2 Luker 16

Loc pa Akaj rwot me Juda

(2 Tek 28:1-27)

1I mwaka me apar wiye abiro me loc pa Peka wod pa Remalia, en aye Akaj wod pa Yocam rwot me Juda ocako iye loc. 2Akaj ocamo ker ma mwaka me dite pyere aryo, ci obedo kaloc i Jerucalem pi mwaka apar wiye abicel. En pe obedo katiyo gin manen atir iwang Rwot Lubangane, kit ma kwarone Daudi yam otiyoni. 31Ento obedo kalubu kit pa luker me Icrael. En bene omedo ki wango wode me gityer, kun lubu kwede tim me kwer pa rok mukene ma Rwot yam oryemogi woko ki inyim jo Icrael. 4En obedo katumu gitum ki wango odok eceta iwang jogi ma iwi godi mabocone ducu ki iwi cere ki iwang ayweya ma ite yadi ma potgi oluk. 52

Rejin rwot me Ciria, ki Peka wod pa Remalia, rwot me Icrael, gutingo mony guterogi kalweny ikom Jerucalem, ci gurumu Akaj dyere, ento pe guloye. 6Ikare meno rwot me Edom odwoko Elat ite loc me Edom, ka oryemo Lujuda woko ki i Elat; ci jo Edom gucako bino i Elat, gubedo iye nio wa onyo. 7Akaj ocwalo lukwena bot Tiglat-Pilecer ma rwot me Aciria kun waco ni, “An latici, dok an a wodi, bin wek i lara ki i cing rwot me Ciria ki rwot me Icrael ma gitye kalweny ikoma.” 8Akaj dok okwanyo ryal ki jabu ma onongo tye i Ot pa Lubanga, ki i ot kano lim ma i ot pa rwot, ci ocwalo me mot bot rwot me Aciria. 9Rwot me Aciria owinyo kokone, ci otingo mony ocito kwede i Damaciko, ocako yako jo ma kunu oterogi i opii wa i Kir, ci oneko Rejin woko.

10Ka rwot Akaj ocito i Damaciko kajolo wi Tiglat-Pilecer rwot me Aciria, ci oneno keno tyer matye i Damaciko, ci ocwalo cal me keno tyer meno bot ajwaka Uria, ki kit tiyone, kun nyutu kite ducu ki kore. 11Ajwaka Uria ocako cano keno tyer kun cweyo kit ma rwot Akaj onongo ocwalo bote ki i Damaciko. En otimo kumeno ma onongo rwot Akaj peya odwogo ki i Damaciko. 12Ka rwot odwogo ki i Damaciko, ci ocito ongiyo keno tyer, ci oito iye malo, 13ci owango gitume me awanga, ki gityer mere me moko kwon, ka oonyo gityer amata, ocoro remo me gityer mere me lakwecwiny ikom keno tyer. 143Ci okwanyo keno tyer me nyonyo bronze mayam tye inyim Rwot, ma onongo bedo inyim ot, i kabedo ma ikin keno tyere ki Ot pa Lubanga, ci oketo tung kumalo me keno tyer mere. 15Rwot Akaj ociko ajwaka Uria kun waco ni, “Wang gitum awanga me odiko iwi keno tyer maditi, ki gityer me moko kwon me otyeno, ki gitum awanga ma rwot omiyo, ki gityere me moko kwon, kacel ki gitum awanga pa lwak ducu ma i lobo, ki gityergi me moko kwon, ki gityergi me amata. Ibicoro remo me gitum awanga ducu ikome bene, ki remo me gitum mukene ducu. Ento keno tyer me nyonyo bronze bibedo mera, me penyo iye dog Rwot.” 16Ajwaka Uria otiyo gin ducu kitmeno, kit ma rwot Akaj ocikoni. 174

Rwot Akaj ongolo mola ma apada ki ikom lutino gadigadi, ci okwanyo otako ki ikomgi, ka okwanyo nam woko ki ikom twoni mola ma onongo gitye i tereni, ci oketo ikom godi ma kipetogi piny. 18Ki yoo ma kiumu wiye ma kiwok ki iye i ceng cabit, ki dogola pa rwot matye woko, en okwanyogi woko ki ikom Ot pa Lubanga, pi yomo cwiny rwot me Aciria.

19Lok kom Akaj mudonge ducu, ki gin mayam en otiyo, kityeko coyone i Buk me Tekwaro pa Luker me Juda. 205Akaj oto, ci kiyike kacel ki kwarine, i taun madit pa Daudi; wode Kejekia aye oleyo katyene.