2 Luker 22

Loc pa Yocia rwot me Juda

(2 Tek 34:1-2)

11

Yocia ocamo ker ma mwaka me dite onongo tye aboro, ci obedo kaloc ki i Jerucalem pi mwaka pyere adek wiye acel. Nying mine Yedida, ma nya pa Adaya me Bojkat. 2Yocia obedo katiyo gin manen atir iwang Rwot; kun lubu kit pa kwarone Daudi ducu labongo cabe atata, kun lubu cik pa Lubanga ducu.

Kinongo buk me Cik i Ot pa Lubanga

(2 Tek 34:8-28)

3I mwaka me apar wiye aboro me loc pa rwot Yocia, en ocwalo Capan wod pa Ajalia, wod pa Meculam ma karan, wa i Ot pa Lubanga kun waco ni, 4“Cit wa bot Kilkia ma ajwaka madit, wek en okwan wel lim ma kikelo i Ot pa Lubanga, ma lukur dogola gugamo ki bot lwak. 5Wac bote ni omii lim meno i cing lutic ma giloyo dog tic me Ot pa Lubanga. Wek gucul lutic magi ma gitye kunu ka roco kama obale ikom Ot pa Lubanga: 6gin aye lupac ki lugedo, lugedo ki godi wek guti kwede me wilo bao bene, ki godi ma kimuku pi yubu kama obale. 72Ento pe gupeny lok kom lim mo ma kimiyo i cinggi, pien gin gitiyo kwede ki gen.”

8Kilkia ma ajwaka madit, owaco bot Capan ma karan ni, “Atyeko nongo buk me Cik i Ot pa Lubanga.” Ci Kilkia omiyo buk bot Capan, ci okwano. 9Ci Capan ma karan ocito kwede bot rwot, ci odwoko lok bot rwot ni, “Ladit, watyeko kwanyo lim ma kinongo i Ot pa Lubanga, ci wamiyo i cing lutic ma giloyo dog tic me Ot pa Lubanga.” 10Ci Capan ma karan dok otito ki rwot ni, “Kilkia ajwaka madit otyeko miya buk mo.” Ka Capan ocako kwanone inyim rwot.

11Ka rwot Yocia owinyo lok ma i buk me Cik, ci oyeco bongine woko. 12Ci ocako ciko Kilkia ma ajwaka madit, ki Akikam wod pa Capan, ki Akbor wod pa Mikaya, ki Capan ma karan, ki Acaya ma latic pa rwot kun waco ni, 13“Wucit ka penyo dog Rwot Lubanga pira, pi lwak, ki pi ker me Juda ducu, pi lok ma i buk man ma kityeko nongoneni. Akemo pa Rwot kara dong olyeti ikomwa matek, pien kwariwa pe gubedo ka woro lok ducu ma i buk man, pi tic kwede ikit ducu mayam kicoyo kwede ma mako komwa.”

14Ci Kilkia, ajwaka madit, Akikam, Akbor, Capan ki Acaya gucito bot Kulda ma lanebi ma dako, ma cware Calum wod pa Tikva, ma wod pa Karkac ma lagwok bongi pa rwot, ci guloko kwede. Dakonu onongo bedo i dul gang me aryone ma pud onongo nyen i Jerucalem. 15Ci en owaco botgi ni, “Rwot Lubanga pa Icrael dong otyeko lok! Wutit bot dano ma ocwalowu bota ni, 16‘Rwot Lubanga owaco kuman ni: abikelo gin marac poto ikom kabedo man, ki ikom jo ma gibedo iye, pi cobo lok ducu ma kicoyo i buk ma rwot me Juda okwanoni. 17Pien jona gutyeko bwota woko kun giwango odok eceta bot lwak lubanga mukenegu, wek kimii kiniga obed ka maka pi jogi ducu ma gitiyo ki cingini. Piman akemona bilyeti matek ikom kabedo man, ma pe dong bikwe. 18Ento lok ma dok ikom rwot me Juda ma ocwalowu kapenyo dog Rwot, wun wubiwaco bote kit man ni: ikom lok ma iwinyoni, 19dong ityeko ngut ki i cwinyi, ci imwole keni inyim Rwot ikare ma iwinyo kit lok mayam aloko ikom kabedo man, ki ikom jo ma gibedo iye, ni bidoko obur, miyo kibitic ki nyinge macalo lok lacen dano, ci icako yeco bongini woko kun i kok kwede inyima; pimeno an bene atyeko winyo kokoni, man lok pa Rwot kikome. 20Pe dong abicwalo can man ikare me kwoni, ento abikuru ka dong in ito, ma kiyiki i lyeli ki kuc, dok wangi pe bineno gin marac ducu ma abikelo ikom kabedo man.’” Ci gin gudwoko lok bot rwot.