2 Luker 18

Loc pa Kejekia rwot me Juda

(2 Tek 29:1-2; 31:1)

1I mwaka me adek me loc pa Kocea wod pa Ela rwot me Icrael, en aye Kejekia wod pa Akaj rwot me Juda ocako iye loc. 2En ocamo ker ma mwaka me dite pyere aryo wiye abic, ci obedo kaloc pi mwaka pyere aryo wiye abongwen ki i Jerucalem. Nying mine Abi, ma nya pa Jekaria. 3Kejekia obedo katiyo gin manen atir iwang Rwot kun lubu gin ducu mayam kwarone Daudi otiyo. 41 En omuku lwak wang jogi ma iwi godi, oturu wir jogigu ducu, ka otongo cal jogi ma kicomo pi woro jok ma dako ma kilwongo Acera woko, ka dok ongido twol mola mayam Moses otiyoni, pien nio wa ikare meno onongo jo Icrael pud giwango odok eceta pi worone. Onongo kilwongo twol molanu ni Nekucitan. 5Kejekia obedo kageno Rwot, Lubanga me Icrael, ma omiyo pe ngat mo onen marom ki en ki ikin luker me Juda ducu ma gulubu ngeye, kadi wa ikin luker ma gukwongo nyime bene. 6En obedo lagen inyim Rwot matek; pe obwoto lubu lok pa Rwot, ento obedo kalubu cik ducu mayam Rwot ociko ki Moses. 7Omiyo Rwot yam tye kwede, ci Kejekia onongo gum i gin ducu ma en otiyo. En ojemo ikom rwot me Aciria, ci okwero bedo ite loce woko. 8Kejekia olwenyo ki jo Piliciti ci oloyogi woko. En omayo lobogi nio wa i Gaja ki lobo ma ingete; oloyogi i kabedogi ducu, cake ki ikom lubele pa lukurpiny nio kwede wa i taun gi madito ma kirumugi ki cel gogo.

9I mwaka me angwen me loc pa Kejekia, ma en aye mwaka me abirone me loc pa Kocea wod pa Ela rwot me Icrael, Calmanecer rwot me Aciria obino kalweny ikom Camaria ci orumu woko ki monye. 10I nge mwaka me adeke, en aye kiloyo kwede ki Camaria; man otime i mwaka me abicel me loc pa Kejekia, ma en aye mwaka me abongwen me loc pa Kocea rwot me Icrael. 11Rwot me Aciria ocoko jo Icrael ci oterogi i opii wa i Aciria ci oketogi i taun madit me Kalak, ki inget Kabor, ma en aye kulu ma i Gojan, ki i taun madito pa jo Medi. 12Camaria opoto i cing Aciria pien jo Icrael onongo gukwero woro dog Rwot Lubangagi woko, ento gukalo wi gicikene, kacel ki lok ducu mayam Moses ma latic pa Rwot ocikogi kwede; pe guwinyo loke kadi ki woro doge bene.

Cenakerib omonyo lobo Juda

(2 Tek 32:1-19; Ica 36:1-22)

13I mwaka me apar wiye angwen me loc pa rwot Kejekia, en aye Cenakerib rwot me Aciria obino kwede kalweny ikom taun madito ducu me Juda ma kirumugi ki cel gogo, ci omayogi ducu. 14Kejekia rwot me Juda ocwalo kwena bot rwot me Aciria wa i Lakic kun waco ni, “An atimo bal; dok cen, wek lweny ikoma obedi, gin ducu ma i bingolo iwiya abiculune.” Ci rwot me Aciria ongolo iwi Kejekia rwot me Juda wel me ryal maromo talanta miya adek, ki jabu maromo talanta pyere adek. 15Kejekia ocwalo ryal ducu ma onongo tye i Ot pa Lubanga, ki i ot kano lim ma i ot pa rwot. 16Ikare meno Kejekia omuku jabu woko ducu mayam kimwono ikom kika me Ot pa Lubanga, ki jabu mayam en Kejekia rwot me Juda omwono kwede okar me dogola, ci otingogi ocwalo bot rwot me Aciria. 17Ento rwot me Aciria ocwalo ludito wi monye adek mucwiny ki mony madit ma gua ki Lakic gucito ka monyo Kejekia i Jerucalem. Ka guo kunu, ci gucito gucung inget yoo pii mamol a ki i joro mamalo, i yoo gudo ma cito i poto kama kiketo iye rangi i bongo. 18Ka guoro dano kalwongo rwot Kejekia, ci Eliakim wod pa Kilkia ma en aye onongo ladit maloyo jami ma i ot pa rwot aye obino botgi, kacel ki Cebna ma karan, ki Joa wod pa Acap, lacoo lok matime. 19Ci ngat acel ki ikin ludito wi mony me Aciria owaco botgi ni wuwac bot Kejekia ni, “Rwot madit me Aciria openyo kuman ni, ‘In i jengo geni ikom gin ango? 20In i tamo ni lok dog bedo rom ki ryeko me lweny ki mony madit me loyo lweny? In mono ijenge ikom anga, ma omiyo i jemo woko ikom Aciriani? 21Nen, kombedi i loko Ejipt odoko odo ma ijenge ikome, kun en lagada ma otur woko, ma bitucu cing dano mo ma ojenge ikome. Meno aye kit ma Parao rwot me Ejipt tye kwede ka ngat mo jenge ikome.’ 22Nyo wubiwaco ni, ‘Wan giwa wajenge ikom Rwot ma Lubangawa!’ Pe en aye ma Kejekia dong omuku wang jogine ma iwi godi, ki keno tyere wokoni, kun waco bot jo Jerucalem ki Juda ni, ‘Wubiworo Lubanga inyim keno tyer man ma i Jerucalem’? 23Wek kong waket lacama! Ladita rwot me Aciria bimiyi aguragura alip aryo, kace in ki tung boti i bitwero nongo wel co marom meno me ngwec i wigi. 24In i bitwero ryemo ladit mony mo me Aciria ma rwome lapiny loyo ningning, kace ijenge ikom Ejipt pi nongo gadigadi lweny ki wegi aguragura? 25Dok bene i tamoni an abino kalweny ikom kabedo man wek atyek woko, labongo twero pa Rwot Lubanga? Wai Rwot Lubanga aye ma owaco bota ni, ‘Cit i lweny ikom lobo man i tyek woko yo!’”

26Cutcut Eliakim wod pa Kilkia, ki Cebna ki Joa guwaco bot Rabcake ni, “Walegi i lok ki wan lutici i leb Aram, pien wawinyo. Pe i lok kwedwa i leb Ibru ma lwak ma gitye iwi cel bene giwinyo.” 27Ento Rabcake ogamo doggi ni, “I tamo ni rwoda ocwala kaloko lok magi bot laditwu ki botwu keken bo, pe wa bot lwak ma gubedo iwi cel bene, ma gin kacel ki wun gukemo can me camo cetgi ken gi kimato lacgi ken gi?”

28Ci Rabcake ocung ocako dange ki dwon malongo i leb Juda ni, “Wuwiny lok pa rwot madit, rwot me Aciria! 29Rwot me Aciria owaco kuman ni, ‘Pe wuwek Kejekia obed kabwolowu, pien en pe bitwero larowu ki i cinga. 30Pe wuwek Kejekia omii wujenge ikom Rwot Lubanga kun wuwaco ni, Rwot Lubanga aye bilarowu dok taun madit man pe kibimiyo i cing rwot me Aciria.’ 31Pe wubed kawinyo lok pa Kejekia; pien man aye lok ma rwot me Aciria owaco ni, ‘Wuyub lok me kuc kweda, ci wukat woko bota; kitmeno ngat acel acel bicamo nyig olok ma i potone, dok ngat acel acel bicamo nyig odurune, ki ngat acel acel bene bimato pii ma i kulune kikome; 32nio ka abiterowu wa i lobo marom ki mewuni, lobo ma ceko ngano ki kongo bwino, lobo ma miyowu mugati ki poto olokgu, lobo ma moo jeituni ki moo kic dwong iye, wek wubed ma komwu yot, wek pe wubed ka to atoya. Pe wubed kawinyo lok pa Kejekia matye ka bwolowu kwedeni kun waco ni, Rwot Lubanga bilarowu. 33Tye lubanga pa lurok mo mayam olaro lobone ki i cing rwot me Aciria? 34Lubanga pa jo Kamat ki Arpad gitye kwene ka? Lubanga pa jo Ceparvaim, nyo Kena ki Iva gitye kwene? Gin gularo Camaria ki i cinga bo? 35Lubanga me lobo mene ki ikin lubanga ducu ma gitye ki lobogi, mayam kong olaro lobone ki i cinga mono, ma omiyo wutamo ni Rwot Lubanga bilaro Jerucalem ki i cingani?’”

36Ento lwak ducu guling alinga, pe gudoke iye lok mo kadi ki acel, pien onongo rwot ociko ni, “Pe wubigamo doge.” 37Ci Eliakim wod pa Kilkia ma en aye ladit maloyo jami ma i ot pa rwot, kacel ki Cebna ma karan, ki Joa wod pa Acap ma lacoo lok matime guyeco bongigi, gucito kwede wa bot Kejekia ci gutite lok ducu ma Rabcake owaco.