2 Luker 21

Loc pa Manace rwot me Juda

(2 Tek 33:1-20)

1Manace ocamo ker ma mwaka me dite romo apar wiye aryo, ci obedo kaloc ki i Jerucalem pi mwaka pyere abic wiye abic. Nying mine Kepjiba. 21Manace obedo katiyo gin manen marac iwang Rwot, kun lubu kwede tim me kwer pa rok ducu ma Rwot yam oryemogi woko ki inyim jo Icrael. 3En dok oroco wang jogi pa lurok ma iwi godi mayam wone Kejekia ojwerogi wokoni. En ogero keno tyer pa Baal, ka dok ocomo wir cal jogi pi woro jok ma dako ma kilwongo Acera, kit mayam Akab rwot me Icrael otiyoni, ci bene obedo ka woro ceng ki dwe wa ki lakalatwer ducu, kun tiyo botgi. 42Dok ocano lwak keno tyer pi woro jogi wa i Ot pa Lubanga, kama yam Rwot owaco ni kibiworo en iye i Jerucalem. 5Ka dok ocano lwak keno tyer pi woro ceng ki dwe wa ki lakalatwer ducu idyekal aryo me Ot pa Lubanga. 6Manace bene owango wode ki mac me gityer, dok bene obedo katyet, ki ngiyo i dyelgu, kun tiyo ki lukor tipugu ki megi jogi. En obedo katiyo kit tim mapol manen marac iwang Rwot, kun miyo kiniga mako Rwot. 73Ka dok omiyo ki payo cal Acera ma jok ma dakoni, ci ocibo i ot mayam Rwot owaco ikome bot Daudi ki wode Solomon ni, “I ot man, ki i Jerucalem, en aye kabedo mayam ayero ki ikin kaka pa jo Icrael ducu, abiketo nyinga bedo iye matwal. 8Teke jo Icrael gibigwoke kalubu cika ducu, mayam latica Moses ocikogi kwede kun gilubu kit lok ducu ma atyeko cikogi kwede, ci pe dok abimiyo ki ryemogi woko ki i lobo mayam amiyo bot kwarigini.” 9Ento jo Juda pe yam guwinyo, dok Manace obitogi omiyo gubedo katimo gin marac, makato lurok ma Rwot yam ojwerogi woko ki inyim jo Icrael.

10Rwot oloko ki i dog lunebi ma lutice kun waco ni, 11“Manace rwot me Juda obedo katimo tim me kwer, maracu makato mayam jo Amor ma gukwongo nyime gubedo katiyone, dok omiyo jo Juda bene gubalo pi woro lwak cal lubangane. 12Piman, an Rwot Lubanga pa Icrael awaco ni, abikelo gin marac ikom Jerucalem ki ikom lobo Juda ma jo ducu ma biwinyone bibedo ki ngeng wa ki lworo madit mada. 13Dok abipwodo Jerucalem ki kit pwod acel mayam apwodo kwede ki Camaria, abingolo lakit pwod acel mayam apwodo kwede ki ot pa Akab. Dok abijwayo Jerucalem kit ma dano jwayo ki caanini, kun jwayo kome ka dok ryebo iye umu woko piny. 14Abikwero jona mudongi woko ma gin aye lwaka, ci amiyogi woko i cing lumerokgi. Gibidoko ginayaka ma lumerokgi giyako, 15pien gubedo katiyo gin manen marac i wanga, kun gumiyo kiniga obedo ka maka nia wa ikare ma kwarigi oa kwede i Ejipt nio kwede wa onyo.”

16Dok bene Manace obedo kaneko jo mapol ma pe gitye ki bal mo, nio ka remogi oromo i Jerucalem woko ducu. Medo ikom meno, en bene omiyo jo Juda gubalo kun gitiyo gin manen marac iwang Rwot.

17Lok kom Manace mudonge ducu, ki gin ducu mayam otiyo, ki bal ma otiyo, kityeko coyone i Buk me Tekwaro pa Luker me Juda. 18Manace oto, ci kiyike kacel ki kwarine i poto ma inget ode, ma poto pa Uja; ci wode Amon aye oleyo katyene.

Loc pa Amon rwot me Juda

(2 Tek 33:21-25)

19Amon ocamo ker ma mwaka me dite onongo tye pyere aryo wiye aryo, ci obedo kaloc ki i Jerucalem pi mwaka aryo. Nying mine Meculemet ma nya pa Karuj, dano me Jotba. 20Amon obedo katiyo gin manen marac iwang Rwot, kit macalo wone Manace obedo katiyo. 21En obedo kalubu kit pa wone ducu, kun tiyo bot cal lubangagu mayam wone otiyo botgi, kun worogi bene. 22En obwoto Rwot, Lubanga pa kwarine woko, pe obedo kalubu kit pa Rwot. 23Lutic pa Amon gupiro lok ikome, ci guneko en woko i ode. 24Ento lwak ma i lobo Juda guneko jo ducu ma gupiro lok ikom rwot Amon ci guketo wode Yocia me bedo rwot ma kakare.

25Lok kom Amon mudonge ducu ki gin mayam otiyo ducu kityeko coyone i Buk me Tekwaro pa Luker me Juda. 26Kiyike i lyel ma i poto pa Uja; wode Yocia oleyo katyene.