2 Luker 6

Kinongo latong ma opoto i pii

1Inino mo acel lwak pa lunebi gukok bot Elica ni, “Nen, kabedo ma wabedo iye me cokewa dong tidi mo, pe romowa. 2Wek wacit i Jordan wek dano acel acel onong yat ki kunu, wek wayub kabedo me cokewa mukene.” Ci Elica ogamo ni, “Citu.” 3Dano mo acel ma ikin gi olege ni ocit kwedgi, ci en oye me cito. 4Ci en oa me cito kwedgi. Ka guo i Jordan, gutongo yadi mapol. 5Ento ka dano mo acel tye katongo yat, ci latonge oput woko ci opoto i pii, ci odange matek ni, “Maa do, rwoda! Pien alego latong man alega.” 6Ci Elica openye ni, “Opoto kakwene?” Ka onyute kakare, ci Elica otongo jang yat mo, ci obolo i pii kunu, omiyo latong okwang iwi pii. 7Ci Elica owaco bote ni, “Kwany woko ki i pii.” Ci laconu ocwalo cinge ka okwanyo latong.

Elica ki mony pa jo Ciria

8Ikare mo rwot me Ciria onongo tye kalweny ikom Icrael. Ka openyo ludito monye ci guyero kama omyero gugony i ye. 9Ento Elica onongo cwalo lok bot rwot me Icrael ni, “Pe i wok ki ka munyo, pien jo Ciria gugony i ye dok gitye ka kuruwu wek gipot ki lweny ikomwu kunu.” 10Ci miyo rwot me Icrael cwalo dano i kabedonu ka ciko jo ma kunu wek gubed atera. Man otime tyen mapol.

11Omiyo cwiny rwot me Ciria obale woko; ci olwongo ludito monye ci owaco botgi ni, “Anga matye ikinwa ma tucu yubwa woko bot rwot me Icrael?” 12Ci ladit monye mo acel owaco bote ni. “Meno pe wan rwot; ento Elica ma lanebi matye i Icrael, en aye tito lok ma i loko kadiwa i kicika butuni bot rwot me Icrael.” 13Ci rwot me Ciria ogamo ni, “Cit iyeny kama en tye iye, wek acwal dano kamake.” Ka kitite ni en tye wa i Dotan, 14ci ocwalo lwak aguragura ki gadigadi lweny ki mony madit; ci gucito wa kunu i dyewor, gurumu taun meno woko.

15Orwone, ka latic pa Elica oa malo odiko con okato woko, ci oneno mony ki aguragura ki gadigadi lweny orumu taun woko ducu. Ci odok cen i ot ci okok bot Elica ni, “Maa do, rwoda! Man watimo ango?” 16Elica odoke iye ni, “Pe ilwor, pien jo matye tung botwa dwong makato jo matye tung botgi.” 17Ci Elica olego kun waco ni, “Ai Rwot, alegi, yab wang latica wek onen.” Ci Rwot oyabo wang latin awobi meno, ci oneno aguragura opongo wi got woko ki gadigadi lweny me mac ma orumu Elica woko dyere. 18Ka Luciria gucito kalweny ikome, ci Elica olego Rwot kun waco ni, “Alegi ni dong imii wang jo magi ocor woko.” Ci Rwot omiyo wanggi ocor woko kit macalo Elica olegoni. 19Ci Elica owaco botgi ni, “Man pe yoo ma atir, dok man bene pe taun ma wun wuyenyoni; wulub kora, wek aterwu bot dano ma wuyenyoni.” Ci oterogi wa i Camaria.

20Ka gudonyo i Camaria, ci Elica olego Rwot ni, “Ai Rwot, dong i yab wang jo magi, wek gunen piny.” Ci Rwot oyabo wanggi, ci nen; gunongo ni gitye wa i dye Camaria. 21Ka rwot me Icrael onenogi, ci openyo Elica ni, “Wora, abinekgi woko? Abinekgi woko?” 22Ci En ogamo ni, “Pe inekgi. Ka lumony ma meri gumako lumoneni ki i dog lweny, in pe iketo cingi ikomgi me nekogi. Ket cam ki pii inyimgi, wek gucam, gumat, ka gudok bot rwotgi.” 23En oyubu pirgi cam madwong; ka dong gucamo, gumato, ci ocwalogi gudok bot rwotgi. Ci jo Ciria pe dok gudwogo kamonyo lobo Icrael matwal.

Rumu Camaria

24Lacen Ben-adad rwot me Ciria ocoko monye ducu, ocito orumu Camaria. 25Pimeno, kec madit opoto i Camaria nio ka wi kana ma mwani onongo dong ki cato pi cekel me ryal pyere aboro kulu, ki cet amam1 bakuli acel kiwilo ki cekel me ryal abic. 26Inino mo acel ma rwot me Icrael onongo tye kawot kun kato ki iwi cel me taun, ci dako mo odange ki lok bote, kun waco ni, “Konya do rwoda!” 27Ci en ogamo ni, “Ka Rwot pe okonyi, ci an abinongo gin ma akonyi kwede kwene? Onongo an atye ki ngano nyo kongo bwino bo me wek akonyi kwede?”

28Ci rwot openye ni, “Gin ango ma yeli?” Ci dakonu ogamo ni, “Dako man owaca ni, ‘Mii wodi wek tin wacam, ka diki dong wabicamo woda.’ 292Ci omiyo watedo woda wacamo. Orwone awaco ki dakonu ni dong okel wode wek wacam, ento en okano wode woko.” 30Ka rwot owinyo lok pa dakonu, ci oyeco bongine woko ducu me nyutu cwercwinye, ci dano gunenoni en onongo oruku bongo cola ki ite bongone. 31Ci rwot owaco ni, “Lubanga owek to ocoba woko tin, kace pe aneko Elica ma piny peya oyutu. Pien en aye omiyo can ma kit man opoto ikomwa!”

32Elica onongo obedo i ode, kacel ki ludongo ma gubino kalime. Ikare meno onongo rwot ocwalo dano kalwongo Elica. Ento ma pud peya lakwena oo bote, Elica owaco bot ludongo ni, “Wungeyo wunu ni laneko ma en rwot me Icrael ocwalo dano me neka woko? Ka lakwenanu obino, ci wulor dogola woko, wumak dogola matek liking, pe wuwek odony i ot. En rwot kikome bene bibedo kalubu kor lakwenanu macok.” 33Ikare ma en pud loko kwedgi, ci nen, rwot gin ki lakwenanu gutugi o, ci owaco ni, “Peko man oa ki bot Rwot Lubanga! Pingo dok pud amede kakuru kony ki bote?”