1 Luker 20

Akab oloyo jo Ciria

1Ben-adad ma rwot pa jo Ciria ocoko monye ducu, ogurugi kacel, ma kun luker pyere adek wiye aryo bene gitye kwede, ki lwak aguragura ki gadigadi lwenygu. En otero monye orumu Camaria woko ka ocako lweny ikome. 2Ci ocwalo lukwenane i taun madit bot Akab rwot me Icrael ka wace ni, “Ben-adad owaco kuman ni, 3‘Ryali ki jabuni ducu mera; ki monni ma gibeconi ki lutinoni bene ducu mera.’” 4Ci rwot me Icrael ogamo ni, “Ai rwot Ben-adad, in i rwoda, an a danoni, kacel ki jami ma atye kwedgi ducu meri.” 5Lacen lukwenane gudok bot Akab tyen me aryone, kun giwaco ni, “Ben-adad owaco kuman ni, ‘Yam acwalo lok kun awaco ni imiya ryal ki jabuni, ki monni ki lutinoni. 6Dong diki adika ikin ka cawa man abicwalo lutica boti, gibiyenyo i odi ki i odi pa lutici, ci gibimako gin ducu mayomo cwinygi ma gitye me wel, ci gibiyakone, gibiterone woko.’”

7I nge lok man rwot Akab me Icrael olwongo ludongo me lobone ducu, ka owaco botgi ni, “Kong wunen kit ma dano man tye kayenyo kwede kolo. En ceng ocwalo loke bota ni amiye monna ki lutinona, ki ryal ki jabugu, ci peya akwere iye lok mo.” 8Ludongo ducu ki lwak ducu gugamo doge ni, “Pe itam gin mo ikom lokenu, pe iye bene.” 9Ma omiyo rwot owaco bot lukwena pa Ben-adad ni, “Wun wucit wuwac bot rwoda rwot ni, ‘Gin ma ikwongo mitone ki bota abimiyone ducu, ento man aye pe atwero ye.’” Ci lukwena gudok ka tero loke. 10Ben-adad cut ocwalo lok bot Akab kuman ni, “Abiloko Camaria doko apwa, ento apwane pe biromo lwak danona ma abibino kwedgi, ma wek ngat acel acel ojob pong cinge odwog kwede. Ka pe atimo kumeno, ci lubanga pa kwariwa myero guket can ikoma kitmeno ki makato bene.” 11Ci rwot me Icrael ogamo doge ni, “Dano ma pud tye katweyo jami lweny i pyere me cito kalweny peya wake marom ki dano ma dong obilunyu jamine ma en dong otyeko lwenye woko.” 12Ka Ben-adad owinyo lok man kun tye kamato kongone ki luker ma gitye kagony i bolone, ci owaco bot lwake ni, “Dong wucak rye i tyeng i kabedowu,” ci gurye i tyeng i kabedogi pi lweny ikom taun madit me Camaria.

13I cawa meno lanebi mo obino bot Akab rwot me Icrael ci owaco bote ni, “Rwot Lubanga owaco kuman ni, ‘In dong ityeko neno lwak man madwongi? Pe ilwor pien tin abimiyogi i cingi, miyo ibingeyo atir ni An a Rwot.’” 14Ci Akab ogamo doge ni. “En bitic ki jo mene?” Ci lanebi ogamo ni, “Rwot owaco kuman ni, en bitic ki awobe ma gikonyo lulo dul lobo acel acel.” Ka Akab dok omede ki peny ni, “Anga ma bicako lweny?” Ci lanebi ogamo ni, “In.” 15Ci Akab olwongo awobe ma gikonyo lulo dul lobo mapatpat; onongo giromo miya aryo ki pyere adek wiye aryo. Ka dok oryeyo jo Icrael ducu i ngegi, ma giromo dano alip abiro.

16Lwak gumol gukato woko ki i dyeceng, kun Ben-adad tye mere kamato kongo ma omer ki kongo i bolo bedone, en kacel ki luker pyere adek wiye aryonu ma gucoke kakonyeni. 17Lukony pa ludito ma giloyo dul lobo ducu gin aye gukwongo kato woko. Ben-adad ocwalo lurot piny ci nen gudwoko lok ni, “Lwak dano gitye kamol gikato woko ki i Camaria.” 18Ci rwot ogamo doggi ni, “Kace gubino pi yubu lok me kuc, ci wumakgi amaka makwo; kadi bed gubino kalweny bene wumakgi makwo.”

19Lukony pa ludito ma giloyo dul lobo gumol woko ducu ki i taun madit, ci lwak mony gulubu korgi. 20Dano acel acel oneko dano mukemo nyime. Ci jo Ciria gucako ringo woko, kun jo Icrael giryemo korgi; ento Ben-adad rwot me Ciria obwot mere, pien oringo woko ki aguragura kacel ki wegi aguragura mogo. 21Ci rwot me Icrael okato woko, omako lwak aguragura ki gadigadi lweny mapol, kun neko jo Ciria ki nek madit tutwal.

22Ka lanebi dok obino bot rwot Akab me Icrael ci owaco bote ni, “Ber imed monyi obed matek, kun nongo bene itamo maber pi gin ma myero i tim ikare meno, pien jo Ciria dok gibidwogo cen i dog oro kacako lweny ikomi.”

Jo Ciria gudwogo kalweny ki jo Icrael

23Lutic pa rwot me Ciria guwaco bote ni, “Jo man lubangagi lubanga me wi godi, omiyo gin yam gubedo tek, ci guloyowa; ento wek kong dok walweny kwedgi ki i dye bar, ci wan aye wabibedo tek makatogi. 24Wamiyi ryeko kit man: kwany luker ducu woko ki i katicgi, wek iket ludito maloyo mony ma kakagi. 25Dok iywa mony mukene marom ki mony ma dong kityekogi wokoni. Cok aguragura ki gadigadi lweny ma welgi rom ki macon ca, ci wek dong walweny ki jo Icrael i dye bar, ci wabibedo tek makatogi.” En owinyo doggi, ci otiyo kit ma guwaconi.

26Ci Ben-adad ocoko mony pa jo Ciria i dog oro, ci gutiro i Apek pi lweny ki jo Icrael. 27Jo Icrael bene guyube woko ki camgi ci gucito guryeyo monygi pi lweny ikom jo Ciria. Jo Icrael gugony inyim lumerokgi ma ginen calo dul dyegi manok ma kipokogi i dul aryo keken, ento jo Ciria gupongo bar woko liweng. 28Dano pa Lubanga dok obino ci owaco bot rwot Akab me Icrael ni, “Rwot dok owaco kuman ni, ‘Pien jo Ciria gubedo kawaconi, Rwot en lubanga me godi, pe lubanga me notagu,’ en aye lok ma omiyo abimiyo monygi maditi woko i cingi kun ibiloyogi, ci in i bingeyo atir ni an aye a Rwot.” 29Mony aryonu ducu gugony gukeme ki mony pa lumerokgi pi nino abiro kulu, ci lweny ocake inino me abirone. Ci jo Icrael guneko mony pa jo Ciria ma giwoto ki tyen gi maromo alip miya acel kulu ikom nino acelu. 30Jo mudonge guringo gularo taun madit ma i Apek, ci cel ma orumu taun madit dok opoto ikom jo mapol ma gudonge ma giromo alip pyere aryo wiye abiro.

Ben-adad bene oringo ki kunu, odonyo wa i kicika ma i tyelo ot mo matye i taun madit meno. 31I nge lok man ma otime lutice guwace ni, “Nen ba, watyeko winyone ni luker ma i ot ker me Icrael gin ducu lukica. Wek kong waruk bongo cola i pyerwa ki latolgu ma watweyo iwiwa wacit kwede bot rwot me lobo Icrael, ci gwok nyo en pe bineki.” 32Ci gutweyo pyergi ki bongo cola, ki tol iwigi ducu, ci gucito kwede bot rwot me Icrael, ka guwaco bote ni, “Latici Ben-adad owaco ni, e bako doge boti ber i weke makwo, pe dong i neke.” Ci rwot me Icrael ogamo doggi ni, “En pud tye makwo bo? En tye calo omera.” 33Onongo jonu gitye kayenyo lanyut mo ma weko giniang kit ma pinye tye kwede. Ka guwinyo nying man ni, “omera”, ci gugamo oyotoyot ni, “Eyo, omeru Ben-adad.” Akab dok owaco ni, “Wucit wukele.” Ben-adad obino bote, ci rwot Akab otinge i gadigadine.

34Ci Ben-adad owaco bote ni nen, “Taun mayam wora oyakogi ki bot woru abidwokogi ducu i cingi: ka dok in bene i twero bedo ki ot cato wil i Damaciko kit mayam wora obedo kwede i Camaria.” Akab ogamo ni, “Abibwoti i cito pi lok man ma i cikoni.” Kitmeno oketo gicike kwede, ci obwote ocito.

Lanebi mo ojuku Akab

35Laco mo ma ikin lwak pa lunebi owaco bot lawote ni, “Amito kong igoya malit,” kun Rwot aye onongo ociko en kumeno. Ento lawote okwero goye. 361Ka dok owace ni, “In pe i woro lok dog Rwot. Pimeno, nen ba, kace i bia ki bota kombedi, labwor mo bineki woko cut.” Ka dano meno oa woko ki bote, ci labwor mo orwate kwede, ci okaye oneke woko cut. 37Ci Lanebi acelu dok onongo dano mukene, ci owaco bote ni, “Amito ni kong i goya malit,” ci laco meno otugi goye cut, ogoye ma oketo ret ikome bene. 38Lanebinu ocito, obedo kakuru rwot Akab inget yoo, kun oloko kit makome nen kwede pi umu wange woko ki kitambara ma otweyo i ye. 39Ka rwot tye kakato en woko, ci en odange bote kun waco ni, “An latici acito i mony, ci adonyo wa idyere kama lweny tye malyet iye. Ci nen, acikari mo odwogo ki dano mo ma okelo bota ci ocika ni, ‘Gwoka dano man. Kace iweko orwenyo woko pi tyen lok mo, ci in aye i bito ma kakare, nyo i biculu pire ki talanta acel me ryal.’ 40Kitmeno, pien onongo abedo ki longe mapol, ladit, omiyo danonu olwi ocito gire woko.” Ci rwot me Icrael owace ni, “Kibingoli kop kitmeno; in kikomi aye ityeko ngolone.” 41Ka danonu okwanyo kitambara woko oyotoyot ki i wange, ci rwot otugi ngeyone cut ni en ngat acel ikin lunebi. 42Danonu ma oboyo wangeni owaco bot rwot ni, “Rwot Lubanga owaco kuman ni, pien in ityeko bwoto dano ma onongo an aciko ni myero kinek woko, pieno kibineko in me kakare, kibineko lwaki bene ma ka lwake.” 43Ci rwot me Icrael odok gang, oo i Camaria ki toncwiny ma wange bene obale woko.