2 Luker 12

Loc pa Yoaci me Juda

(2 Tek 24:1-16)

1I mwaka me abiro me loc pa Yeku, en aye Yoaci ocako iye loc i Jerucalem pi mwaka pyere angwen. Nying mine Jibia me Beer-ceba. 2Yoaci obedo katiyo gin manen atir iwang Rwot ikare me kwone ducu, pien ajwaka Yekoyada obedo kapwonyo en. 3Kadi bed kumeno, wang jogi ma iwi godi pe omukugi woko; lwak pud gumede katumu gitum ki wango odok eceta iwang jogi ma iwi godi. 41

Ka Yoaci olwongo ajwaki pa Lubanga ci ocikogi ni, “Wucok lim ducu me ryal ma dano gijogo macalo gityer maleng i Ot pa Lubanga, lim ducu me ajog ma dano gikelo kit ma kingolo i wigi, ki lim ducu ma dano gikelo kit ma cwinygi opwoyo. 5Ajwaka acel acel omyero ogam lim ki bot jo ma en ngeyogi, wek guroc ki Ot pa Lubanga kama kinongo ni mite me aroca.” 6Ento me o i mwaka me pyere aryo wiye adek me loc pa rwot Yoaci, onongo ajwaki peya guroco kamo ikom Ot pa Lubanga, 7omiyo rwot Yoaci olwongo ajwaka Yekoyada ki ajwaki mukene ducu, ci openyogi ni, “Pingo pe wutye karoco Ot pa Lubanga? Cake Kombedi pe dong wugwok lim mo ma wucokoni, ento wucwal lim matyeni wek kicak roco Ot pa Lubanga woko.” 8Kitmeno ajwaki guye ni pe dong gibigamo lim mo ki bot lwak, dok gin aye pe gibibedo kaloyo tic me roco Ot pa Lubanga bene.

9Ci ajwaka Yekoyada okwanyo canduk mo, otucu laum wiye, ci oguru tung acuc me nget keno tyer ki i dogola ma kidonyo ki iye i Ot pa Lubanga. Ci ajwaki ma gikuru dogola guketo iye lim ducu ma dano gukelo. 10Kace guneno ni lim madwong tye i canduk, ci karan pa rwot gin ki ajwaka madit gibino, ci gikwano lim ma kinongo ci kitweyo i kicaa. 11Ka dong gutyeko ngeyo wel lim, ci kimiyo lime i cing jo ma giloyo dog tic me Ot pa Lubanga; ci jo maloyo dog tic giculu lupaa bao, lugedo, 12lugedo ki godi, lupaa godi, kacel ki pi wilo bao ki godi ma kimuku pi roco Ot pa Lubanga, ki pi cul ducu ma mite. 13Ento pe kitiyo ki lim ma kikelo i Ot pa Lubanga me yubu becen me ryal, magac, atabo, tum nyo jami me jabu nyo me ryal mo me tic kwede i Ot pa Lubanga. 14Lim meno ducu onongo ki miyo bot lutic ma gitye kayubu Ot pa Lubanga. 152Pe gubedo kapenyo lok kom lim ki bot jo ma kimiyo lim i cinggi pi culu lutic, pien gubedo katic kwede ki gen. 163Lim ma oa ki ikom gitum me tingo alii, ki lim ma oa ki ikom gitum me bal, pe kitero i Ot pa Lubanga; meno bedo lim pa ajwaki.

17Ikare meno Kajael rwot me Ciria ocito olwenyo ikom taun me Gat ci oloyo lweny woko; ka dok oloke kalweny ikom Jerucalem. 18Ci Yoaci rwot me Juda okwanyo gityer mayam kidyero ducu, ma kwarine Yekocapat ki Jekoram ki Akajia ma luker pa Juda yam gudyero ki Rwot, ci omedo ikom mot ma en kikome odyero, kacel ki lwak jabu ducu ma kinongo i ot kano lim ma i Ot pa Lubanga ki ma i otker ducu, ci ocwalo bot Kajael rwot me Ciria. Ka Kajael oa ci pe olwenyo ikom i Jerucalem.

19Lok kom Yoaci mudonge ducu, ki gin ducu ma en otiyo, kicoyo i Buk me Tekwaro pa Luker me Juda. 20Ludito monye aryo Jojakar wod pa Cimeat ki Yekojabad wod pa Comer gupiro lok, ci guneko Yoaci i ot pa Millo, matye i kora yoo ma dok i Cilla. 21Kiyiko Yoaci kacel ki kwarine i gangkal pa Daudi, ci wode Amajia oleyo katyene.