2 Luker 17

Kocea rwot me Icrael

1I mwaka me apar wiye aryo me loc pa Akaj rwot me Juda, en aye Kocea wod pa Ela ocako loyo iye jo Icrael ki i Camaria ci obedo kaloc pi mwaka abongwen. 2En obedo katiyo gin manen marac iwang Rwot, ento pe obedo marom ki luker me Icrael ma gukwongo nyime. 3Calmanecer lawi rwodi me Aciria obino omonye; Kocea oilo cinge bote, ci ocako onyo mucoro bot Calmanecer mwaka ki mwaka. 4Ento lacen i mwaka mo acel, rwot me Aciria oniang ni Kocea odobe woko; pien ocwalo lukwena bot Co, rwot me Ejipt, ci okwero onyo mucoro kit mayam onongo onyo kwede mwaka ki mwaka, omiyo rwot me Aciria omake, ci otweye woko i buc.

Camaria opoto i cing Calmanecer

5Ci Calmanecer omonyo lobo Icrael ducu, ka obino kwede wa i Camaria, ci orumu lobo meno dyere pi mwaka adek. 6I mwaka me loc pa Kocea me abongwene en aye rwot me Aciria omayo kwede taun me Camaria, ci otero jo Icrael i opii wa i Aciria ci oketogi i taun madit me Kalak ki inget Kabor, ma en aye kulu ma i Gojan, ki i taun pa jo Medi.

7Lok man otime kitmeno pien jo Icrael onongo gubalo inyim Rwot Lubangagi, mayam okwanyogi woko ki i lobo Ejipt, ki i cing Parao rwot me Ejipt. Dok gubedo ka woro lubanga mogo mukene, 8kun gilubu kit pa lurok mayam Rwot oryemo woko ki inyim jo Icrael, ci gucako lubu yo ma pat ma luker me Icrael gukelo. 9Jo Icrael gubedo katimo gin ma pe kakare inyim Rwot Lubangagi i mung. Gugero lwak odi iwang jogi meggi ken gi iwi godi inget taun gi ducu, cake ki ikom lubele pa lukurpiny nio kwede wa ikom taun ma kirumu ki cel gogo. 101Gucibo wir jogi dok gucomo wir cal jok ma dako ma kilwongo Acera iwi godi ma bocone ducu ki iwi cere ki iwang ayweya ma ite yadi ma potgi oluk. 11Gubedo ka wango odok eceta iwang jogi iwi godi ducu, macalo lurok mayam Rwot oryemo woko ki inyimgi. Gubedo katiyo gin maracu bene, ma omiyo kiniga omako Rwot. 12Gubedo ka woro cal lubangagu mayam Rwot ojukugi pire kun waco ni, “Pe wubitiyo man.” 13Rwot obedo kapoyo wi jo Icrael ki jo Juda, kun lanebi acel acel ki lanen acel acel cikogi ni, “Wuloke, wuwek kitwu maracuni, wumak lok ma aciko ducu, ki cik mera ducu, kun wulubu cik ducu mayam aciko ki kwariwu, ki ma abedo kacwalo botwu ki i dog lutica ma gin lunebi.” 14Ento yam pe guworo doge; gubedo jo ma ngutgi nwang, macalo kwarigi con tye kwede, mayam pe guye Rwot Lubangagi. 15Gucayo cike ducu, ki gicike mayam oketo ki kwarigi, ki lok ma obedo kapoyo ki wigi. Gubedo ka woro cal jogi ma konygi peke, ma omiyo gin bene gudoko jo ma konygi peke. Gubedo kalubu kit pa lurok mayam orumugi dyereni, jo mayam Rwot ojukugi ikomgi, ni pe gutim kit ma gin gitiyoni. 162Gubwoto cik ma Rwot Lubanga ociko woko ducu, gutimo pirgi ken gi cal lutino twoni aryo me jabu ma kiliyo aliya; ka dok gucomo wir cal me woro jok ma dako ma kilwongo Acera; gucako woro ceng ki dwe wa ki lakalatwe ducu ma i polo, kun gitiyo bot Baal bene. 173 Guwango awobegi ki anyiragi me gityergi, kun gityeto bene bot lutyet ki lungi i dyel; gumine keken gi pi tiyo gin manen marac iwang Rwot, kun gimiyo kiniga make. 18Piman, kiniga omako Rwot matek ikom jo Icrael, ci oryemogi woko ki inyime; ngat mo pe odong kono ker pa Juda keken aye odong.

19Ento jo pa Juda bene yam pe gumako lok ma Rwot Lubangagi ociko; gin gumako dok gulubu kit tim pa lurok ma jo Icrael gulubu. 20Rwot okwero rok me Icrael woko ducu, ci oketogi i atwom mapek, omiyogi i cing luyakgi, nio ka oryemogi woko ki inyime.

21Ka yam Rwot opoko Icrael woko ki ikom likwayo pa Daudi, gin guketo Jeroboam wod pa Nebat odoko rwotgi. Ci Jeroboam odwoyo wi jo Icrael woko ki kalubu gin ma Rwot ociko, ci omiyo gupoto i bal madito. 22Jo Icrael gulubu bal ducu mayam Jeroboam otiyo; pe gubwoto tiyogi, 23nio ka Rwot oryemogi woko, macalo yam oloko ki i dog lutice ducu ma lunebi. Kitmeno kicoko jo Icrael woko ki i lobogi, ci kiterogi wa i Aciria me bedo opii nio wa onyo.

Aciria okelo rok mukene me bedo i Camaria

24Rwot me Aciria yam okelo dano ki i Babilon, i Kuta, i Aya, i Kamat ki i Ceparvaim, ci oketogi gubedo i taun me Camaria, guleyo ka jo Icrael. Gucamo lobo me Camaria odoko meggi, ci gubedo i taun gi madito ducu. 25Ikare ma gucako bedo i lobonu, gin pe guworo Rwot; omiyo Rwot ocwalo lwak labwor ma oneko jo mogo ikin gi. 26Ci kitito loke bot rwot me Aciria ni, “Rok ducu ma iterogi kabedo i taun me Camariani gin pe gingeyo cik pa lubanga me lobonu, omiyo ocwalo lwak labwor ikin gi, ci nen, gitye kanekogi woko, pien gin pe gingeyo cik pa lubanga me lobonu.” 27Ci rwot me Aciria ociko kun waco ni, “Wucwal ajwaka mo acel ki ikin jo mayam wukelogi ki kunu, wek en ocit opwony jo manyen ma gibedo kunu ki cik pa lubanga me lobonu.” 28Ci ajwaka mo acel ki ikin ajwaki mayam ki terogi kunu ma oa ki i Camaria odwogo cen, obedo i Betel, ci opwonyogi ki kit ma omyero guwor Rwot Lubanga.

29Ento rok acel acel ducu gumede mere ameda katiyo cal lubangagi ken gi, kun giketogi iwang jogi ma iwi godi mayam Lucamaria gutiyo. Rok acel acel gutiyo cal lubangagi i taun ma gibedo iye. 30Jo Babilon gutiyo cal jok Cukot-benot, jo Kut gutiyo cal jok Nergal, jo Kamat gutiyo cal jok Acima; 31jo Aya gutiyo cal jok Nibaj ki jok Tartak. Jo Ceparvaim gubedo kawango lutinogi ki mac bot Adramelek ki Anamelek ma gin jogi pa jo Ceparvaim. 32Jo magi ducu bene guworo Rwot Lubanga, ento gukwanyo kwayi dano ducu ki ikin gi ken gi me bedo ajwaki me wang jogigi ma iwi godi me tyero gityer pirgi. 33Kitmeno gin yam guworo Rwot Lubanga, ento gin bene gutiyo bot lubanga ma meggi, malube ki kit ma giworo kwede ki lubangagi i rok mapatpat mayam ki kwanyogi ki iye. 344Kadi wa ikare man jo magi pud gilubu kit yogi maca. Gin pe giworo Rwot, dok pe gilubu cike ducu, nyo lok ma en ongolo, nyo cik ma en oketo, kadi wa cik mo mayam Rwot ociko ki likwayo pa Yakobo ma ocako nyinge ni Icrael. 355Rwot yam oketo gicike kwedgi, kun cikogi ni, “Pe wubiworo lubanga mukene ducu; pe wuryebe inyimgi, pe wutii botgi, pe wutum gitum botgi. 366Ento wubiworo Rwot mayam okwanyowu woko ki i lobo Ejipt ki tek madwong ki lanyut ma en otiyo; wubiworo en keken dok wubiryebe inyime, en aye wubitumu gitum bote. 37Wubigwoke kun wulubu cik ducu, ki lok ma Rwot ongolo, cik ma en oketo, ki ginacika ma con ocoyo pirwu kare ducu. Pe wubiworo lubanga mukene ducu. 38Pe wiwu biwil ikom gicike ma dong atyeko ketone kwedwu. Pe wubiworo lubanga mukene ducu. 39Wubiworo Rwot Lubangawu, en bene aye bilarowu ki i cing lumerokwu ducu.” 40Ento yam gukwero woro doge woko, ento gubedo kalubu kitgi macon ca aye.

41Kitmeno rok meno ducu gubedo ka woro Rwot kun giworo bene cal lubangagi ma gupayo; lutinogi ki likwayogi bene gubedo katiyo kit mayam kwarigi gutiyoni, pud gitiyo kitmeno nio wa onyo.