2 Luker 9

Kiwiro Yeku me bedo rwot me Icrael

1Elica olwongo ngat acel ikin lwak pa lunebi ci owaco bote ni, “Yube me cito i Ramot-gilead. Kwany adomo moo jeituni man wek icit kwede. 2Ka io kunu, ci icit iyeny Yeku wod pa Yekocapat, wod pa Nimci; cit i wace oa woko ki ikin luwote, ci i tere i kicika ma i tyelo. 3Ka i kwany adomo moo, i ony iwiye, kun iwaco bote ni, ‘Rwot owaco kuman ni ewiro in me bedo rwot maloyo Icrael.’ Ka dong i yab dogola ci i lwi woko oyotoyot; pe i bed kunu.”

4Ci awobi meno ma lanebini oa ocito i Ramot-gilead. 5Ka oo kunu, ci onongo ludito me mony gubedo i kacokegi, ci owaco ni, “Ladit, atye ki kwena mo bot ngat acel ikinwu.”

Ci Yeku ogamo ni, “I bino bot anga ki ikinwa kany?”

En ogamo ni, “Abino bot in ladit.” 61Ci Yeku oa ocito kwede i ot; ci latin awobinu oonyo moo iwiye, kun waco bote ni, “Rwot Lubanga pa Icrael owaco kuman ni ewiro in me bedo rwot maloyo lwak pa Rwot, jo Icrael. 7In aye i bityeko ot pa laditi Akab, wek acul kwor ikom Jejebel pi neko lunebina, ki lutic pa Rwot mukene ducu. 8Pien ot pa Akab bitum woko ducu; abineko co woko ducu ki bot Akab, ma opii ki ma anywaligu, ma gitye i Icrael. 9Abimiyo ot pa Akab bedo calo ot pa Jeroboam wod pa Nebat, dok bibedo macalo ot pa Baaca wod pa Akija. 102Gwogi aye bimwodo kom Jejebel woko ki i lobo Jejreel, ngat mo pe biyiko en.” Ka awobi meno ma lanebini otyeko loko magi ducu, ci oyabo dogola opuce ci oringo woko.

11Ka Yeku okato woko bot ludito luwote, gupenye ni, “Lok ango dong? Pingo lapoyanu obino boti?” Ci en owaco botgi ni, “Wun wungeyo kit lok ma awobe ma lunebi loko do.” 12Ci guwaco ni, “Meno goba; tuc lok ma en otito kikome.”

Ci en otito botgi ki kore ni, “En oloko bota ni Rwot owaco kuman ni, ‘Awiro in me bedo rwot maloyo Icrael.’” 13Cutcut ngat acel acel okwanyo bongone oyotoyot opeto piny i rwom ma obedo gotgot wek en obed iye, ci gucako kutu tumgi kun gidange matek ni, “Yeku aye rwot!”

14Kitmeno Yeku wod pa Yekocapat wod pa Nimci ocako piro lok ikom Joram. (I karenu onongo Joram ki jo Icrael ducu gubedo kagwoko Ramot-gilead pi gengo Kajael rwot me Ciria wek pe olweny ikome; 15ento onongo rwot Joram otyeko dwogo i Jejreel kamado ret mayam jo Ciria guketo ikome, ikare ma onongo en olwenyo ki Kajael rwot me Ciria.) Ci Yeku owaco ni, “Kace tamwu tye kit man, pe wuwek dano mo opuce ki i taun kany katero lok man i Jejreel.” 16Ci Yeku oito iwi gadigadi lwenye, me cito wa i Jejreel, pien onongo Joram tye kamado rete kunu. Ka dok Akajia rwot me Juda bene tye kunu kalimo Joram.

17Inino meno onongo lakurpiny mo ocung malo i lubele ma i Jejreel, ci oneno buca mony pa Yeku ka tye kabino, ci owaco ni, “Aneno buca mony.”

Ci Joram owaco ki monye ni, “Kwany won aguragura mo, i cwale wek ocit orwate kwede ci openye ni, ‘I bino ki kuc bo?’”

18Ci lakwena oito iwi aguragura ocito karwate kwede, ci openye ni, “Rwot openyo ni, ‘I bino ki kuc bo?’” Ci Yeku ogamo ni, “In iyele kapenyo pi kuc pingo ka? Loke ilub kora.”

Ci lakurpiny odwoko lok kun waco ni, “Lakwena oo kunu, ento pe tye kadwogo.” 19Dok ocwalo won aguragura me aryone. Ka oo botgi ci owace ni, “Rwot openyo ni, ‘I bino ki kuc bo?’” Yeku ogamo ni, “In iyele kapenyo pi kuc pingo? Loke, ilub kora.”

20Lakurpiny dok odwoko lok ni, “En oo botgi, ci pe dong tye kadwogo. Dok laryem gadigadi lweny ryemo macalo Yeku wod pa Nimci; pien ryemo ki tek tutwal calo lapoya.”

21Ci Joram owaco ni, “Wuyub gadigadina!” Ci ki yubu gadigadine, ka Joram gin ki Akajia rwot me Juda guito iwi gadigadigi, gucito karwate ki Yeku. Gurwate kwede i poto pa Nabot ma jo Jejreel. 22Ka Joram oneno Yeku, ci openyo ni, “I bino ki kuc bo?” En ogamo ni, “Kuc ango ma dok tye, ma kun timwu me woro lubangagu ki tim jokjok pa meni Jejebel dong dwong tutwali?”

23Ci Joram odange matek kun waco ni, “Roro dong ocake woko Akajia!” Ci owiro gadigadine me ngwec woko. 24Ento Yeku otelo atume ki teke ducu, ci obayo ocelo Joram ikin akwaya bade, ci ocobo wa ikom adunune, omiyo en opoto piny ki iwi gadigadine naka wa i to. 25Ci Yeku owaco bot Bidkar ma lakony en ni, “Kwany kome wek i bole woko i poto pa Nabot ma jo Jejreel. Po pi lok ma Rwot yam otito ikome ikare ma an ki in onongo waringo ki aguragurawa kacel i kor Akab ma wone kun waco ni, 263‘Macalo laworo aneno remo pa Nabot, ki remo pa awobeneni, abiculu kwor ikomi i poto man bene! Man lok pa Rwot kikome.’ Dong i tinge i bole i poto kany, kun i lubu lok mayam Rwot owaconi.”

Yeku oneko Akajia

(2 Tek 22:7-9)

27Ka Akajia rwot me Juda oneno, ci oringo woko odok tung taun me Bet-kagan, ento Yeku olubu kore ci owaco ki monye ni, “Wunek en bene!” Ci kicele woko ki iwi gadigadine kun tye kaito cere ma woto i Gur, macok ki i taun me Ibleam. Ci oringo olaro Megiddo, kama oto iye. 28Ci lutice gutingo en ki gadigadi gutere i Jerucalem, ci guyike i lyele kacel ki kwarine i taun madit pa Daudi.

29Onongo Akajia ocako loyo jo Juda i mwaka me apar wiye acel me loc pa Joram ma wod pa Akab.

To pa daker Jejebel

30Ka daker Jejebel owinyoni Yeku oo i Jejreel, ci owero teng wange ryoryo ki rangi macol, oyubu wiye, ci ocung kun neno woko ki iwang dirica. 31Ka Yeku donyo ki i dog gang, ci Jejebel openyo ni, “Ibino ki kuc bo in lanekoni? In i calo Jimri, ma oneko rwodeni.”4

32Ci Yeku oilo wiye malo ka oneno dirica, ci owaco ni, “Anga matye tung bota? Anga?” Co aryo nyo adek ma lugwok daker, ma kikologi, guneno tung bote. 33Ci Yeku owaco botgi ni, “Wubole woko piny!” Ci gubolo Jejebel woko piny, ci remone okir i kor ot ki ikom aguragura. Ci Yeku oringo ikome ki aguragura ci gunyono kome woko atata. 34Ci Yeku odonyo i otker, ocamo ka omato. Lacen owaco ni, “Wukwany kom dako man ma kicenoni wek wuyike woko, pien en nya pa rwot.” 35Ka gucito kayiko kome, ci pe gunongo gin mo mudong ikome, kono nyo olar wiye ki tyene aryo ki opany cinge aryo keken. 365Ka gudwogo bote, gutite, ci ogamo ni, “Meno en aye lok pa Rwot, mayam owaco ki i dog Eliya Laticbe ni, ‘Gwogi aye bimwodo kom Jejebel ki i lobo me Jejreel; 37dok kom Jejebel bibedo macalo cet dyang ma kiketo ata i ngom i poto ma i lobo Jejreel, ma bimiyo dano mo pe twero waco ni, man aye Jejebel.’”