1 Luker 22

Lanebi Mikaya ociko Akab i nying Lubanga

(2 Tek 18:2-27)

1Jo Ciria ki jo Icrael gubedo mot labongo lweny mo ikin gi pi mwaka maromo adek. 2Ento i mwaka me adeke Yekocapat rwot me Juda ocito kalimo rwot me Icrael. 3Ci rwot Akab me Icrael owaco lok man bot lutice ni, “Wun mono tika wungeyo ni Ramot-gilead mewa? Wan waling woko ata, pingo pe dong kong wacitu wek wamayu woko ki i cing rwot me Ciria?” 4Ka dok oloke openyo Yekocapat ni, “In mono bene ibicito kwedwa kalweny ikom gang me Ramot-gilead?” Ci Yekocapat ogamo dog Akab ma en rwot me Icrael kun wace ni, “An ki in wan acel. Lwaka aye lwaki, ki aguragurana aye aguragurani bene.”

5Ka dok Yekocapat owaco bot rwot me Icrael ni, “Kong i kwong penyo lok ki bot Rwot wek wawiny doge.” 6Ka rwot Akab ocoko lwak lunebi ducu kacel ma gin gucoke onongo tye romo miya angwen. Ci owaco botgi ni, “Acit kalweny ikom Ramot-gilead, nyo pe?” Lunebinu gugamo ni, “Tugi cito cut rwot, pien Rwot Lubanga obimiyo i cingi.” 7Ento Yekocapat dok owaco ni, “Lanebi mo mukene pa Rwot Lubanga peke kany? Wek kong dok wapeny doge?” 8Ci rwot me Icrael ogamo dog Yekocapat ni, “Pud tye dano mo acel ma omyero wapenye wek wawiny dog Rwot ki bote, en aye Mikaya wod pa Imla; ento cwinya dage matek, pien peya otita kit lok mo maber, en tiko tita lok marace keken.” Ka Yekocapat ocako ogamo doge ni, “Pe kumeno, rwot, wek lok kitmeno obedi.” 9Ci rwot me Icrael olwongo ladit mo ci owaco bote ni, “Cit i kel Mikaya wod pa Imla oyotoyot.” 10Ci en obino onongo Akab rwot me Icrael ki Yekocapat rwot me Juda gubedo iwi komkergi ma guruku jor kergi mabeco; gubedo kwede i laro moyo me dino ngano ma inget dogcel ma ki donyo kwede i Camaria, kun lunebi ducu gitye katito ki tucu lok inyimgi. 11Jedekia wod pa Kenaana oyubu cal tung lee ki nyonyo ci owaco ni, “Rwot owaco kuman ni, in i bitwomo jo Ciria kit man macalo dyang twomo wadi ki tunge, nio ka i tyekogi woko ducu.” 12Lunebinu ducu ma gitye gutito lok ma kite acelu kumeno kun giwaco ni, “Tugi cito i Ramot-gilead rwot pien i biloyo; Rwot bimiyo i cingi.”

13Lakwena ma ocito kalwongo Mikaya ni obino ci owace ni, “Nen ba, Mikaya, lok pa lunebi magi ducu obedo me cuku cwiny rwot; pieno wek loki bene obed marom ki meggi, loki bene obed lok me cuku cwiny.” 14Ci Mikaya ogamo doge ni, “Akwongo kwong inying Rwot matye makwoni, ni gin ducu ma Rwot owaca, en aye abilokone.” 15Ka Mikaya oo bot rwot, ci rwot openye ni, “Wacit kalweny ikom Ramot-gilead, nyo pe?” Ci Mikaya ogamo ni, “Tugi cito cut, ci ibiloyo; Rwot bimiyo i cingi, rwot.” 16Ento rwot Akab dok owaco bote ni, “An mono abiciki i nying Lubanga tyen adi ni i loka lok me ada keken i nying Rwot?” 171Ci Mikaya ocako waco ni, “Aneno jo Icrael ducu guket woko lijayi iwi godi, macalo romi ma gipeke ki lakwat mo. Dok Rwot bene owaco ni, ‘Joni laditgi peke; wek ngat acel acel odok gire i pacone ki kuc.’”

18Ci rwot Akab me Icrael ocako waco bot Yekocapat ni, “An pe onongo con awaco ki ni, Mikaya pe bitito lok mo maber ma otika, ento bitito marace?” 192

Ci Mikaya ogamo doge ni, “Pimeno kong dong iwiny lok ma Rwot dok tye kamede ki titone mono. An Mikaya, abedo kaneno Rwot ka tye ma obedo iwi komkere, kun lwak mony me polo ducu gucung kangete tung bade ma lacuc ki tung bade ma lacam. 20Ci Rwot owaco ni. ‘Anga mono ma bibito Akab, wek ocit oto i Ramot-gilead?’ Ci lumalaika me polo gubedo kun giwaco lok mapatpat. 21Ka lacen kit cwiny mo obino, okati anyim ci ocung inyim Rwot kun waco ni, ‘An aye abibito en.’ 22Rwot openye ni, ‘Ibibito en ningning?’ Ci cwiny meno ogamo ni, ‘Abicito ci abibedo cwiny ma lagoba kun aloko ki i dog lunebine ducu.’ Ci Rwot ogamo ni ‘In ibibito en, ci en biye loki. Dong icit i tim kumeno.’ 23Kombedi dong otyeko nen kamaleng ni Rwot dong otyeko keto cwiny ma lagoba i dog lunebini magi ducu; dok Rwot bene dong otyeko ciko pi kelo gin marac ikomi.”

24Ci Jedekia wod pa Kenaana ocito bot Mikaya cok, ci otugi dongo leme, ci owace ni, “Cwiny Rwot dok oa ki ikoma ningning ka okobo oloko boti?” 25Mikaya owace ni, “Meno i biniang iye inino ma i bidonyo i kicika ma i tyelo wek ikane iye.” 26Ci Rwot Akab me Icrael dok owaco ni, “Wumak Mikaya woko, wudwoke cen bot Amon ma laloyo me taun madit, ki bot Yoaci ma wod pa rwot. 27Kun icit iwac botgi ni, ‘rwot Akab owaco kuman ni, wuket dano man i buc, dok wumiye ocam cam me buc, mugati ki pii keken, nio ka abidwogo paco ki kuc.’”

28Ci Mikaya ogamo loke ni, “Kace i dwogo paco ki kuc, ci pe Rwot aye oloko ki idoga.” Dok owaco bot lwak ni, “Wun rok ducu dong wuwiny lok man ma atitoni maber!”

To pa Akab rwot me Icrael

(2 Tek 18:28-34)

29Kitmeno rwot Akab me Icrael ki Yekocapat rwot me Juda gucito i Ramot-gilead. 30Ka lacen rwot me Icrael owaco bot Yekocapat ni, “An abiruke macalo dano mo ata ka dong acito kalweny, ento in i ruk jori me ker.” Ci rwot Akab me Icrael oruke macalo dano mo ata, ka ocito kwede i dog lweny. 31Ikare meno onongo dong rwot me Ciria otyeko ciko ludito mony pyere adek wiye aryo ma giloyo gadigadine me lweny ni, “Pe wulweny ki dano mo matidi nyo madit, kono rwot me Icrael keken.” 32Ka ludito mony guneno Yekocapat, guwaco ni, “Meno aye rwot me Icrael kikome.” Ci guloke kalweny ikome, ci Yekocapat ocako dange ki mwoc. 33Ka ludito mony me gadigadi lweny guniang ni pe en rwot me Icrael, ci guloke gudok woko cen gubwoto lubu kore. 34Ento dano mo otelo atume ocelo ata, ci ocelo kwede rwot me Icrael atura. Atero obaro kin nyonyo me gengo kore ki nyonyo mukene me gengo kome ma obedo macalo pok rec. Ka rwot owaco bot laryem gadigadine ni, “Loke wadok cen wek ikwanya woko ki iwang lweny, pien ret otyeko maka woko.” 35Lweny omede odoko malyet ada inino meno, dok lutic pa Akab gubedo kajengo kome i gadigadine kun wange okemo jo Ciria nio wa otyeno, ka oto. Remo me wang rete omol piny ite gadigadi. 36Ikare ma ceng dong cok poto, dano gucako dange kun dwon gi oromo dye mony ducu ni, “Dano acel acel odok i taun madite. Dano acel acel odok wa i lobone!”

37Rwot Akab oto kitmeno, ci kitero kome i Camaria, ci kiyiko kunu. 38Gulwoko kom gadigadine i kut me Camaria, kama lukwele gilwoke i ye, ci gwogi gunango remone, kit ma Rwot con owaconi. 39Lok kom Akab mudonge ducu, ki gin ducu ma en otiyo, ki ot ma en ogero ma odeyo ki lak lyec, ki lwak taun madito ducu ma en ogero, kityeko coyone i Buk me Tekwaro pa Luker me Icrael. 40Kitmeno Akab oto, oywe kacel ki kwarine. Wode Akajia aye oleyo katyene.

Loc pa Yekocapat rwot me Juda

(2 Tek 20:31—21:1)

41Yekocapat wod pa Aca ocako loyo jo Juda i mwaka me angwen me loc pa Akab rwot me Icrael. 42Yekocapat ocamo ker ma onongo mwaka me dite romo pyere adek wiye abic, ci obedo kaloc i Jerucalem pi mwaka pyere aryo wiye abic. Nying mine Ajuba ma nya pa Cilki. 43Yekocapat obedo kalubu kit pa wone Aca ducu; pe oloke oweko lubu kore. En obedo katiyo gin manen atir iwang Rwot. Ento wang jogi ma iwi godi pe kimukugi woko; dano pud gubedo ka tyero gitumgi iwang jogi, dok gubedo kawango iye odok eceta. 44Yekocapat oketo kuc bene ikin en ki rwot me Icrael.

45Lok kom Yekocapat mudonge ducu, ki teke, ki kit ma olwenyo kwede kityeko coyone i Buk me Tekwaro pa Luker me Juda. 46Co wa ki mon ma lutim tim kwele iwang jogi mayam pud odong ikare pa wone Aca, en ojwayo ticgi woko ki i lobone.

47Ikare ca onongo rwot pe i Edom. Lawang rwot me Juda aye obedo macalo rwotgi.

48Yekocapat omiyo kipayo lwak mel ma dongo me cito i Opir pi omo jabugu; ento pe gucito, pien mel ducu gutur woko ki i Ejion-geber. 49Lacen Akajia wod pa Akab owaco bot Yekocapat ni, “Wek lutica gucit kacel ki lutici i meli,” ento Yekocapat okwero meno gire woko.

50Yekocapat oto, oywe kacel ki kwarine, ci kiyike kacel ki kwarine i gangkal pa Daudi. Wode Jekoram aye oleyo katyene.

Loc pa Akajia rwot me Icrael

51Akajia wod pa Akab ocako loyo jo Icrael ki i Camaria i mwaka me apar wiye abiro me loc pa Yekocapat rwot me Juda, ci obedo kaloyo jo Icrael pi mwaka aryo. 52En obedo katiyo gin manen marac iwang Rwot, kun bedo kalubu kit pa wone ki kit pa minne, ki kit pa Jeroboam wod pa Nebat, mayam omiyo jo Icrael gubalo. 53En bene obedo ka woro jok Baal, kun bene tiyo bote, dok man omiyo kiniga omako Rwot Lubanga me Icrael malube ki kit tic ducu mayam wone otiyo kwede.