1 Luker 18

Eliya odok onyute bot Akab

1I nge kare malac ka mwaka adek dong okato, ci Rwot Lubanga dok omiyo loke bot Eliya, kun owace ni, “Cit inyute kekeni bot Akab; ci itite ni Rwot owaco ni, ‘Nen dong abicwalo kot i lobo.’” 2Ci Eliya ocito kanyute bot Akab. I karenu onongo kec dong odoko tek i Camaria. 3Akab olwongo Obadia ma ladit maloyo jami ma i ode. (Onongo Obadia obedo dano ma woro Rwot matek tutwal. 4Ikare mayam Jejebel tye kaneko lunebi pa Rwot, Obadia otero lunebi miya acel kulu, okanogi woko i boro, kun en opoko kin gi pyere abic pyere abic, ci opitogi ki cam ka omiyo ki gin pii bene.) 5Akab owaco bot Obadia ni, “Wot icit i dye lobo ducu kama wang it me pii tye iye, wa i nota kulu ducu; gwok nyo wabinongo iye lum wek walar aguragura ki kana gubed makwo, wek leewa mogo pe guto woko.” 6Ci gin gucako poko lobo ikin gi kama ngat acel acel biwot cito iye. Ci Akab ocito mere tungcel en kene, ki Obadia bene odok tungcel en kene.

7Ikare ma Obadia tye kawot i yoo ci nen, Eliya otuc, orwate kwede. Obadia otugi ngeye woko cut, ci opoto piny aryeba cwiny kun waco ni, “Man aye in kikomi Eliya, rwoda?” 8Ci Eliya ogamo doge ni, “Eyo, man an kikoma. Ento cit itit bot rwodi ni Eliya tye kany.” 9Ci Obadia ogamo loke ni, “An abalo kit bal ango boti, rwoda? Pingo imito miya i cing Akab wek oneka? 10Akwongo kwong inying Rwot Lubangani matye makwoni, pe tye rok mo nyo ker mo ma rwoda Akab pe ocwalo iye dano kayenyo in. Ka gudwoko lok ni, ‘Eliya pe tye kany,’ en kong miyo ladit me rok meno nyo me ker meno kwongo kwong ma nyutu ni pe gunongi kunu. 11Ci in dok iwaco ni, ‘Wot icit bot rwodi icitite ni Eliya tye kany?’ 12Ka ki i ngeya ma nongo dong acito woko, ce Cwiny pa Rwot otingi woko ci oteri kama pe angeyo kono? Pieno, ka acito atito bot Akab, kace pe kinongo komi, ci en bineka woko, kadi bed abedo ka woro dog Rwot cake ka tinona. 13Peya kitito boti ce, rwoda, gin ma abedo katiyone ikare ma Jejebel tye kaneko lunebi pa Rwot? Yam akano lunebi pa Rwot miya acel kulu i boro, kun apoko kin gi pyere abic pyere abic, ci abedo ka miyogi cam ki pii bene. 14Ka in dok iwaco ni, ‘Wot itit bot rwodi ni Eliya tye kany,’ man miyo en bineka woko.” 15Eliya ogamo lok pa Obadia ni, “Akwongo kwong ki nying Rwot me mony matye makwoni, ma an acung inyime, ni abinyutu koma bote tin atina inyime.”

16Ci Obadia ocito karwate ki Akab, ka otite lok meno, ci Akab oa ocito karwate ki Eliya. 17Ka Akab oneno kom Eliya, ci owaco bote ni, “Man en in kikomi, in ma lakel ayela i Icrael tutwali!” 18Ci Eliya ogamo doge ni, “An aye pe layel Icrael; in aye itye kayelone, in ki jo me dogola pa woru, pien wun wubwoto lubu Cik pa Rwot woko, dok wutye ka woro Baal. 19Kombedi in dong icwal kwena wek icok jo Icrael ducu inyima iwi got Karmel. Cok ki lunebi pa jok Baal bene miya angwen ki pyere abic, ki lunebi miya angwen pa Acera ma jok ma dakoni ma gicamo cam iwi meja pa Jejebel.”

Eliya opyem ki lunebi pa Baal iwi got Karmel

20Akab ocwalo kwena bot jo Icrael ducu, ki bene en ocoko lunebi pa Baal ducu iwi got Karmel. 21Ka Eliya ocito cok bot lwak ci owaco botgi lok man ni, “Wun mono wubicabe atata i cwinywu nio kwede wa awene? Kace Rwot aye Lubanga, ci wulub en keken; ento ka Baal, ci wutugi lubu en cut.” Ento lwak pe gudoke iye lok mo. 22Eliya dok owaco bot lwak ni, “An kena aye pud adong ki ikom lunebi pa Rwot, kun lunebi pa Baal gitye miya angwen ki pyere abic kulu. 23Wek kikel twoni aryo botwa kany. Wek lunebi pa Baal guyer twon acel obed meggi, wek gunek, gungid woko, ci gucan ringone iwi yen ma iwi keno tyer, ento pe gumok iye mac mo. Ki an bene abiyubu twon acel, ci abicano ringone iwi yen ma i keno tyer, ento pe abimoko iye mac mo. 24Ci wun wuleg bot lubangawu, ki an bene abilego bot Rwot Lubangana; ci lubanga ma bidok iye ki cwalo mac, en aye Lubanga ada.” Lwak ducu gugamo ni. “I loko mamit.” 25Eliya dok owaco bot lunebi pa Baal ni, “Wun wuyer twonwu acel wek wucak yubune; wun aye wukwong, pien wupol, ento pe wumok iye mac mo.” 26Ci lunebi pa Baal gukwanyo twon ma kimiyogini, guyubu, gulego Baal, cake odiko nio kwede wa i cwiny dyeceng, kun giwaco ni, “Ai Baal, dokiwa iye do ya!” Ento dwon mo pe ma winye, ki ngat mo ma dok ki gin iye bene peke. Gubedo kamyel ma girumu kwede keno tyer ma gucanoni. 27Ci Eliya ocako cayogi i dyeceng kun waco ni, “Wudange matek, pien en aye lubanga. Gwok nyo iye pud tye kalwodo lok, nyo pud ocito woko, nyo pud tye i dog wote mo ba, nyo pud onino, ci myero kong wucoye woko ki iwang ninone.” 28Ka dok gudange matek, kun gingolo komgi keken gi ki pala lucwan ki aterogu macalo kitgi tye kwede; gungole nio ka remo komgi ocako cwer kun mol. 29Gubedo kadange matek dyeceng benebene kun gilego Baal nio wa i cawa me tyero gityer me otyeno, ento piny oling tik; ngat ma dok iye botgi peke, ki ngat ma paro pirgi bene peke.

30Lacen Eliya owaco bot lwak ducu ni, “Wubin dong bota cok kany,” ci lwak ducu gucito bote cok. En ocako yubu keno tyer pa Rwot mayam kimuku kireto woko pinyi. 311Ci Okwanyo godi apar wiye aryo muporo wel kaka pa awobe pa Yakobo mayam Rwot oloko bote kun waco ni, “Nyingi bibedo Icrael.” 32Eliya ocano keno tyer ki godi meno pi woro nying Rwot. Ka dok okwinyo bur orumu nget keno tyer, ma tute romo tero pii lita apar wiye angwen. 33Ka otyeko cano yen kikore, ci ongido ringo twon, ocano iwi yen. Ka dok en owaco ni, “Dong wutwom pii maromo abino angwen, ka wuony piine iwi gitum awanga, ki ikom yen gu bene.” 34Ka dok owaco ni, “Dok wumed onyo iye pii”; ci gunwoyo onyo pii tyen me aryone. Dok owaco ni, “Wumed tyen me adeke”; ci gumedo tyen me adeke. 35Ci pii obedo ka mol kun rumu keno tyer, opongo i bur woko liweng.

36Ka cawa me tyero gityer me otyeno dong oromo, lanebi Eliya onyiko cok ikom keno tyer, ci olego kit man ni, “Ai Rwot, Lubanga pa Abraim, pa Icaka ki pa Icrael, wek tin dong ongene atir ni in aye Lubanga pa Icrael, dok ni an abedo latici, ci atiyo man ducu pi lok ma ceng iwaco bota. 37Doka iye, ai Rwot, doka iye, wek lwak man gunge atir ni in Rwot aye in Lubanga keni, dok ni ityeko dwoko cwinygi ikomi.” 38Ci Rwot ocwalo mac oa ki bote obino opoto piny, ci owango gitum awanga woko ducu liweng, ki yen gu bene liweng, ki godigu, ki daba, ka dok onango pii woko ma onongo opongo i buri. 39Ka lwak ducu guneno man, ci gupoto woko piny aryeba cwiny, kun giwaco ni, “Rwot aye Lubanga; Rwot aye Lubanga!”

40Eliya dok owaco lok man bot lwak ni, “Wumak lunebi pa Baal ducu, pe wuwek mo obwot.” Kimakogi woko ducu, ci Eliya oterogi piny i laora kulu Kicon, kama onekogi woko ki kunu.

Eliya olego pi kot

41Eliya owaco bot Akab ni, “Cit dong kacam ki kamat, pien dwon kot ma mito cwer dong mor winye.” 422Akab oa ocito woko kacam ki kamat, ento Eliya oito malo iwi got Karmel, ka en olego kun okulu wiye piny i ngom ma orwako wiye ikin conge. 43Ka owaco bot latice ni, “Cit inen tung nam.” Ka ocito woko oneno, ci owace ni, “Gin mo pud peke.” Eliya dok owace ni, “Cit dok odoco, ci en owire tyen abiro.” 44Ikom tyen me abirone latice owaco ni, “Aneno latin pol mo otinge ki i nam, tidi rom ki cing dano keken.” Ci Eliya dok owaco ni, “Cit bot Akab, wek iwace ni, ‘Yub gadigadi i dok gang wek kot pe ogengi wot.’” 45Polo ocako cido woko ki pol oyotoyot tutwal, kun yamo kodo matek, ci kot ocako cwer madwong. Ci Akab oito iwi gadigadine ci odok i Jejreel. 46Ento Rwot onongo otingo Eliya ki tek me cinge, omiyo otweyo pyere ci oringo kwede inyim Akab nio kwede wa i dog gang me Jejreel.