2 Luker 2

Kitero Eliya i polo

1Ikare ma Rwot dong mito tero Eliya woko i polo ki lapiru, onongo Eliya ki Elica gitye i wotgi nia ki i Gilgal. 2Eliya owaco bot Elica ni, “Alegi ni kong ibed kany; pien Rwot otyeko cwala woko wa i Betel.” Ento Elica ogamo ni, “Akwongo kwong ki nying Rwot makwoni, dok akwongo bene ki nying in kikomi ma itye makwoni, ni an pe abibwoti.” Kitmeno gucako wot me cito i Betel. 3Lwak lunebi mayam gitye i Betel gucito bot Elica ci guwace ni, “In mono ingeyo ni tin Rwot bikwanyo rwodi ki boti ci tere woko?” Ci Elica ogamo ni, “An angeyo loke; dong wuling mot.”

4Ci Eliya owaco bote ni, “Elica, alegi ni kong ibed kany, pien Rwot otyeko cwala woko wa i Jeriko.” Elica ogamo ni, “Akwongo kwong ki nying Rwot matye makwoni, dok akwongo bene ki nying in kikomi ma i tye makwoni, ni an pe abibwoti.” Kitmeno gubino wa i Jeriko. 5Lwak lunebi ma gitye i Jeriko gubino bot Elica cok, ci guwaco bote ni, “In mono ingeyo ni tin Rwot bikwanyo rwodi ki boti ci tere woko?” Elica ogamo ni. “An angeyo loke; dong wuling mot.”

6Eliya dok owaco bote ni, “Alegi ni kong ibed kany; pien Rwot ocwala wa i Jordan.” En ogamo ni, “Akwongo kwong ki nying Rwot matye makwoni, dok akwongo bene ki nying in kikomi ma i tye makwoni, ni an pe abibwoti.” Kitmeno gin aryo ducu gumede kiwot kacel. 7Lwak lunebi pyere abic bene guwoto kacel kwedgi, ci gucung ki cen kamabor ki gin, ka pud gin aryo ducu gucung i dog Jordan. 8Ci Eliya okwanyo bongone ki ikome, ci odolo woko, ka ogoyo ki pii, ci pii iye opoke woko aryo tungi ki tungi nio ka gin aryo ducu gukato ki i ngom mutwo. 91

Ka gutyeko ngolo loka tungcel, ci Eliya owaco bot Elica ni, “Lega gin ma imito ni atim piri, ma peya kikwanya woko ki boti.” Ci Elica owaco ni, “Alegi, imiya ale kit cwinyini me tiyo tic nebi ma dodo merini tyen aryo.” 10Ci Eliya ogamo ni, “Ilego gin matek; ento kace ineno ka kitinga nia ki boti, ci bibedo boti kit ma ilegoni; ento kace pe inena, ci pe bibedo kitmeno.” 11Ka onongo pud giwoto kun giloko, ci nen, gadigadi me mac ki aguragura opoko kin gin aryoni woko, ci Eliya ocako cito woko malo i polo ki lapiru madit adada. 12Ka Elica oneno ci okok ni, “Wora, wora do! Lacungudwar matek pa jo Icrael!” Ci Elica pe dok omedo ki neno kom Eliya.

Ci pi kumu madwong, Elica omako bongo ma ikome oyeco woko i dul aryo. 13Ka okwanyo bongo pa Eliya ma opoto piny ma oa ki ikomeni, odok kwede cen ci ocung i dog Jordan. 14Ci ogoyo pii ki bongo pa Eliya ma opoto ki ikomeni, kun waco ni, “Rwot Lubanga ma otiyo ki Eliya mono bitic kweda bene?” Ci ma ogoyo pii, ci nen pii iye opoke aryo tungi ki tungi; ci Elica owoto idyere, ongolo loka kulu.

15Ka lwak lunebi ma onongo gitye i Jeriko guneno en okato loka tung botgi, ci guwaco ni, “Cwiny mayam tye ikom Eliya dong otyeko poto ikom Elica.” Ci gubino karomo kwede, ci gukulu wigi piny inyime. 16Ci ngat acel ki ikin gi owaco bote ni, “Nen, wan lutici watye jo matego pyere abic. Walego ni i cwalwa wek wacit kayenyo rwodi; gwok nyo Cwiny pa Rwot otinge ci obole woko wa iwi got nyo i notagu.”

Ento Elica ogamo ni, “Pe kumeno, wun pe omyero wucit.”

17Ento gubedo kadido lok bote ni en owek gicit kayenyo Eliya, ci owaco botgi ni, “Wucit.” Ci jo pyere abici gucito gubedo kayenyo Eliya pi nino adek ci pe gunongo kome. 18Ka gudwogo bot Elica ci gunongo en pud tye i Jeriko, ci owaco botgi ni, “An nene pe awaco botwu ni pe wucit?”

Tango ma Elica otiyo

19Jo ma gin lutela i taun meno gubino ci guwaco bot Elica ni, “Nen ba, taun man tye i kabedo maber ma yomo cwiny, kit ma in laditwa inenoni, ento piine aye rac, ki lobone bene miyo i mon poto woko.” 20Ci en owaco botgi ni, “Wukela awalkwon manyen, ci wuony iye kado.” Ka gukelo awalkwon bote, 21ci ocito wa iwang pii, oonyo iye kadonu kun waco ni, “Rwot owaco kuman ni, ‘An dong atyeko kwanyo kwir ma iwang pii man woko; pe dong bikelo to, dok pe bene bimiyo i mon poto.’” 22Kitmeno pii odoko maleng nio wa onyo, kit macalo yam Elica olokoni.

23Lacen Elica oa me cito i Betel, ci ikare ma en tye kawot i wangayo, lutino awobe mogo gua ki i taun gubino gucako nyware, kun giwaco ni, “A woko ki kany in lawiye otal, a woko ki kany in lawiye otal.” 24Elica oloke onenogi, ci ocenogi i nying Rwot. Ci nguu ma mon aryo gukati ki i bunga ci gukilo kom awobe pyere angwen wiye aryoni woko. 25Elica oa ki kunu ci ocito wa i got Karmel, ka lacen odok i Camaria.