2 Luker 7

1Ento Elica owaco bote ni, “Winy lok pa Rwot Lubanga: En waco kuman ni, ‘Diki kare onyo kibicato moko kwon mapwote adita acel pi cekel acel, ki cayiri adita aryo kibicato pi cekel acel ki i dog gang me Camaria.’” 2Ci ladit me acikari makonyo rwot ogamo dog Elica kun waco ni, “Kadi bed Rwot Lubanga kikome aye biyabo wang dirica ki i polo, ci meno pe bitime” Ci Elica ogamo ni, “In ibineno ki wangi, ento pe ibicamone.”

Lworo madit opoto ikom mony me Ciria

3I ninonu onongo tye ludobo angwen ma gibedo i dog gang me Camaria, ci gubedo kapenye keken gi ni, “Wan wabibedo kany kit man nio ka wato? 4Kadi wawac ni, ‘Wadonyu i gang,’ kec bene tye i gang, ci wabito ki kunu; ka wabedo kany bene, wabito woko. Dong wubin, wacitu kombedi wa i gony pa jo Ciria. Ka pe gunekowa ci wabikwo, ka gunekowa ci wabito.” 5Ci jonu gua ma piny dong cidoni, ci gucito wa i gony pa jo Ciria; ento ka guo i dog gony pa jo Ciria ci nen, dano mo onongo peke kunu. 6Pien Rwot onongo omiyo jo Ciria guwinyo dwon lwak gadigadi lweny, ki pa aguragura, ki dwon mony madwong, ci guloko ikin gi keken gi ni, “Nen, rwot me Icrael owilo mony pa rwot pa jo Kit ki luker me Ejipt me bino kalweny ikomwa.” 7Omiyo gutware woko ki ngwec i otyeno meno pi laro kwogi, ci guweko kemagi, ki aguraguragi, ki kanagi i gony ki bere.

8Ka ludobo meno guo i dog gony, ci gudonyo i kema mo, gucamo, gumato, ci gutingo ryal mogo ki jabu ki bongigu, gucito gukanogi woko; ka dok gudwogo cen, gudonyo i kema mukene bene, gutingo jami matye iye, gucito gukano. 9Ento guloko keken gi ni, “Gin ma watimoni pe ber. Tin aye nino me kwena maber; ka waling nio ka piny odoko leng, ci can bipoto ikomwa; dong wubin, wacitu wek wacitit bot jo ma i ot pa rwot.” 10Ci gucito gulwongo lugwok dog gang, ka gutito botgi ni, “Wan wacito wa i gony pa jo Ciria, ci nen, pe wanongo dano, pe bene wawinyo gin mo kunu dok bene gin mo pe, kono lwak aguragura ki lwak kana keken ma kitweyogi, ki kema bene tye ma kiwekogi kibere.” 11Ci lugwok dogcel gudange ki dwon matek, ci gutito pire bot lutic pa rwot. 12Ci rwot oa malo i dyewor, owaco bot lutice ni, “Abitito ki wun kit ma jo Ciria guyube kwede kalweny ikomwa. Gin gingeyo ni watye ki kec; omiyo guweko gonygi ci gucito woko kakane wa i bar. Gin mitoni, wan wakat woko ki i taun madit wek wacit kanongo cam ci gibimakowa woko makwo ka dok bene gibimako taunwa madit woko.” 13Ci Latice mo acel ogamo ni, “Kong ki cwal jo mogo ki aguragura abic i ikin mewa mudongi wek kinen kite, pien ka wan ducu ma pud wakwoni wadong kany ci bene wabito macalo lwak jo Icrael ducu madong guto gutum wokoni.” 14Ci gukwanyo co ma gin lungwec ki aguragura, ci rwot ocwalogi ki gadigadi aryo wek gucit kaneno gin mutime ikom mony pa jo Ciria. 15Ci jonu gucito gulubu korgi wa i Jordan; ci gunongo jami mapol ata ma mony me Ciria gubolo i korayo pi laro komgi. Ci lukwena gudwogo cen gutito bot rwot.

16Ci jo Camaria gumol gucito kayako gony pa jo Ciria, ci adita acel me moko kwon mapwote ki cato pi cekel acel, ki adita aryo me cayiri pi cekel acel, kit mayam Rwot owaconi. 17Ikare meno onongo rwot oketo ladit me acikari ma konyeni aye me bedo lagwok dog gang; ento ka en ocung i dog gang, ka dano gutware me kato woko ci gunyone, ci oto woko, kit ma Elica owaco ikare ma rwot ocito boteni. 18Pien ka Elica onongo owaco bot rwot ni, “Diki ka onyo adita aryo me cayiri ki biwilo ki cekel acel, ki adita me moko kwon mapwote pi cekel acel, i dog gang me Camaria,” 19ci ladit me acikari ogamo dog Elica ni, “Kadi bed Rwot Lubanga kikome aye biyabo wang dirica ki i polo, ci meno pe bitime.” Ci Elica ogamo ni, “In ki komi ibineno ki wangi, ento pe ibicamone.” 20Ci otime ikome kitmeno, pien dano gunyone ki tyen gi ki i dog gang ci oto woko.