2 Luker 13

Loc pa Yekoakaj rwot me Icrael

1I mwaka me pyere aryo wiye adek me loc pa Yoaci wod pa Akajia rwot me Juda, en aye Yekoakaj wod pa Yeku ocako iye loyo jo Icrael ki i Camaria, ci obedo kaloc pi mwaka apar wiye abiro. 2En obedo katiyo gin manen marac iwang Rwot Lubanga, kun lubu bal pa Jeroboam wod pa Nebat ma en omiyo jo Icrael bene gubalo i yo acelu; en pe obwoto lubu tim marac. 3Ci kiniga pa Rwot Lubanga otuge ikom Icrael, ma omiyo Kajael rwot me Ciria, ki Ben-adad wod pa Kajael obedo kalweny ikomgi kare ki kare. 4Lacen Yekoakaj olego kun bako doge bot Rwot Lubanga, ci Rwot owinyo kokone; pien oneno aun pa jo Icrael, kit ma rwot me Ciria unugi kwede. 5Ma omiyo Rwot Lubanga omiyo lalar bot jo Icrael, ci gubwot ki i cing jo Ciria, ci jo Icrael gubedo i pacogi kit ma con ca. 6Ento pe gubwoto lubu kit bal pa jo me ot pa rwot Jeroboam ma gumiyo jo Icrael bene gubedo kalubuni, ento gumede kalubugi. Ki yen ma kipayo pi cal jok ma dako ma kilwongo Acera bene onongo pud tye i Camaria. 7Rwot oweko Yekoakaj pe odong ki monye mo, kono wegi aguragura pyere abic keken, ki gadigadi lweny apar, ki acikari alip apar ma giwoto ki tyen gi; pien rwot me Ciria onekogi otyeko woko, omiyo gurade piny macalo putu apwa ma kinyono.

8Lok kom Yekoakaj mudonge ducu, ki gin mayam otiyo kityeko coyone i Buk me Tekwaro pa Luker me Icrael. 9Kitmeno Yekoakaj oto, oywe kacel ki kwarine, ci kiyiko i Camaria, Yekoac ma wode aye oleyo katyene.

Loc pa Yekoac rwot me Icrael

10I mwaka me pyere adek wiye abiro me loc pa Yoaci rwot me Juda, en aye Yekoac wod pa Yekoakaj ocako iye loyo jo Icrael ki i Camaria, ci obedo kaloc pi mwaka apar wiye abicel. 11En bene obedo katiyo gin manen marac iwang Rwot. Pe obwoto lubu lwak bal pa Jeroboam wod pa Nebat, ma en omiyo jo Icrael bene gubaloni; ento obedo ka lubugi. 12Lok kom Yekoac mudonge ducu, ki gin ducu ma otiyo, ki tek mere mayam olwenyo kwede ikom Amajia rwot me Juda, kityeko coyone i Buk me Tekwaro pa Luker me Icrael. 13Yekoac oto, oywe kacel ki kwarine, ka Jeroboam ocako bedo iwi komker mere, ci Yekoac kiyiko i Camaria kacel ki luker me Icrael.

To pa Elica

141

Ikare ma two omako Elica, ma en aye two ma bineke, Yekoac rwot me Icrael ocito bote ci okok inyime kun waco ni, “Wora, wora! Gin ango ma wegi gadigadi lweny me Icrael ki wegi aguragura bitwero labongo in do ya!” 15Ci Elica owaco bot Yekoac ni, “Mak atum ki aterogu”; ci en omako atum ki aterogu. 16Ci dok owaco bot rwot me Icrael ni, “Tel atum”; ci otelo, ci Elica oketo cinge iwi cing rwot, 17kun wace ni, “Yab dirica ma tung kunyango”; ci oyabo. Elica dok owaco bote ni, “Ba atero”; ci obayo. Ci owaco ni, “In ibedo atero pa Rwot me loc! In ibedo atero me loyo jo Ciria! Pien ibilweny ki jo Ciria i Apek nio ka i tyekogi ducu.” 18Dok owaco ni, “Mak atero”; ci omakogi. Ci dok owaco bot rwot me Icrael ni, “Googi ikom ngom”; ci ogoyo tyen adek, ci ogiko. 19Ci Elica okeco ikome kun waco ni, “Kono nene igoyo ngom tyen abic nyo abicel, kono nene iloyo jo Ciria nio ka ityekogi matwal. Ento in dong ibilweny kwedgi ci ibiloyogi tyen adek keken.”

20Kitmeno Elica oto, ci kiyike. I karenu buca mony pa luyak ma a ki i lobo Moab onongo gibino katimo tim aranyi ikom lobo Icrael i dog oro mwaka ki mwaka. 21Ikare mo, ka onongo kicito kayiko laco mo, ci nen, buca mony pa luyak gutuc, ci luyik gubolo kom dano mutoni i lyel2 pa Elica. Ka kom danoni ogudu cogo pa Elica, ci ocer woko cut, ci otugi a malo ocung.

Lweny ikin lobo Ciria ki Lobo Icrael

22Rwot Kajael me Ciria obedo ka unu jo Icrael ikare ducu me loc pa Yekoakaj. 23Ento Rwot onyutu ber mere botgi kun kica make ikomgi, ci oloke botgi pi gicikene mayam oketo ki Abraim, Icaka ki Yakobo. En pe omitoni ki tyekgi woko; dok bene pe oryemogi ki inyime nio wa onyo.

24Ka Kajael rwot me Ciria oto, ci wode Ben-adad odoko rwot kun leyo katyene. 25Ci Yekoac rwot me Icrael wod pa Yekoakaj omayo taun mogo ma Kajael yam oyako ki bot wone Yekoakaj ki i cing Ben-adad wod pa Kajael ikare me mony. Yekoac obedo kalweny ikome ci oloyo en tyen adek, ci odwoko taun ducu pa Icrael woko cen.