2 Luker 4

Elica okonyo dako ma lacan ma cware oto

1Ikare meno dako mo acel ma ikin mon pa lunebi ocito okok bot Elica ni, “Cwara ma latici oto woko; in bene ingeyo ni latici yam lworo Rwot, ento won banya obino kamako lutino awobena aryo wek gubed opiine.” 2Ci Elica ogamo ni, “Imito ni atimi gin ango? Waca, gin ango ma itye kwede i odi?” Ci dakonu ogamo ni, “Pe atye ki gin mo i ot ladit, kono nyo adomo moo matidi mo aye tye.”

3Ci Elica owaco bote ni, “Cit ileg agulu mapol ma igi nono ki bot luwoti ducu wek ikelgi. 4Ka in ki lutino awobeni wudony i ot, ci ilor dogola iceg wiwu woko i ot, ka iony moo i lwak agulu meno ducu; kace acel acel opong, ci iket ocung cen.”

5Ci dakonu ocito ci oloro dogola, ocego wiye ki wi lutino awobene aryonu; ka en tye kaonyo moo i igi ci gin gikelo agulu mukene bote. 6Ka agulu ducu opong woko, ci owaco bot wode ni, “Kel agulu mukene.” Ci ogamo ni, “Mukene dong peke.” Ci moo otugi gik woko ma pe dok mol. 7En odok cen bot Elica katito bote gin ma otime, ci en ogamo ni, “Cit i cat moonu wek icul banyani woko, wek in ki lutino awobeni wukonye ki mudonge.”

Elica ki dako ma lalonyo me Cunem

8Inino mo acel Elica ocito wa i Cunem kama dako mo ma lalonyo bedo iye; ci dakonu olege ni ocam bote. Lacen ikare ducu ma en wok ki kenyo, en onongo ngak kong camo kunu. 9Dakonu owaco bot cware ni, “Nen ba, atyeko niang ada ni dano man ma limowa kany kare ki kareni en dano maleng pa Lubanga. 10Wek wager latin kicika mo iwi ot goropa kany, ci waket iye kitanda mo pire ki meja, kom, ki mac tara, wek ka en bino botwa, ci bedo iye.”

11Inino mo acel, Elica ocito kunu ci odonyo malo i kicikane kayweyo. 12Ci owaco bot latice Gekaji ni, “Cit ilwong dako ma Lacunem wek obin bota.” Ka obino, 13ci Elica owaco ki Gekaji ni, “Wac bot dakonu ni, Nen, in dong i yele pirwa mada ka gwokowa; dong gin ango ma imitoni myero atim piri? In itye ki lok mo ma imito atit bot rwot nyo ladit maloyo mony?”

En ogamo ni, “An atye gira maber dok abedo ikin lutuwa, dong pe tye gin mo ma abimito ki botwu.”

14Ci Elica openyo Gekaji ni, “Dong gin ango ma atwero timo pire?” Ci Gekaji ogamo ni, “En pe tye ki wode mo, ki cware bene dong otii woko.”

15Ci Elica owaco bot Gekaji ni, “Lwonge wek obin kany.” Ka obino, ci ocung i dogola. 161Ci Elica owaco bote ni, “I mwaka mabino ikare onyo, ibitingo wodi ikori.” Ci dakonu ogamo ni, “Pe kumeno rwoda, pe i bwol angecani ba. In i dano pa Lubanga!” 17Ento dakonu ogamo ic, ci onywalo wode ikare meno kikome, i mwaka ma olubuni, kit macalo yam Elica owaco bote.

18I nge mwaka manok, inino mo acel latin meno oa ocito bot wone ikin lukac. 19Ma pud tye kunu ci ocako kok bot wone ni, “Ai, wiya do, wiya do!”

Ci wone owaco bot latice ni, “Tinge itere bot mine.” 20Ka otinge ci otere bot mine. Latin obedo i em mine nio i dyeceng amac, ci oto woko. 21Ci dakonu oa ocito opyele iwi kitanda pa dano pa Lubangani, ka oloro wiye woko i ot, ci okato woko. 22Ka olwongo cware, ci owaco bote ni, “Cwala latici mo acel ki kana acel, wek acit bot dano pa Lubanga oyotoyot, ka adwogi.” 23Ci cware ogamo ni, “Pingo i cito bote tin? Pien dwe peya opor, kadi Cabit bene pud.” Ento en ogamo ni, “Bibedo ber ka itimo kit ma alegi dok ayela mo bibedo peke.” 24Ka kitweyo kom inge kana, ci dakonu owaco bot latice ni, “Wek kana oring, pe icung nio ka awaco ni cung.” 25Ci gua me cito bot dano pa Lubanga wa i got Karmel. Ka dano pa Lubanga oneno en bino, ci owaco bot latice Gekaji ni, “Nen, Lacunem ca binoni! 26Ring oyot icit irom kwede, ci ipenye ni, Itye maber? Cwari tye maber? Latin tye maber?” Ci dakonu ogamo ni, “Tye maber.” 27Ka obino iwi got bot dano pa Lubanga, ci opoto omako tyene. Ci Gekaji obino ka cwale woko cen. Ento dano pa Lubanga ojuke ni, “Wek en obedi, pien tye ki can madwong i cwinye; ento Rwot okano loke woko ki bota, pe onyuta.” 28Ci dako Lacunem owaco bote ni, “An yam alegi pi latin laco mo, rwoda? Yam pe awaco ni pe i bwola?” 29Ci Elica owaco bot Gekaji ni, “A malo, itwe pyeri, ci ikwany odoona imak i cingi, wek icit. Ka iromo ki dano mo, pe imote; ka dano mo omoti, pe igam doge; cit iket odoona ipyel ikom latin.” 30Min latin dok owaco ni, “Akwongo kwong ki nying Rwot matye makwoni, dok akwongo bene ki nying in kikomi ma i tye makwoni, ni an pe abibwoto in,” Ci gin aryoni bene gua ci gulubu kor Gekaji. 31Gekaji ocito mere anyim, ci oketo odo ikom latin, ento gin mo pe otime kadi wa kit gin ma nyutu ni kwo. Omiyo odok cen ka romo kwede i yoo, ci otito bote ni, “Latin peya oco.”

32Ka Elica obino i ot, ci oneno latin obutu iwi kitandane ma oto woko. 33En odonyo oloro dogola woko iwigi gin aryo, ci ocako lego Rwot. 342Dok oa malo ocito obutu ikom latin, kun keto doge i dog latin, ki wange bene oketo iwang latin, ki bade bene opyelo i bad latin, kun ryene ikome, ci kom latin odoko lyet. 35Dok oa malo, ocako wot kun wire i dye ot tungi ki tungi, ka oryene dok ikome; ci latin ojiro tyen abiro, ci oyabo wange. 36Ka olwongo Gekaji owaco bote ni, “Cit ilwong Lacunem man.” Ka obino bote, ci owaco ni, “Gam wodi eno.” 37Ci dakonu obino opoto katyene, orumu conge piny i ngom, otingo latine ci okato woko.

Elica otiyo tango pi lunebi

38Ikare mo ma onongo kec opoto i lobo, Elica dok ocito i Gilgal. Ka yam tye kapwonyo lwak lunebi, ci owaco bot latice ni, “Cib agulu madit i keno, wek ited dek ki lwak lunebini.” 39Ngat acel ocito i poto ka ngwedo dek, ci onongo agaba me tim, opwono nyige pong kanyi ma odolo, ci obino ongwero oketo i agulu dek kun pe ngeyo kitgi. 40Ka kitoko wek jonu gucam, ka gitye kacamo dek meno, ci gudange matek ni, “Ai dano pa Lubanga, yat to aye tye i aguluni!” Ci camone oloyogi woko. 41Ci Elica ogamo ni, “Wukel moko kwon.” Ci oonyo i agulu, kun waco ni, “Tok dek ki jonu gucam.” Ci gin marac mo pe dok onen i agulu.

42Inino mukene dok Laco mo onongo oa ki i Baal-calica, okelo mugati me wi mwaka bot dano pa Lubanga, mugati cayiri pyere aryo, ki wit ngano manyen i kicaane. Ci Elica owaco ni, “Mii ki jonu wek gucam.” 43Ento latice ogamo ni, “Man abiketo inyim jo miya aceli ningning?” En onwoyo waco ni, “Mii bot jonu, wek gucam, pien Rwot aye owaco kuman ni, ‘Gibicamo ci gibiweko mogo dong.’” 44Ci oketo inyimgi, gucamo, guweko mogo odong, kit macalo Rwot owaconi.