2 Luker 1

Eliya gin ki rwot Akajia

1Ikare ma Akab oto, jo Moab gucako jemo woko ikom Icrael.

2Inino mo acel, Akajia opoto piny ki iwang dirica ki i kicikane mamalo ma i Camaria, ci owane matek adada; omiyo ocwalo lukwena, kun waco botgi ni, “Wucit wupeny dog Baal-jebub, lubanga pa jo Ekron, kace abicang ki i ret man.” 3Ento lamalaika pa Rwot owaco ki Eliya ma Laticbe ni, “A malo, wek icit irom ki lukwena pa rwot Akajia me Camaria ci iwac botgi ni, ‘Wutimo kuman ni Lubanga mo pe i Icrael, ma omiyo wucito ka penyo dog Baal-jebub, ma lubanga pa jo Ekron?’ 4Wac bot rwot Akijia ni Rwot owaco ni, ‘In pe dong ibicang ki ikom ret ma inongoni, ento i bito woko ada.’” Ci Eliya oa ocito orwate ki lukwena pa Akijia kit ma Rwot owaco.

5Lukwena gudok bot rwot, ci en openyogi ni, “Pingo wudwogo cen?” 6Ci gugamo ni, “Dano mo oromo kwedwa i yoo, ci owaco botwa ni, ‘Wudok cen bot rwot ma oorowuni, wek wucit wuwac bote ni, Rwot Lubanga owaco kuman ni, onongo i tamoni pien Lubanga mo pe i Icrael, omiyo i cwalo ni ki peny dog Baal-jebub, ma lubanga pa jo Ekron? Pi kit tim man, omiyo in pe i bicang ki ikom retini, ento i bito woko ada.’” 7Ci rwot openyogi ni, “Dano ma orwate kwedwuni ci oloko botwu lok magi ducuni obedo ningning?” 81 Ci gugamo ni, “En oruku ginaruka ma obedo yeryer, kun otweyo pyere ki del.” Ci ogamo ni, “Meno en Eliya Laticbe.”

9Ci rwot ocwalo ladit me mony maloyo jo pyere abic kacel ki jone pyere abic. En onongo Eliya obedo malo iwi got, ci owaco bote ni, “Ai dano pa Lubanga, rwot owaco ni, ‘I lor piny.’” 102Ento Eliya ogamo dog ladit me mony maloyo jo pyere abici ni, “Ka an aye a dano pa Lubanga ada, wek mac oa ki malo i polo owang in woko kacel ki joni pyere abici ducu.” Ci mac oa ki malo i polo owango en ki jone pyere abici woko ducu.

11Ci rwot Akijia dok ocwalo ladit me mony mukene maloyo jo pyere abic kacel ki jone pyere abic bot Eliya. Guwaco bote dok ni, “Ai dano pa Lubanga, man aye cik pa rwot ni, ‘Ilor piny oyotoyot.’” 12Ento Eliya odok iye ki gin ni, “Kace an a dano pa Lubanga, wek mac oa ki malo i polo opot ikomwu owangwu woko ducu, in kacel ki joni pyere abici ducu.” Ci mac pa Lubanga oa ki malo i polo owango en ki jone pyere abici ducu.

13Ka rwot Akijia owinyo ci ocwalo ladit me mony me adeke maloyo dano pyere abic, kacel ki jone pyere abic dok aye. Ci ladit me adeke maloyo jo pyere abic ocito. Ka oo, ci opoto orumu conge piny inyim Eliya, obako doge bote ni, “Ai dano pa Lubanga, alegi ni, pe i neka kacel ki jona pyere abici, wek kica omaki ikomwa do! 14Pien nen, mac oa ki i polo ci obino piny, owango ludito mony aryo mukwongoni kacel ki jo gi ma giloyoni ducu; ento in iwek pi kwena man obed tek boti.” 15Ci lamalaika pa Rwot owaco bot Eliya ni, “Lworo pe omaki ikome, Lor piny i cit kwede.” Omiyo Eliya oa owoto kacel kwede me cito bot rwot, 16ci owaco bote ni, “Rwot owaco kuman ni, ‘Pien icwalo lukwena ka penyo dog Baal-jebub, lubanga pa jo Ekron, calo onongo Lubanga pe i Icrael, omiyo pe ibicang ki ikom ret ma inongoni, ento in ibito woko ada.’”

17Akajia oto ada kit macalo Rwot oloko ki i dog Eliyani, Jekoram ma omine aye odoko rwot ma oleyo katyene, i mwaka me aryo me loc pa Tekoram wod pa Yekocapat, rwot me Juda, pien onongo Akajia pe tye ki wode mo. 18Lok kom Akajia mudonge ducu, ma en otiyo, kityeko coyone i Buk me Tekwaro pa Luker me Icrael.