2 Luker 5

Elica ocango dobo pa Naaman

11

Naaman, ladit me mony me Ciria, en yam dano madit inyim rwode dok bene onongo miye woro mada, pien Rwot omiyo Ciria obedo kaloyo lweny pi Naaman. En yam twon oteka lweny madit, ento onongo en ladobo. 2Ikare mukato angec onongo mony pa jo Ciria oyako latin nyako mo ki i lobo Icrael, ci odoko angeca pa dako pa Naaman. 3Inino mo acel, anyakanu owaco bot min ot pa Naaman ni, “Kono nene rwoda tye cok ki lanebi matye i Camaria ca, kono ocango two dobone woko.” 4Kitmeno omiyo Naaman ocito otito bot rwot ni, “Angeca ma oa ki i lobo Icrael owaco kuman.” 5Ci rwot me Ciria ogamo ni, “Cit dong, an abicwalo waraga bot rwot me Icrael.”

Ka Naaman oa me cito, ci okwanyo ryal maromo talanta apar, ki jabu maromo cekel alip abicel, ki bongi mabeco apar. 6Ci okelo waraga bot rwot me Icrael, ma kwane kit man ni, “Ka waraga man oo boti, ber inge ni acwalo latica Naaman boti, wek in icang two dobone.” 7Ka rwot me Icrael okwano waraganu, ci oyeco bongone kun waco ni, “An aye Lubanga bo, ma neko dano ka dok cero wokoni, en aye omiyo dano man ocwalo lok bota pi cango two dobo pa laco man? Kong wutam, ka dok wunen ni en tye kayenyo kolo ikoma.”

8Ento ka Elica ma dano pa Lubanga owinyo ni rwot me Icrael oyeco bongone woko, ci ocwalo lok bot rwot kun waco ni, “Pingo i yeco bongoni woko? Wek en obin bota kombedi, wek onge ni lanebi tye i Icrael.” 9Kitmeno Naaman ocito bote ki aguragurane ducu ki gadigadi monye, ci ocung i dogola ot pa Elica. 10Ci Elica ocwalo latice bote kun wace ni, “Cit i lwoke i kulu Jordan tyen abiro, ci ibicang, dok komi biroc dok kakare.” 11Ento kiniga omako Naaman, ci oa woko me cito kun waco ni, “Nen, onongo atamo ni en bia bino bota, ka cung ci lwongo nying Rwot Lubangane, ka ilo cinge ikoma, kacango two dobona woko. 12Kulu Abana ki Parpar ma gitye i Damaciko gibeco makato lwak pii matye i Icrael ducu! Ka onongo nene alwoke i piigi kono koma pe ocang woko?” Ci oa woko me dok cen ki kiniga madwong. 13Ento lutice gunyiko bote cok, ci guwace ni, “A, ladit, ka onongo lanebi owaco ni i tim gin mo matek makato man kono pe itiyo? Pingo pe icit ilwoke kit ma en owaconi wek komi ocang woko?” 14Ci Naaman oa ocito olwoke i kulu Jordan tyen abiro, kit ma dano pa Lubanga owaconi; ci ocang, kome oroc odok kakare macalo kom latin lakere. 15Ci Naaman oloke odok cen bot Elica kacel ki lutice ducu, ci obino ocung inyime, kun waco ni, “Nen, an dong angeyo ni Lubanga mo pe i lobo ducu, kono i Icrael keken; ber dong igam mot pa latici.”

16Ento Elica owace ni, “Akwongo kwong ki nying Rwot matye makwoni, ni pe abigamo gin mo ki boti.” Naaman obedo kadiyo en ni ogam, ento Elica okwero woko. 17Ci Naaman owaco bote ni, “Ka ikwero, ci alegi ni, wek ki miya lobo ma kana aryo gitwero yeyo, pien nia tin, rwoda, pe abityero gitum awanga nyo gitum mukene bot lubanga mo, kono bot Rwot Lubanga keken. 18Piman, kace abicito kacel ki ladita nino jwi i ot pa Rimmon ma en lubanga me Ciria, ma kun nongo en kule piny kawore, ci an myero bene akule i ot pa Rimmon, ci Rwot myero otima kica ikom lok man.” 19Ci Elica owace ni, “Dong icit ki kuc.” Ci Naaman oa odok cen.

Ento ka Naaman peya owoto ocito mabor, 20ci Gekaji latic pa Elica ma dano pa Lubangani owaco ni, “Nen, rwoda oweko Naaman Laciriani ocito labongo cul mo. En onongo myero oye mic ma Laciriani okelo! Akwongo kwong ki nying Rwot matye makwoni, ni abiringo i kore, wek anong gin mo ki bote.” 21Kitmeno Gekaji oringo olubu kor Naaman. Ka Naaman oneno kiringo i kore, ci opye piny ki iwi gadigadine pi rwate kwede ci openyo ni, “Lok mo tye?” 22Ci Gekaji ogamo ni, “Lok mo peke. Rwoda ocwala ni awac boti ni, ‘Kombedi awobe aryo mogo ma gin lunebi gubino bota ma gua wa i lobo godi me Epraim; alego ni, imii botgi talanta me ryal ki bongo aryo mabeco.’ 23Ci Naaman ogamo ni, Ber igam talanta aryo.” Dok orido en matek, omiyo otweyo talanta aryo me ryal i kicaa aryo, ki bongo aryo mabeco, ci omiyo lutice aryo gutingo gutelo nyim Gekaji. 24Ka oo iwi cere, ci okwanyo woko ki i cinggi, ci oketogi i ot; ka ocwalo jo meno woko, ci gucito. 25Ka odonyo i ot, ci Elica openye ni, “Gekaji in ia ki kwene?” Ci en ogamo doge ni, “Latici pe ocito kamo.” 26Ento Elica owace ni, “Tipu koma ocito kwedi wa ikare ma laconi olor piny ki iwi aguragurane pi lok kwedi. Man pe obedo kare me gamo lim ki ginarukagu, ki poto jeituni ki poto olok, ki romi ki twonigu ki opii ki angecagu. 27Pi gin man ma i timoni, dobo pa Naaman bikobo ikom in, ki ikom likwayi matwal.” Kitmeno en okato woko ki inyime ma ladobo, ma kome orugu woko matar macalo pee.