubanga pa Icrael owaco kuman ni, ‘Moko nganoni pe bitum woko ki i agulu moko kwon, ki mooni pe bitum woko i atabone, nio ka Rwot ocwalo kot ocwer i lobo.’” 15Dakonu ocito otedo kit ma Eliya owace ni, ci dakonu ki Eliya ki jo ma i ode ducu gubedo ka camone pi nino mapol, 16kun moko ngano pe tum ki i agulu moko kwon, moo bene pe orem i atabo, kit ma Rwot owaco ki i dog Eliya ni.

17Lacen ki inge lok man, latin pa dakonu two omako, ci twone omede ma lit mada, nio ka oto. 18Ci dakonu owaco bot Eliya ni, “I tima rac kuman pingo, in dano pa Lubanga? I bino bota ka poyo wiya i bala ma con, omiyo bala oneko woda woko do!” 19Ento Eliya owaco bot dakonu ni, “Miya wodi kany.” Ci otingo latin woko ki i kor mine, ocito kwede i kicika mamalo kama en butu iye, ci opyelo latin iwi kabutune kikome. 20Ka ocako kok bot Rwot ni, “Ai Rwot Lubangana, in aye dok i kelo can ikom dato ma abedo boteni pi neko wode?” 213Ci Eliya oryene ikom latin tyen adek, kun kok kwede bot Rwot ni, “Ai Rwot Lubangana, wek tipu kom latin man odwog cen ikome ba!” 22Ci Rwot owinyo koko pa Eliya, omiyo tipu kom latin odwogo cen ikome. 23Ci Eliya otingo latin ki i kicika mamalo, okele i ot ma piny bot mine, ka owaco ni, “Nen, wodi tye makwo ene.” 24Dakonu owaco bot Eliya ni, “Ai rwoda, kombedi dong angeyo atir ni in i dano pa Lubanga, dok lok pa Rwot ma iwaco ki dogi bene bedo me ada.”