2 Luker 19

Kejekia openyo tam ki bot lanebi Icaya

(Ica 37:1-7)

1Ka Kejekia owinyo, ci oyeco bongine woko, ci oume ki bongo cola, ocito kwede wa i Ot pa Lubanga. 2Ci ooro Eliakim ma lalo jami ma i ode, kacel ki Cebna ma karan, ki ajwaki pa Lubanga ma gutegi ma guumu komgi woko ki bongo cola, ci ocwalogi bot Icaya wod pa Amoj, ma lanebi. 3Ci guwaco bote ni, “Kejekia owaco kuman ni, tin nino me can atika, kitye kapwodowa, dok lewic omakowa mada. Wan kombedi watye calo dako ma cawa me nyodone dong oromo, ento peke ki teko me colo latin. 4Rwot me Aciria ocwalo Rabcake ma ladit wi monye ducu ka nywaro Lubanga makwo. Gwok nyo Rwot Lubangani dong otyeko winyo lok me ayet magi ducu ci bipwodo jo ducu ma guloko lok magi. Pimeno dong ileg Lubanga pi jo ma gubwot.” 5Ka lutic pa rwot Kejekia guo bot Icaya, 6ci Icaya owaco botgi ni, “Wuwac bot laditwu ni, ‘Rwot owaco kuman ni, pe ibed ki lworo mo pi lok ma iwinyoni, ma lutic pa rwot me Aciria gubedo kayeta kwede. 7Nen, abikete cwiny mo i iye, ci biwinyo lok ngurunguru mo ma biweko en dok woko wa i lobo tugi; ci abimiyo kineko en woko ki pala lucwan ki i lobo tugi kunu.’”

Jo Aciria dok gucwalo lok me bura mukene

(Ica 37:8-20)

8Ka Rabcake odok, ci onongo rwot me Aciria tye kalweny ikom Libna; pien onongo owinyo ni rwot otyeko a woko ki i Lakic. 9Kace rwot owinyo lok ikom Tiraka rwot me Etiopia, nen en otingo yoo me bino kalweny ikome, en dok ocwalo lukwena bot Kejekia kun waco ni, 10“Wubiwaco bot Kejekia rwot me Juda kit man ni, ‘Pe iwek Lubangani ma ijenge ikomeni obed kabwoli, kun ciko ni Jerucalem pe bipoto i cing rwot me Aciria. 11Nen, in dong ityeko winyo gin mayam luker me Aciria gutiyo ikom lobo ducu, ma gutyekogi woko ducu liweng, ci i tamoni in aye ki bilari? 12Lubanga pa lurok yam pe olarogi, lurok mayam kwarina gutyekogi woko ducu, ma gin aye jo Gojan, jo Karan, jo Recep ki jo Eden mayam gitye i Telacar. 13Rwot me Kamat, nyo me Arpad, rwot me taun madito me Ceparvaim, me Kena, nyo me Iva gitye kwene?’”

14Ka Rwot Kejekia ogamo waraga ki i cing lukwenanu, ci okwano. Ka oa ocito i Ot pa Lubanga, ci oyaro waraga woko piny inyim Rwot. 15Ci olego inyim Rwot kun waco ni, “Ai Rwot, Lubanga pa Icrael, ma ibedo iwi komkeri ka wi lukerubi, in aye Lubanga, in keni ma i loyo lwak ker ducu ma i lobo; in aye i cweyo polo ki lobo. 16Cik iti ai Rwot, i winywa; yab wangi, ai Rwot, i nenwa; kong iwiny lok pa Cenakerib ma ocwalo me cayo Lubanga makwoni. 17Adada, ai Rwot, luker me Aciria gujwero rok ducu wa ki lobogi ducu, 18dok gutyeko bolo lubangagi woko i mac; pien onongo gin pe Lubanga kikome, gin tic me cing dano, yen ki gotgu, ma omiyo kityekogi woko. 19Kitmeno, ai Rwot, abako doga boti, i larwa ki i cinge, wek ker ma iwi lobo ducu onge ni in, ai Rwot, in Lubanga in keni.”

Lok ma Icaya ocwalo bot rwot

(Ica 37:21-38)

20Ci Icaya wod pa Amoj odwoko lok bot Kejekia kun waco ni, “Rwot, Lubanga pa Icrael, owaco ni etyeko winyo legani ma ilego ikom Cenakerib rwot me Aciria. 21Man aye lok ma Rwot owaco ikome ni,

‘Jo Cion gicayi in Cenakerib

gicayi kun gijeri;

jo Jerucalem bene gicayi, kun giyengo wigi ki i ngeyi.

22In itye kacayo anga dok anga mono ma i yetoni?’

In imoro dwoni ikoma,

ikom an ngat Maleng me Icrael kulu kun inena ki wang me awaka!

23In aye ma imiyo lutici gubino kanyate bota, kun iwaco ni,

in ki lwak gadigadi lwenyi

ityeko mayo godi ducu me Lebanon.

Dok iwake bene ni dong ityeko tongo yadi cedar maboco ki kunu woko,

ki yadi ciprec ma becone madani;

dok iwaco beneni, dong idonyo wa i bungane kamabor,

kama yadi ocule iye liking.

24Iwake bene ni ikwinyo wang pii ci imato pii i lobo pa lurok;

dok ni lwak buca mony ma meri gunyono jang kulu Nail ma i lobo Ejipt ci gutwoyo woko.

25In peya iwinyo bo,

ni an aye ma atyeko yubu yub magi wa yam con?

Dok dong atyeko timogi woko kombedi.

Yam ayubu wa ikare macon ca,

ni in myero i tur taun magi ducu ma ki celogi ki cel gogo,

wek i lokgi odok obur ma odure lipim.

26Jo ma gibedo iye gudoko goro;

cwinygi obale, lewic omakogi, gudoko macalo ginapita ma i poto, gicalo lum alita

macalo lum ma otwi iwi ot, ma bware woko ma pud otwi atwiya.

27Ento angeyo lok komi weng, kama i cito iye ki gin ducu ma itiyo.

An bene angeyo jenyeni ikoma.

28Pien ibedo ka jenye ikoma,

dok lok anywari otyeko donyo i ita,

omiyo abirwako golina i umi, abiketo tola i dogi ci abidwoki cen i yoo kama yam i wok ki iye.”

29Lacen Icaya owaco bot rwot Kejekia ni, “Man aye bibedo lanyut boti me poyo wi: i mwaka man wubicamo cam ma otwi kene, i mwaka me aryone wubicamo cam ma dok otwi i okang, ento i mwaka me adeke wubicoyo kodi ci wubikayo, dok wubipito olok ci wubicamo nyige. 30Ki jo ma gubwot ma gudong ki i ot pa Juda gibibedo calo yat ma rwako lwite piny, dok ma nyako nyige. 31Pien jo ma gudong bibedo tye i Jerucalem, ki lwak jo mubwot ki iwi got Cion bene bibedo tye. Man bitime pi mar ma pe loke ma Rwot me mony tye kwede pirwu.

32Pieno Rwot owaco kuman ikom rwot me Aciria ni, ‘En pe bidonyo i taun man, dok pe bibayo nyig atero mo kadi ki acel iye. Pe tye mony mo ma binyiko cok kwede ki kwot, dok bene en pe bitoro cel lobo mo me rumune. 33Yoo mayam en obino kwedeni, aye bibedo yoo acelu ma en bidok kwede bene; en pe bidonyo i taun madit man. Man lok pa Rwot Lubanga kikome. 34An abilwenyo pi taun madit man me larone pira kena, ki pi latica Daudi.’”

35I dyewor meno lamalaika pa Rwot ocito, oneko jo Aciria alip miya acel ki pyere aboro wiye abic ki i gonygi. Ka dano gua malo odiko con, ci nen, gunongo kom jo Aciria ma oto orade lirat. 36Cenakerib rwot me Aciria ogware odok cen i taun madit me Nineve, ci obedo kunu. 37Ka yam en tye ka woro i ot pa lubangane Nicirok, ci awobene Adramelek ki Carejer, guneke woko ki pala lucwan, ci guringo gularo komgi wa i Ararat. Wode Ecar-kadon aye odoko rwot oleyo katyene.