2 Luker 15

Loc pa Ajaria

(2 Tek 26:1-23)

1I mwaka me pyere aryo wiye abiro me loc pa Jeroboam rwot me Icrael en aye Ajaria wod pa Amajia, rwot me Juda, ocako iye loc. 2En ocamo ker ma mwaka me dite romo apar wiye abicel, ci obedo kaloc ki i Jerucalem pi mwaka pyere abic wiye aryo. Mine nyinge Yekolia me Jerucalem. 3En obedo katiyo gin manen atir iwang Rwot, kun lubu gin ducu mayam wone Amajia otiyo. 4Kadi bed kumeno, wang jogi ma iwi godi pe omukugi woko; lwak pud gumede ki tumu gitum ki wango odok eceta iwang jogi ma iwi godi. 5Rwot opwodo rwot Ajaria, ci odoko ladobo nio wa inino me tone, kun bedo i ot kakene. Yocam ma wod pa rwot aye obedo ladit maloyo ode, kun loyo kwede lwak ma i lobo meno.

6Lok kom Ajaria mudonge ducu, ki gin ducu mayam otiyo, kityeko coyone i Buk me Tekwaro pa Luker me Juda. 71Ajaria oto, ci kiyike kacel ki kwarine, i taun madit pa Daudi. Yocam ma wode aye oleyo katyene.

Loc pa Jekaria me Icrael

8I mwaka me pyere adek wiye aboro me loc pa Ajaria rwot me Juda en aye Jekaria wod pa Jeroboam ocako loyo iye jo Icrael ki i Camaria pi dwe abicel. 9En obedo katiyo gin manen marac iwang Rwot, kit mayam kwarine gutiyo. Pe obwoto lubu kit bal pa Jeroboam wod pa Nebat, ma en omiyo jo Icrael bene gubaloni. 10Calum wod pa Jabec opiro lok ikome, ci obino ocobe ki pala lucwan ikin dano ki i Ibleam ci oneke woko, ka dong odoko rwot ma kakare.

11Lok kom Jekaria mudonge ducu dong kityeko coyone i Buk me Tekwaro pa Luker me Icrael. 122Man aye lok ma Rwot yam ocike ki Yeku ni, “Likwayi gibibedo iwi komker me Icrael nio wa i yalwak me angwene”, ci otime kitmeno.

Loc pa Calum rwot me Icrael

13Calum wod pa Jabec ocako loc i mwaka me pyere adek wiye abongwen me loc pa Ujia rwot me Juda, ci obedo kaloc pi dwe acel ki i Camaria. 14Lacen Menakem wod pa Gad oa ki i Tirja, obino i Camaria, ci ocobo Calum wod pa Jabec oneko woko, ci odoko rwot ma kakare.

15Lok kom Calum mudonge ducu, ki lok ma en opiro dong kityeko coyone i Buk me Tekwaro pa Luker me Icrael. 16Ikare ma Menakem oa ki i Tirja, en ojwero taun me Tapua woko, ki jo ma gibedo iye ducu, ki taun ducu ma, nia wa i Tirja; pien pe guye ni en odony i igi, ma omiyo ojwerogi woko, kun ryako i mon muyac ducu ma kunu.

Loc pa Menakem me Icrael

17I mwaka me pyere adek wiye abongwen me loc pa Ajaria rwot me Juda, en aye Menakem wod pa Gad ocako iye loyo jo Icrael, ci obedo kaloc pi mwaka apar i Camaria. 18En obedo katiyo gin manen marac iwang Rwot; ikare me kwone ducu pe obwoto lubu kit bal pa Jeroboam wod pa Nebat, ma en oweko jo Icrael bene gubaloni. 19Ci Pul rwot me Aciria obino kamonyo lobo; ci Menakem omiyo bot Pul ryal maromo talanta alip acel, wek okonye pi miye tek me moko kere maber i lobone. 20Lim meno Menakem ojogo ki bot jo Icrael ma lulonyo ducu, kun ngat acel acel oculu cekel me ryal pyere abic me amiya bot rwot me Aciria, omiyo rwot me Aciria odok cen i lobone.

21Lok kom Menakem mudonge ducu, ki gin ducu mayam otiyo, kityeko coyone i Buk me Tekwaro pa Luker me Icrael. 22Menakem oto, ci kiyike kacel ki kwarine, ci wode Pekakia aye oleyo katyene.

Loc pa Pekakia rwot me Icrael

23I mwaka me pyere abic me loc pa Ajaria rwot me Juda en aye Pekakia wod pa Menakem ocako iye loyo jo Icrael, ci obedo kaloc ki i Camaria pi mwaka aryo. 24En obedo katiyo gin manen marac iwang Rwot, pe obwoto lubu kit bal pa Jeroboam wod pa Nebat, ma en oweko jo Icrael bene gubaloni. 25Ci Peka wod pa Remalia ma ladit pa acikarine opiro lok ikome, kacel ki jo pyere abic me Gilead, ci oneke woko i Camaria, ki i gogo me ot pa rwot, ci en odoko rwot ma kakare.

26Lok kom Pekakia mudonge ducu, ki gin mayam otiyo ducu, kityeko coyone i Buk me Tekwaro pa Luker me Icrael.

Loc pa Peka rwot me Icrael

27I mwaka me pyere abic wiye aryo me loc pa Ajaria rwot me Juda, en aye Peka wod pa Remalia ocako iye loyo jo Icrael, ci obedo kaloc ki i Camaria pi mwaka pyere aryo. 28En obedo katiyo gin manen marac iwang Rwot; pe obwoto lubu kit bal pa Jeroboam wod pa Nebat, ma en omiyo jo Icrael bene gubaloni.

29Ikare pa Peka rwot me Icrael, en aye Tiglat-Pilecer rwot me Aciria obino ci omako taun madito magi: Ijon, Abel-Bet-Maaka, Janoa, Kedec ki Kajor kacel ki Gilead, Galilaya ki lobo Naputali ducu; ci oyako dano oterogi i opii wa i Aciria.

30Kocea wod pa Ela opiro lok ikom Peka wod pa Remalia, ci oneko woko, ka dong odoko rwot ma kakare, i mwaka me pyere aryo me loc pa Yocam wod pa Ujia.

31Lok kom Peka mudonge ducu, ki gin ducu mayam otiyo, kityeko coyone i Buk me Tekwaro pa Luker me Icrael.

Loc pa Yocam rwot me Juda

(2 Tek 27:1-9)

32I mwaka me aryo me loc pa Peka wod pa Remalia, en aye Yocam wod pa Ujia rwot me Juda ocako iye loc. 33En ocamo ker ma mwaka me dite onongo romo pyere aryo wiye abic, ci obedo kaloc i Jerucalem pi mwaka apar wiye abicel. Nying mine Yeruca ma nya pa Jadok. 34En obedo katiyo gin manen atir iwang Rwot, kun lubu gin ducu mayam wone Ujia otiyo. 35Kadi bed kumeno, wang jogi ma iwi godi pe omukugi woko; lwak pud gumede katumu gitum ki wango odok eceta iwang jogi ma iwi godi. En ogero dogola mamalo me Ot pa Lubanga.

36Lok kom Yocam ducu, ki gin ducu mayam otiyo, kityeko coyone i Buk me Tekwaro pa Luker me Juda. 37Ikare meno Rwot Lubanga ocwalo Rejin rwot me Ciria kacel ki Peka wod pa Remalia kamonyo Juda. 38Yocam oto, ci kiyike kacel ki kwarine i taun madit pa kwarone Daudi. Wode Akaj aye oleyo katyene.