2 Luker 20

Two pa Kejekia

(2 Tek 32:24-26; Ica 38:1-8,21-22)

1Ikare meno two omako Kejekia ma onongo cok to woko. Ci Icaya wod pa Amoj ocito bote, ci owaco bote ni, “Rwot waco kuman ni, ‘Yub odi obed maber, pien i bito woko, twoni pe bicang.’” 2Ka Kejekia owinyo lok man, ci oloko wange ikom kicika ot kun lego ni, 3“Ai Rwot abako doga boti, kong ipo, dok inen kit kwo ma abedo kwede inyimi, kun abedo ngat ma geni, dok alubu in ki cwinya ducu, kun abedo katiyo gin manen maber i wangi.” Ci Kejekia ocako koko matek tutwal ki toncwiny. 4Ikare ma Icaya oa ki inyim rwot, ento ma peya okato woko ki idyekal ma idyere, ci Rwot owaco bote ni, 5“Dok cen, icit iwac bot Kejekia rwot maloyo lwaka ni, ‘Rwot, ma Lubanga pa woru Daudi owaco kuman ni: atyeko winyo kokoni, dok aneno pig wangi bene. Nen, abicango twoni woko; ikom nino me adeke en aye i bicito kwede wa i Ot pa Lubanga. 6Dok abimedo mwaka apar wiye abic ikom wel mwaka me kwoni. Abilaro in ki taun madit man ki i cing rwot me Aciria; abilweny pi taun madit man pira kena ki pi cikena bot latica Daudi.’” 7Ci Icaya odok cen i ot pa rwot ci owaco ki lutic pa rwot ni, “Wureg pok oduru, wek wuket iwang odekene, wek ocang woko.”

8Ci rwot Kejekia openyo Icaya ni, “Gin ango ma binyutu ni Rwot Lubanga bicango twona, ci abicito wa i Ot pa Lubanga inino me adeke?”

9Ci Icaya ogamo ni, “Rwot bimiyi lanyut ma oa ki bote ma nyutu ni en bitiyo gin ma otyeko ciko pireni. Gin ango ma dong iyero; imitoni tipu ocit anyim marom ki rwom apar, kece nyo odok ki ngeye rwom apar?” 10Kejekia odok iye ni, “Tipu nino jwi gire woto mede anyim. Ma ka mede anyim rwom apar; ber iwek odok ki ngeye rwom apar.” 11Ci lanebi Icaya okok bot Rwot, ci Rwot odwoko tipu cen rwom apar kama nene oryene omede ikom gin me poro ceng ma rwot Akaj yam oketo.

Kejekia ojolo lukwena ma gua ki i Babilon

(Ica 39:1-8)

12Ikare meno Merodak-baladan wod pa Baladan rwot me Babilon, ocwalo lukwena ma gukelo waraga kacel ki mot bot Kejekia; pien onongo owinyo ni Kejekia kome lit. 13Kejekia ojologi maber, ci onyutu botgi ot lime ducu, ki ryal, jabu, angwece, moo me wel, ki jami lwenye. Kejekia onyutu gin ducu ma onongo tye i ot kano jamine; gin mo pe odong ma pe onyutugi, ma i ode nyo ma ite kere ducu. 14Lacen lanebi Icaya obino bot rwot Kejekia, ci openye ni, “Jo meno guwaci lok ango? Dok gua ki kwene?” Ci Kejekia ogamo ni, “Jo meno gua ki i lobo mabor, gua wa i Babilon.” 15Ci Icaya dok openyo en ni, “Guneno gin ango ki i odi?” Ci Kejekia ogamo ni, “Jonu guneno jami ducu matye i oda; gin mo pe odong ki i ot kano jamina ma pe anyutu botgi.”

16Ci Icaya owaco bot Kejekia ni, “Dong iwiny lok pa Rwot. 171 Kare dong biromo ma kibitero jami ducu ma i odi, wa ki mayam kwarini gukano nio wa onyo woko wa i Babilon; gin mo pe bidong. 182Ki awobeni mogo ma in inywalo bene ki biterogi woko; dok kibikolo mangi woko, ci gibidoko lutic i gangkal pa rwot me Babilon.” 19Ci Kejekia owaco bot Icaya ni, “Lok pa Rwot ma iwaconi ber mere.” Pien en onongo otamo ni, “Race tye kwene, teke ka wabedo ki kuc ma lobo okwe mot ikare ma pud akwo?”

To pa Kejekia

(2 Tek 32:32-33)

20Lok kom Kejekia mudonge ducu, ki teke ducu, ki kit mayam okwinyo kwede joro ki yoo pii makelo pii wa i dye Jerucalem kityeko coyone i Buk me Tekwaro pa Luker me Juda. 21Kejekia oto, ci kiyike kacel ki kwarine, ci wode Manace aye oleyo katyene.