1 Luker 19

Eliya oringo woko i Koreb

1Akab otito bot dakone Jejebel gin ducu ma Eliya otimo, ki bene kit ma en oneko kwede lunebi pa jok Baal ducu ki pala lucwan. 2Ci Jejebel ocwalo lakwenane bot Eliya kun wace ni, “Ka diki cawa ma kit man oromo ma pud peya nongo aneko in woko, kit ma i neko kwede lunebina wokoni, ci lubangana ma aworogini myero guket can ikoma kitmeno ki makato bene.” 3Ci lworo omako Eliya woko, omiyo en oringo olaro kwone, ocito i Beer-ceba ma i lobo Juda, kama oweko latice iye kunu. 41

Ento en oa ocito kene i tim, owoto wot me nino acel kulu. Ka oo kunu ci en obedo ite yat laywe mo, kama en olego iye Rwot ni, “Dong oromo, ai Rwot, tin dong i kwany kwona woko; pien an pe aber akato kwarina ducu.” 5Ci en obutu mere woko piny ci otugi nino woko ite yat laywe meno. Ci nen, lamalaika pa Rwot ogudu kome, dok owaco bote ni, “Eliya, a malo wek i cam.” 6Ka oa oneno piny, ci oneno capat ma kitedo ikom got ma lyet, ki pii i abino matye ka wiye. Ci ocako camone ka dong omato pii, ci dok obutu piny. 7Ci Lamalaika pa Rwot dok odwogo bote tyen me aryone; ci ogudu kome kun dok owace ni, “Eliya, a malo wek icam, ka dong imat pii, pien nen woti pud dit mada.” 8Ci Eliya oa malo, ocamo ka dok omato pii, ci olimo tek ma oa i cam meno omiyo omede ki wot pi nino pyere angwen dyeceng ki dyewor ci oo kwede wa i Koreb ma got pa Lubangani.

9Ka oo kunu, ci odonyo i boro mo, obedo iye. Ci Rwot obino bote kun penye ni “I timo gin ango kany, Eliya?” 102Ci Eliya ogamo doge ni, “Nyeko obedo kamaka mada pi Rwot, ma Lubanga me mony; pien jo Icrael gubwoto gicikeni woko, dok gumuku keno tyeri woko ducu, dok guneko lunebini woko ki pala lucwangu. An aye dong adong kena, dok bene gimito neka woko.” 11Ka dok Rwot owaco bote ni, “Wot i cit anyim, wek icung iwi got inyim Rwot.” Ci nen, Rwot okato kangete kun yamo madwong mager tye kabaro godi, dok ongido lela matinotino inyim Rwot; ento Rwot onongo pe i yamonu. Ki inge yamo, oyengyeng obino, ento onongo Rwot pe tye i oyengyeng meno. 12Ki inge oyengyeng mac obino, ento Rwot onongo pe tye i mac. Ki inge mac, dwon ma tidi mo obino. 13Ka Eliya owinyo, ci oumu wange woko ki bongone, ci ocito kwede ocung i dog boro. Ci Nen, dwon oloko bote kun waco ni, “I timo gin ango kany, Eliya?” 14Ci Eliya ogamo ni, “Nyeko aye obedo kamaka mada pi Rwot Lubanga me mony; pien jo Icrael gubwoto gicikeni woko, kun bene dok gumuku keno tyeri woko ducu, guneko lunebini ki pala Iucwangu, ci an aye dong adong kena, dok bene kimito neka woko.” 153 Ci Rwot owace ni, “Wot i dok cen kun i lubu yoo ma cito i tim me Damaciko. Ka io kunu, ci i biwiro Kajael wek obed rwot me Ciria. 164Ka dok i biwiro Yeko wod pa Nimci obed rwot me Icrael; ka dok Elica wod pa Capat me Abel-mekola ibiwiro me bedo lanebi ma bileyo kakari. 17Dong dano ma bibwot ki i pala lucwan pa Kajael, Yeko binekone; dok dano ma bibwot ki i pala lucwan pa Yeko, Elica binekone. 185Ento abibwoto dano alip abiro i lobo Icrael, jo ducu ma peya gurumu conggi inyim jok Baal, ma doggi bene pe gunoto lem cal Baal pi nyutu worogi bote.”

Lubanga olwongo Elica

19Ka Eliya oa woko ki kunu, ci ocito onongo Elica wod pa Capat. Elica onongo tye kapur ki kweri dyang apar wiye aryo ma guryeyo inyime, ma twoni pur kiywayogi ki aryoaryo; en kikome aye tye ki me apar wiye aryone. Eliya okato ki kangete, ci obolo bongone ikome. 20Ci Elica otugi weko twonine woko, ocako ngwec i kor Eliya kun waco ni, “Wek kong acit acik wora ki maa, ka dong adwogo ka alub kori.” Eliya ogamo doge ni, “Dok giri cen do, an kono atimo kit gin ango ikomi?” 21Ci Elica oweko lubu kor Eliya, odok cen, ogonyo twonine aryo onekogi woko, ka otedo ringogi ki rii ngutgi ma ka yen, opoko bot dano ma gitye kunu, ci gucamo. Ka dong oa ocito kalubu kor Eliya, ci en ocako konye macalo latice.