1 Luker 21

Akab omayo poto olok pa Nabot

1Nabot me Jejreel ceng tye ki poto oloke i Jejreel inget cel pa Akab ma rwot me Camaria. 2Inino mo acel, Akab openyo Nabot ni, “Ber i miya poto oloki obed mera, wek apit iye pot deka, pien tye cok ki oda; ci abimiyi poto olok mukene me kakare, maber makato meno, nyo kace imito bene abiculu wele ki lim.” 3Ento Nabot ogamo dog Akab ni, “Pe twere man obedo ginaleyana ma alimo; dong Rwot Lubanga pe twero ye ni amii lobo pa kwariwa woko boti.” 4Ci Akab odok i ode ki kiniga ma wange obale woko pi lok ma Nabot me Jejreel owaco boteni; pien Nabot onongo odok iye bote ni pe ebimiyo lobo ma eleyo ki bot kwarine. Ci rwot Akab ocito obutu piny iwi kitandane kun oloko wange neno woko, kun pe ocamo wa cam mo bene.

5Ento ka dakone Jejebel obino bote, ci openye ni, “Cwinyi ton pi tyen lok ango ma ogengi wa cam woko ni?” 6Ci Akab otite ni, “Pien nakanen aloko ki Nabot me Jejreel kun apenye ni omiya poto oloke wek awil ki lim, nyo kono ka en mito ci abimiye poto olok mukene me kakare. Ci en okwero woko, owaco ni pe ebimiya poto oloke.” 7Ci dakone Jejebel ogamo ni, “Pe in aye i loyo Icrael kombedi bo? A malo i cam, wek cwinyi obed mayom. An aye dong abimiyi poto olok pa Nabot me Jejreel.”

8Ci Jejebel ocoyo waraga ki nying Akab, ma omwono woko kun odiyo agit pa Akab ikom odok; ci ocwalo waraga man bot jo ma ludongo ki ludito mukene ma gibedo ki Nabot i taun madit me Jejreel. 9Waragane onongo kicoyo kit man ni, “Wucik pi kare me rii kec, ci wucib Nabot obed iwi kom me dito ikin lwak. 10Ka dong wukel lutim aranyi aryo gucung kunu kun gikemo nyime atir, ci wek gukel kop ikome kun gin waco ni, ‘In i ceno Lubanga ki rwot.’ Ka dong wutere woko, ci wucele ki got wuneke woko.” 11Ci jonu ma i dog taun madit meno, ludongo ki lutela mukene ma gibedo i taun maditi, gutimo kit ma Jejebel ocwalo kwede lok botgi. 12Guciko kare me rii kec, ka guketo Nabot iwi kom me dito ikin lwak. 13Ci lubwami aryo gubino gucung gukemo nyime. Gukelo kop ikom Nabot ki inyim lwak ducu kun giwaco ni, “Nabot oceno Lubanga ki rwot Akab bene.” Ka gutere woko inge taun madit, ci gucele ki got guneke woko. 14Ka gucwalo kwena bot Jejebel pi tite ni, “Nabot dong kityeko celone woko ki got; dok bene oto.”

15Ka Jejebel owinyo ni Nabot dong kicelo woko ki got kineko woko, ci owaco bot Akab ni, “A malo, icam poto olok pa Nabot me Jejreel, mayam okwero miyone boti wek iwil ki limi; kombedi Nabot dong peke, en dong oto woko.” 16Ka Akab owinyo ni Nabot dong oto woko, ci en oa malo ocito i poto olok pa Nabot i Jejreel kacamone woko cut.

17Ci Rwot Lubanga oloko ki Eliya ma Laticbe ma waco ni, 18“A malo, icit irwate ki Akab rwot me Icrael matye i Camaria. Nen, en kombedi tye i poto olok pa Nabot. 191Ibiwaco bote ni Rwot Lubanga owaco kuman ni, ‘Ineko dano woko ka dok icamo wa poto ne bene?’ Dok ibiwace ni, ‘I kabedo kama gwogi gunango i ye remo pa Nabot, en aye in bene gwogi binango i ye remoni.’”

20Akab owaco bot Eliya ni, “Man dong i nonga woko do, in ma lamerokani?” Eliya ogamo ni, “An dong anongi, pien in aye imiyo komi kekeni pi tiyo gin manen marac iwang Rwot. 21Nen, abikelo can ikomi; abityeko in ki luoti ma co woko liweng, abineko jo ducu woko matye bot in Akab, kacel ki opiini wa ki anywali matye bot in i lobo Icrael. 22Abimiyo odi bedo calo ot pa Jeroboam wod pa Nebat, marom bene ki ot pa Baaca wod pa Akija, pi kiniga ma imiyo omaka, dok pien imiyo jo Icrael gubalo. 232Dok Rwot owaco lok ikom Jejebel bene kit man ni, ‘Gwogi aye bimwodo kom Jejebel woko ki i lobo ma inget Jejreel.’ 24Dano ma wat pa Akab ma oto i gang, gwogi aye bimwodo komgi, ento dano ma gibito i dye tim ata, winyo aye bicamogi.”

25(Pe tye dano mo mayam omiyo kome kekene pi tiyo gin manen marac iwang Rwot macalo Akab, ma dakone Jejebel odiye i ye ki tek. 26En otimo bal me kipyeda marac tutwal pi lubu kor jogigu, macalo jo Amor yam gutimo, ma Rwot oryemogi woko ki inyim jo Icrael.)

27Ka Akab owinyo lok meno, ci oyeco bongine woko, oruku bongo cola cut ikome, obedo kawot ma kun cwinye odem woko.

28Lok pa Rwot dok obino bot Eliya ma Laticbe ma waco bote ni, 29“In mono ineno kit ma Akab obedo kwede ka mwole inyima? Pien en dong omwole kene inyima, pe abikelo can i karene kikome; ento ikare pa wode aye abikelo can ikom jo me ode.”