2 Luker 11

Atalia daker me Juda

(2 Tek 22:10—23:15)

1Ka Atalia onenoni wode Akajia ma onongo rwot me juda dong kineko woko, ci en omiyo twero ni kinek jo ducu me otker woko. 2Ento Yekoceba, nya pa rwot Joram, ma lamin Akajia, otingo Yoaci wod pa Akajia ki ikin awobe pa rwot ma onongo kibinekogini, ci okano en ki lapidine i kicika mo me butu matye i Ot pa Lubanga, omiyo Atalia pe onongo kome ci latin obwot, pe kineko. 3Ci Yekoceba obedo ki Yoaci mwaka abicel, kun kano i Ot pa Rwot, ikare ma Atalia tye kaloyo lobo.

4Ento i mwaka me abirone Yekoyada olwongo ludito ma lulo buca mony pa jo miya ma pa jo Kari ki pa lukurpiny, ci oterogi i Ot pa Lubanga. Ki kunu, en oketo gicike kwedgi, ci omiyo gukwongo kwong, ka onyutu botgi Yoaci wod pa rwot Akajia. 5En ocikogi ni, “Man aye gin ma wubitiyo: dul acel me adek ma ikomwu, jo ma gia i dog ticgi inino me Cabit, ma gikuru ot pa rwot, gibikuru gangkal, 6kun dul acel me adek mukene gibikuru dogola me Cur, ki acel me adek gibikuru dogola ma inge lukurpiny. 7Dulwu aryo ma gibibino i dog ticgi inino me Cabit pi kuru ot pa Lubanga, 8gibirumu rwot dyere, kun dano acel acel tye ki jami lwenye i cinge. Ka dano mo obino katemo baro kin tyengwu, kibineko woko. Wubibedo ki rwot kama en bicito iye ducu.”

9Ludito mony gutiyo gin ducu kit ma ajwaka Yekoyada ocikogi kwede; ladit mony acel acel okelo jone ma onongo gubia woko ki i dog ticgi inino me Cabit, ki jo ma nene gibino i dog tic inino me Cabit. Gin ducu gucito bot ajwaka Yekoyada. 10Ajwaka ocako miyo bot ludito me mony lwak tong ki kwot ma onongo yam pa rwot Daudi, ma onongo tye i Ot pa Lubanga. 11Lukurpiny gucung kun dano acel acel omako jami lwenye i cinge, cake wa i agiki ot tung kupiny nio kwede wa i agiki ot tung kumalo, kun girumu keno tyer ki ot bene. 12Ka dong ajwaka Yekoyada okelo Yoaci wod pa rwot, ci oketo lalukana iwiye, ka kimiye buk adola ma kicoyo cik ma rwodi myero gutii kwede ka giloyo lobo, ka kitucu atir ni en dong rwot, ci kiwire ki moo; ci dano gudange kun gidongo cinggi ka giwaco ni, “Rwot obed kwo nakanaka!”

13Ka Atalia owinyo wo pa lukurpiny ki pa lwak, ci ocito bot lwak wa i Ot pa Lubanga. 141Ka ongiyo piny, ci oneno rwot ocung ka nget wir, kit ma rwodi cung kwede, kun ludito me mony ki lukut tum gurumu rwot, ki lwak ducu gubedo ka wo ki tum kun cwinygi yom. Ci Atalia oyeco bongone, kun kok ni, “Roro yai! Roro!” 15Ci ajwaka Yekoyada ociko ludito ma giloyo wi mony ni, “Wukel dakonu woko ki ikin tyeng; wunek wa jo ma gimito laro kwone woko ducu.” Pien ajwaka onongo pe omitoni kineke ki i Ot pa Lubanga. 16Ci gumako Atalia, ci gutere i otker, ci guneke i dogcel me aguragura.

Yekoyada okelo alokaloka

(2 Tek 23:16-21)

17Ci ajwaka Yekoyada oketo gicike ikin Rwot Lubanga ki rwot Yoaci ki lwak, wek gubed lwak pa Rwot Lubanga; ka dok oketo gicike ikin rwot ki lwak. 18Ka lwak jo Icrael ducu ma onongo gitye kunu gugware gucito i ot pa Baal ci gumuku gureto woko piny. Guturu keno tyere ducu kun gingido cal ducu me awora woko matinotino, ci guneko Matan ma ajwaka pa Baal ki inyim keno tyer. Lacen ajwaka Yekoyada oketo acikari me gwoko Ot pa Lubanga. 19Ci otero ludito ma lulo buca mony pa jo miya, ki jo Kari, ki lukurpiny ki lwak ma i lobo ducu, ci gukelo rwot woko nia ki i Ot pa Lubanga kun gidore giwok ki i dogola pa lukurpiny nio kwede wa i otker. Ci rwot obedo piny iwi komker. 20Kitmeno lwak ducu ma i lobo cwinygi obedo yom; dok piny okwe mot ki inge to pa Atalia ma kineko ki pala lucwan i otker.

21Yekoac2 ocamo ker odoko rwot me Juda ma mwaka me dite onongo tye abiro.