2 Luker 3

Lweny ikin jo Icrael ki jo Moab

1I mwaka me apar wiye aboro me ker pa Yekocapat rwot me Juda, en aye Jekoram wod pa Akab ocamo iye ker me loyo Icrael i Camaria, ci obedo kaloc pi mwaka apar wiye aryo. 2En otiyo gin manen marac inyim Rwot, kadi pe obedo marom ki pa wone ki pa mine, pien en omuku wir me woro Baal mayam wone otiyoni woko. 3Ento en bene obedo katimo kit bal ma Jeroboam wod pa Nebat obedo katimoni, me tero jo Icrael i bal; dok pe omedo ki giko timo bal.

Elica otito pi loyo jo Moab

4Meca rwot me Moab yam tye ki romi ma gunya mapol ata; dok en onongo miyo romi alip miya acel, ki yer nyogi romi alip miya acel, mwaka ki mwaka bot rwot me Icrael me nyutu worone ki mar mere ikome pien kere onongo tye ite loc pa rwot me Icrael. 5Ento inge to pa Akab, rwot me Moab ojemo woko ikom rwot me Icrael. 6Omiyo rwot Jekoram oa woko cut ki i Camaria ikare meno, ci ocoko jo Icrael ducu pi lweny. 7Ci ocwalo lok bot Yekocapat rwot me Juda ni, “Rwot me Moab ojemo woko ikoma; ibicito kalweny kweda ikom jo Moab?” Ci Yekocapat ogamo ni, “Abicito, wan acel, lwaka gin aye lwaki, ki aguragurana aye aguragurani bene.” 8Dok en openyo ni, “Wabiwot walubu yoo mene?”

Jekoram ogamo ni, “Wabilubu yoo ma kemo i tim me Edom.”

9Kitmeno rwot me Icrael ocako cito kacel ki rwot me Juda kacel ki rwot me Edom. Ka gubedo kagono piny pi wot me nino abiro, pii mo pe ononge pi mony kadi pi lee ma gimol i korgi ki yec. 10Omiyo rwot me Icrael okok ni, “Maa do! Rwot Lubanga dong nen calo okelo wan luker adeki ducu pi miyowa i cing jo Moab.” 11Ci Yekocapat openyo ni, “Lanebi pa Lubanga mo pe kany, wek wapeny dog Rwot ki bote?”

Ci ngat acel ikom lutic pa rwot me Icrael ogamo ni, “Elica wod pa Capat aye tye kany, en mayam onongo miyo kony bot Eliyani.”

12Yekocapat owaco botgi ni, “En tye ki lok pa Rwot.” Ci rwot me Icrael ki Yekocapat ki rwot me Edom gucito wa bot Elica.

13Elica owaco bot rwot me Icrael ni, “Gin mo peke ma atwero timo piri. In i cit bot lunebi pa woru ki lunebi pa meni.” Ento rwot me Icrael ogamo ni, “Pe kumeno; pien Rwot aye olwongowa wan luker adeki ducu pi miyowa woko i cing jo Moab.” 14Ci Elica ogamo ni, “Akwongo kwong ki nying Rwot me mony matye makwoni, ma atiyo pireni, ni kono nene pe aparo pi Yekocapat rwot me Juda, kono pe aparo piri matwal. 15Ento kong dong wukela lago opuk.” Ka lago opuk ocako goyone, ci tek pa Rwot oyido ikome. 16Ci owaco ni, “Rwot owaco kuman ni, ‘Abimiyo laora kulu man mutwoni bipong ki pii i iye.’ 17Pien Rwot owaco kuman ni, ‘Wun pe wubineno yamo ki kotgu, ento laora kulu aye pii bipong iye, ci wubimato, wun kacel ki dyangiwu ki leewu.’ 18Man gin mayot ki bot Rwot; en bimiyo jo Moab bene i cingwu, 19ci wubiloyo taun ducu ma kirumu ki cel gogo, ki ma ngene, dok bene wubireto yadi mabeco ducu, wubiculu wang piigi woko ducu, wubibalo lobo maberi kun wucoro iye godi.”

20Orwone i odiko, i cawa me tyero gitum kikome, nen pii obino oa ki tung Edom, nio ka pii opongo lobo woko ducu.

21Ka jo Moab ducu guwinyo ni luker gubino kalweny ikomgi, ci gulwongo jo ducu ma gitwero lweny, cake ikom jo matino nio kwede wa ikom ludito, ci gurye iwang lobo. 22Ka gua malo odiko con, ci ceng oryeny ocaro pii, omiyo jo Moab guneno pii ma okemogi nen calo remo. 23Ci guwaco ni, “Man remo do! Luker adeki ki lumonygi gubedo kalweny ikin gi keken gi ci guneke woko do! Eyo wun jo Moab, wacitu kayako jami pa jonu!”

24Ento ka gubino i gony pa jo Icrael, ci jo Icrael ducu gutware malo kalweny ikom jo Moab, ci guringo woko ki inyimgi. Ci jo Icrael gumede ki lubu korgi kun ginekogi ikare ma giringoni. 25Jo Icrael bene gumako taun gi ci gubalo woko, ki poti mabeco ducu bene dano acel acel obolo iye got, nio ka godi opongo potigi. Guculu wang piigi woko ducu, dok gutongo yadi mabeco bene ducu; nio ka godi keken aye odong i Kir-karecet, ci lucel latangdingo gurumu taun meno nio ka guloyo. 26Ka rwot me Moab oneno ni mony dong ogeto marac ikome ci ocito ki wegi pala lucwan miya abiro wek ekem ki ngwec e bar dye mony pa Icrael atir wek elwi woko bot rwot me Edom, ci pe gutwero. 27Ci omako wode madite ma onongo bileyo katyene, ci otyero en me bedo gitum awanga bot Kemoc lubanga pa jo Moab. Omiyo lworo madit opoto ikom jo Icrael; ci gua gudok cen i lobogi.