2 Luker 8

Kidwoko lobo pa dako me Cunem

11

Ikare meno Elica owaco ki dako me Cunem mayam ocero latineni ni, “A woko ki jo ma i odi wek icit ibed kamo keken ma i twero; pien Rwot ociko pi kec, ci bipoto i lobo pi mwaka abiro.” 2Ci dakonu oa ocito kit ma Elica owaco; en ki jo ma i ode ci obedo i lobo pa jo Piliciti mwaka abiro. 3Ka mwaka abiro otum, ci dakonu odwogo nia ki i lobo pa jo Piliciti, okato ocito bot rwot kakoko pi ode ki pi lobone wek kidwok cen bote. 4Ikare ma en oo, onongo rwot tye kalok ki Gekaji ma latic pa dano pa Lubanga, kun waco bote ni, “Tita gin madito ducu madong Elica otyeko tiyo.” 5Gekaji onongo tye katito bot rwot kit ma Elica ocero ki dano ma oto, ci nen, dako ma en ocero wodeni okok bot rwot pi ode ki pi lobone. Ci Gekaji owaco ni, “Rwot, man en aye dakoca, ki wode bene ene, ma Elica oceroni.” 6Ka rwot openyo dakonu, ci en otite, omiyo rwot okwanyo dano mo madit pire, kun waco ni, “Dwok jami mayam pa dakonu ducu bote, kacel ki jami ma ocek i potine nia wa ikare ma en obwoto ki lobone nio kwede wa onyo.”

Elica ki Ben-adad rwot me Ciria

7Elica ocito i Damaciko ikare ma Ben-adad rwot me Ciria onongo two; ka ngat mo otito ki rwot ni, Elica obino kany, 8ci rwot owaco bot Kajael ma ngat acel ki ikin ludito monye ni, “Kwany mot icit kwede kajolo wi Elica, ci ilege wek en openy dog Rwot kace abicang ki i two man.” 9Kitmeno Kajael ocito kajolo Elica, ci otero mot ki kit kwayi jami ducu mabeco matye i Damaciko, ma kinaga pyere angwen guyeyo. Ka Kajael ocito ocung inyim Elica, ci owace ni, “Latici Ben-adad ma rwot me Ciria ocwala boti, kapenyo ka en bicang ki two man?” 10Ci Elica ogamo ni, “Rwot otyeko nyutu bota ni en obito ada; ento cit iwac bote ni, en bicang ada.” 11Ci Elica ociko wange ikom Kajael kun gaye kwede, nio ka lewic omako, ci Elica ocako koko. 12Ci Kajael openyo ni, “Rwoda, dok ikok pingo ka?” Ci en ogamo ni, “Pien angeyo tim marac ma ibitimo ikom jo Icrael; ibiwango cel gogogi ma orumu taun madito woko ki mac, ibineko co matino woko ki pala lucwan, kun inyoto lutino lukere woko, dok mon gi ma giyac ibiryeko igi woko.” 132

Ci Kajael ogamo ni, “An ma mwani kono abinongo twero macalo meno ki kwene?”

Elica odok iye ni, “Rwot otyeko nyutu bota ni, in aye ibibedo rwot me Ciria.”

14Kajael oa woko ki bot Elica, ci odok cen bot Ben-adad. Ben-adad openye ni, “Elica owaco boti lok ango?”

Ci en ogamo ni, “En otita ni in i bicang adada.” 15Orwone Kajael okwanyo batania, olutu i pii ci oumu woko ki wange wek pe oywe nio ka oto. Kajael oleyo katyene.

Loc pa Jekoram me Juda

(2 Tek 21:1-20)

16I mwaka me abic me ker pa Joram wod pa Akab rwot me Icrael, en aye Jekoram wod pa Yekocapat rwot me Juda ocako iye loc. 17Jekoram ocamo ker ma onongo mwaka me dite tye pyere adek wiye aryo, ci obedo kaloc i Jerucalem pi mwaka aboro. 18Ci en bene obedo kalubu kit pa luker me Icrael, kun tiyo gin manen marac iwang Rwot kit macalo jo me ot pa Akab gutiyo, pien dakone obedo nya pa Akab. 193Ento Rwot pe omito tyeko Juda woko, pien con ocike bot latice Daudi me miyo likwaye me loc matwal. 204

Ikare me loc pa Jekoram en aye jo Edom gujemo iye ikom Juda, ci guwiro rwotgi pirgi ken gi. 21Ci Jekoram okato loka Jair kacel ki gadigadi lwenye ducu, ci jo Edom gurume dyere. Ento en ki ludito ma giloyo gadigadi lwenye gulwenyo ikomgi ki dyewor ci gubwot woko, ci monye guringo gudok paco. 22Omiyo Edom ojemo woko ikom loc pa Juda nio wa onyo. Ka dok Libna bene ojemo i karenu.

23Lok kom Jekoram mudonge ducu, ki gin mayam otiyo ducu, kityeko coyone i Buk me Tekwaro pa Luker me Juda. 24Jekoram oto, oywe kacel ki kwarine, dok kiyike kacel ki kwarine i taun madit pa Daudi; Akajia ma wode aye oleyo katyene.

Loc pa Akajia rwot me Juda

(2 Tek 22:1-6)

25I mwaka me apar wiye aryo me loc pa Joram wod pa Akab, rwot me Icrael, Akajia wod pa Jekoram, rwot me Juda, ocako camo iye ker. 26Akajia onongo dite romo mwaka pyere aryo wiye aryo ka ocamo ker, ci obedo kaloc i Jerucalem pi mwaka acel. Mine nyinge Atalia; en yam lakwar Omri rwot me Icrael. 27Akajia bene obedo kalubu kit pa jo me ot pa Akab, kun tiyo gin manen marac iwang Rwot, kit macalo jo me ot pa Akab ma jo pacone gubedo katiyone.

28Akajia oribe gin ki Joram wod pa Akab kalweny ki Kajael rwot me Ciria wa i Ramot-gilead, ci jo Ciria guketo ret ikom Joram. 29Ci odwogo i Jejreel kamado ret ma jo Ciria guketo ikome ki i Ramot-gilead, ci Akajia wod pa Jekoram rwot me Juda ocito kunu kalime.