2 Luker 10

Yeku oneko jo me ot pa Akab otyeko woko

1Onongo Akab tye ki awobene pyere abiro ma gibedo i Camaria. Ci Yeku ocoyo waraga mogo, ci ocwalogi i Camaria bot ludito ma giloyo taun meno, ki bot ludongo, ki bot lugwok lutino awobe pa Akab, kun waco ni, 2“Lutino pa rwotwu tye botwu, dok bene wutye ki gadigadi lweny ki aguraguragu, ki taun gi ma kirumu ki cel gogo, ki jami lwenygu. Dong kace waraga man oo botwu, 3wuyer latin ker ma opore mucwiny maber maromo loc ki ikin lutino awobe pa rwotwu, ci wuket iwi komker pa wone, ka dong wulweny pi ot pa rwotwu.” 4Ento gubedo ki lworo matek, ci guwaco ni, “Nen ba, ka luker aryo ca pe gutwero lweny ikome, ci wan kono watwero lweny ikome ningning?” 5Pimeno dano ma onongo loyo kal ki ngat maloyo taun ducu, kacel ki ludongo ki lugwok lutino, gucwalo lok bot Yeku kun giwaco ni, “Wan lutici; wabitiyo gin ducu ma ibicikowa kwede. Wan pe wabiketo rwot mo; in itii gin ma inenoni ber.” 6Yeko dok onwoyo coyo botgi waraga me aryo, kun waco ni, “Kace wun wutye tung bota, kace wuyube me woro doga, ci wukel wi lutino awobe pa rwotwu, ci wubin bota i Jejreel diki cawa onyo.”

Awobe pa rwot Akab pyere abironi onongo jo madito me Camaria aye gwokogi dok gupitogi nicake iwang tinogi. 7Ka waraga oo botgi, ci gumako lutino awobe pa rwot, gunekogi woko, jo pyere abironu ducu, ci gucoko wigi i aduku, ka gutero i Jejreel. 8Ka kitito ki Yeku ni dong kityeko kelo wi lutino awobe pa rwot ducu, ci en ogamo ni, ki can wigi obed odu aryo ki inget dog cel me taun, kama kidonyo iye, wek obed nio wa odiko. 9Ka okato odiko, ocung i dog cel ci owaco bot lwak ducu ni, “Wun pe wutye ki bal mo. An gira apiro lok me neko rwoda rwot Joram, ci atyeko neko en woko; ento anga ma oneko jo magi woko ducu? 10Ber wunge atir ni lok pa Rwot pe poto piny nono. Lok mayam Rwot oloko ma dok ikom ot pa Akab bicobe ducu; pien Rwot otyeko tiyo gin mayam owaco ki i dog latice Eliya.” 111Ci Yeku oneko jo ducu ma i ot pa Akab mudonge i Jejreel, oneko wa jone maditogu ducu, ki lureme macok kwede, ki ajwakine, nio ka otyekogi woko ducu ma acel mo pe odong.

Kineko ludogola pa Akajia

12Ka Yeku oa me cito i Camaria. Ki i yoo ma onongo en tye i Bet-eked kama lukwat gigure iye, 13en oromo ki jo ma gin ludogola pa Akajia rwot me Juda, ci openyogi ni, “Wun angagi?” Ci gugamo ni, “Wan ludogola pa Akajia, wan wabino kamoto lutino kal ki lutino awobe pa daker yo.” 14Ci en owaco ni, “Wumakgi makwo.” Ci gumakogi makwo, ka gunekogi woko kanget bur me Bet-eked. Welgi onongo tye dano pyere angwen wiye aryo, ci en pe oweko acel mo obwot.

Kineko ludogola pa Akab mudong ducu

15Ka Yeku oa woko ki kunu, ci orwate ki Yekonadab wod pa Rekab ma bino kajolo wiye; ci omoto en, kun wace ni, “Cwinyi leng ikoma macalo an cwinya leng kwede i komini?” Yekonadab odok iye ni, “Atye kitmeno.” Ci Yeku owace ni, “Ka itye kitmeno, ci cwal cingi bota.” Ci ocwalo cinge. Ci Yeku otinge i gadigadine, 16kun wace ni, “Bin wacit kacel, wek inen kit ma arima omaka kwede pi Rwot.” Kitmeno Yeku otere wa i Camaria. 17Ka oo i Camaria, ci oneko jo pa Akab ducu ma onongo gudong kunu, nio ka oyweyogi woko ducu liweng, kit mayam Rwot oloko ki Eliyani.

Kineko jo ducu ma woro Baal

18Yeku ocoko lwak ducu me Camaria, ci owaco botgi ni, “Akab yam oworo Baal manok mo, ento an dong abiwore makato. 19Piman wulwonga lunebi pa Baal ducu, ki jo ma giworo en ducu, ki ajwakine ducu; pe ngat mo obed peke, pien atye ki gitum madwong me atyera bot Baal; dano mo ma bibedo peke, pe bibedo makwo.” Ento Yeku otiyo ki ryeko laum wang, pien onongo oyube me tyeko luwor Baal woko. 20Yeku dok ociko ni, “Wulwong coke madit pi woro Baal!” Ci kilwongo kacoke. 21Ci Yeku ocwalo kwena oromo i Icrael ducu, ci jo ducu ma woro Baal gubino; pe dano mo odong ma pe obino. Ci gucako donyo i ot pa Baal, ci ot pa Baal opong tungi ki tungi ducu. 22Ci Yeku owaco bot ladit me ot bongi ni okel ginaruka pi luwor Baal ducu. 23Ci Yeku oa ocito i ot pa Baal kacel ki Yekonadab wod pa Rekab; ci owaco bot luwor Baal ni, “Wuyeny, wek wunen ni lutic pa Rwot Lubanga mo pe odong ikinwu, kono luwor Baal keken.” 24Ci en ki Yekonadab gudonyo katyero gityer ki gitum awangagu inyim Baal. Yeku onongo dong okano jo pyere aboro woko inge ot, kun ocikogi ni, “Ka ngat mo oweko dano acel ki ikom jo ma amiyo i cingwuni obwot, ci biculu wange ki kwone.” 25Ka Yeku otyeko tyero gitum awanga, ci owaco bot lukurpiny ki ludito pa acikari ducu ni, “Wudony i ot, wunekgi woko; pe wuwek dano mo obwot.” Kitmeno gunekogi woko ki pala lucwan, ci lukurpiny ki ludito pa acikari guywayogi gubolo komgi woko. Ka gudonyo i kicika ma i tyelo ot pa Baal, 26ci gukelo wir me cal pa Baal ma nene tye i ot pa Baal woko, ci guwangogi woko. 27Dok gumuku wir me cal pa Baal, ka dok gumuku ot pa Baal bene, guloko odoko ot coron nio wa onyo.

28Kitmeno Yeku ojwayo tim me woro Baal woko ki i Icrael. 292Ento en omede ki lakit tim pa Jeroboam wod pa Nebat ma omiyo jo Icrael gubalo kun giworo cal lutino twoni me jabu i Betel ki i Dan. 30Ci Rwot owaco bot Yeku ni, “Pien in ityeko timo gin ducu ma amito ikom ot pa Akab, abimiyo likwayi bibedo iwi komker me Icrael nio i yalwak me angwen.” 31Ento Yeku yam pe ogwoke kalubu cik pa Rwot Lubanga pa Icrael ki cwinye ducu; pe obwoto lubu bal pa Jeroboam, ma en omiyo jo Icrael bene gubaloni.

To pa Yeku

32Ikare meno Rwot ocako jwiko lobo Icrael woko. Kajael olwenyo ikomgi, ci omayo lobo Icrael ducu. 33Tung kunyango me kulu Jordan omayo iye lobo Gilead ducu, ki jo pa Gad, jo pa Reuben ki jo pa Manace, cake ki i Aroer ma inget nota kulu Amon, en aye lobo Gilead ki Bacan.

34Lok kom Yeku mudonge ducu, ki gin ducu mayam otiyo, ki teke ducu, kityeko coyone i Buk me Tekwaro pa Luker me Icrael. 35Kitmeno Yeku oto ci oywe kacel ki kwarine, ci kiyiko i Camaria. Wode Yekoakaj aye oleyo katyene. 36Kare ma Yeku oloyo jo Icrael ki i Camaria oromo mwaka pyere aryo wiye aboro.