2 Luker 14

Loc pa Amajia

(2 Tek 25:1-24)

1I mwaka me aryo me loc pa Yekoac wod pa Yekoakaj rwot me Icrael, en aye Amajia wod pa Yekoac rwot me Icrael ocako iye loc. 2En ocamo ker ma mwaka me dite oromo pyere aryo wiye abic, ci obedo kaloc pi mwaka pyere aryo wiye abongwen ki i Jerucalem. Mine nyinge Yekoadin me Jerucalem. 3En obedo katiyo gin manen atir iwang Rwot, ento pe obedo rom ki kwarone Daudi; en obedo katiyo gin ducu kit ma wone Yekoac yam obedo katiyone. 4Ento wang jogi ma iwi godi pe omukugi woko; lwak pud gumede katumu gitum ki wango odok eceta iwang jogi ma iwi godi. 5Ka kere dong omoko, ci oneko lutice mayam guneko woneni woko. 61Ento pe oneko lutino pa lunek, kit macalo yam kicoyo i buk me cik pa Moses, ma Rwot ociko ni, “Won latin pe kibineko pi bal pa wode, nyo latin pi bal pa wone; ento dano acel acel bito pi bale kikome.”

7Amajia yam oneko jo Edom ma giromo alip apar ki i nota me kado, ka omayo taun madit me Cela ikare ma olwenyo ikome, ci ocako nyinge ni Jokteel, dok bene pud kilwongo kitmeno nio wa onyo.

8Dok Amajia ocwalo lukwena bot Yekoac ma wod pa Yekoakaj, wod pa Yeku, rwot me Icrael, kun waco bote ni, “Bin wek wacam co wanene wang ki wang.” 9Yekoakaj odwoko lok bot Amajia rwot me Juda ni, “Yam okutu mo ma iwi Lebanon ocwalo kwena bot yat cedar me Lebanon kun waco bote ni, ‘Miya nyari wek anyom ki woda.’ Ci lee tim mo me Lebanon ma owok ki kunu onyono okutunu piny. 10In iloyo Edom ada Amajia, omiyo wii opil mada. Wek awaka meno oromi, dok i bed kwede mot i paconi. Pingo irobo dog dano me kelo ayela ikom in wek ipot kacel ki Juda?”

11Ento Amajia pe owinyo. Omiyo Yekoakaj rwot me Icrael ocito, ci en ki Amajia gucamo co gurwate wang ki wang i lweny i Bet-cemec, ma gang me Juda. 12Ci Icrael oloyo Juda, ci dano acel acel oringo woko i pacone.

13Yekoac rwot me Icrael omako Amajia rwot me Juda wod pa Yoaci ma wod pa Akajia ki i Bet-cemec, ka ocito wa i Jerucalem ci omuku cel me Jerucalem maromo mita miya aryo kulu, nia ki i dog cel pa Epraim nio kwede wa i dog cel ma i twok gang. 14Ci en oyako jabu ki ryal ducu ki atabo ducu ma onongo i Ot pa Lubanga, ki i ot kano lim ma iot pa rwot, kacel ki jo ma kimako me akoka, ci odok kwede wa i Camaria.

15Lok kom Yekoac mudonge ducu ma en otiyo, ki teke ducu, ki kit mayam olwenyo kwede ki Amajia rwot me Juda, kityeko coyone iBuk me Tekwaro pa Luker me Icrael. 16Yekoac oto, oywe kacel ki kwarine, ci kiyike i Camaria kacel ki luker me Icrael. Wode Jeroboam aye oleyo katyene.

17Ka Yekoac rwot me Icrael oto, ci Amajia rwot me Juda kong dok obedo kwo mwaka apar wiye abic. 18Lok kom Amajia mudonge ducu kityeko coyone i Buk me Tekwaro pa Luker me Juda. 19Jo mogo gucako piro lok ikom Amajia ki i Jerucalem, ci olwi oringo woko i Lakic. Ento gucwalo dano i kore wa i Lakic, ci kineke woko ki kunu. 20Gukelo kome ki aguragura, ci kiyike i Jerucalem kacel ki kwarine i taun madit pa Daudi. 21Ci lwak ducu ma i Juda gutingo Ajaria2 ma mwaka me dite romo apar wiye abicel, ci guketo en odoko rwot me leyo katyen wone Amajia. 22I nge to pa rwot Amajia, ma onongo dong kityeko yike woko kacel ki kwarine, en aye Ajaria ogero Elat ka odwoko cen ite loc me Juda.

Loc pa Jeroboam me aryo me Icrael

23I mwaka me apar wiye abic me loc pa Amajia wod pa Yoaci rwot me Juda, en aye Jeroboam wod pa Yekoac rwot me Icrael ocako iye loc ki i Camaria, ci obedo kaloc pi mwaka pyere angwen wiye acel. 24En obedo katiyo gin manen marac iwang Rwot; pe obwoto lubu lwak bal pa Jeroboam wod pa Nebat, ma en omiyo jo Icrael bene gubaloni. 253En odwoko wang lobo pa Icrael kit mayam tye con, cake ki i yoo ma donyo i Kamat nio kwede wa i nam ma i Araba, kit macalo Rwot Lubanga pa Icrael yam owaco, ma oloko ki i dog latice lanebi Yona wod pa Amittai, ma onongo a ki i Gat-keper.

26Pien Rwot onongo oneno atwom pa jo Icrael odoko lit tutwal, pien ngat mo pe odong kunu, kadi opii nyo anywali, dok lakony Icrael mo bene onongo peke. 27Ento Rwot onongo pe yam owaconi ebijwayo nying Icrael woko ki ite polo, omiyo olarogi ki i cing Jeroboam wod pa Yekoac.

28Lok kom Jeroboam mudonge ducu, ki gin ma otiyo ducu, ki tek mere ducu, ki kit mayam olwenyo kwede, ki kit mayam odwoko kwede Damaciko ki Kamat i lobo Icrael, ma onongo yam kong gubedo i cing Juda, kityeko coyone i Buk me Tekwaro pa Luker me Icrael. 29Ci Jeroboam oto, ci kiyike kacel ki kwarine; wode Jekaria aye oleyo katyene.