2 Luker 23

Yocia ojwero ka woro jokgu woko

(2 Tek 34:3-7,29-33)

1Rwot Yocia ocwalo kwena, ci ludongo me Juda ducu ki me Jerucalem gucoke bote. 2Ci ocito kacel ki jo Juda ducu, jo ducu ma gibedo i Jerucalem, ajwaki, lunebi, ki lwak ducu, jo matino ki jo madito wa i Ot pa Lubanga. Ci ocako kwano lok ducu ma i buk me gicike ma kinongo i Ot pa Lubanga, kun gin ducu giwinyo. 3Lacen rwot Yocia ocung ka nget wir ci oketo gicike ki Rwot, kun moko inyim Rwot, me lubu lok pa Rwot, kun mako lok ma Rwot ociko ducu, ki lok me caden, ki cikgu ducu, me mako ki cwinye ducu ki tipune ducu, kun cobo kwede lok me gicike meno, mayam kicoyo i buk meno. Ci lwak ducu guribe kamoko gicike. 41

Rwot Yocia ociko Kilkia, ajwaka madit, ki ajwaki ma i dul me aryo, ki lukur dogola ni gukel jami ducu matye i Ot pa Lubanga mayam kitiyogi pi Baal, ki pi jok ma dako ma kilwongo Acera, ki pi lakalatwer ma i polo ducu. Ci guwangogi woko inge Jerucalem, i poti ma i ora kulu Kidron, ci gutero burugi wa i Betel. 5Ci okwanyo ajwaki me wang jogi mayam luker me Juda guketogi me wango odok eceta iwang jogi ma iwi godi ma inget taun madito ma i Juda, ki ma gurumu Jerucalem, kacel ki jo ma giwango odok eceta bot jok Baal, ki bot ceng ki dwe, ki lakalatwe ducu ma i polo. 6Ka dok okwanyo cal Acera ma jok ma dakoni woko ki i Ot pa Lubanga, ci otero woko wa inge Jerucalem, i kulu Kidron, ci owango woko i ora me Kidron, oluru matinotino tutwal, ci oonyo kama kiyiko iye dano ata. 7En bene omuku odi pa lutim kwele ma luwor jogi, ma onongo gukube ikom Ot pa Lubanga, kama yam mon gicweyo iye bongo pi Acera. 8Ka dok ocoko lwak ajwaki pa jogi woko ki i taun madito ma i Juda ci oterogi i Jerucalem, ka omuku lwak wang jogi ma iwi godi kama kiwango iye odok eceta; cake ki i Geba nio kwede wa i Beer-ceba. En omuku bene wang jogi pa nyogi oyima, mayam gitye i dog gang ma kidonyo kwede i gang pa Yocwa ma laloc me Jerucalem, tung kumalo ka i donyo i dogcel. 9Ajwakinu ducu ma iwang jogi ma iwi godi yam pe kiyegi katic inyim keno tyer pa Rwot Lubanga i Jerucalem, ento gubedo kacamo Mugati ma Tobi Pe iye ki ikin utmegigi. 102Rwot Yocia dok obalo Topet, ma onongo tye i nota pa wod pa Kinom, wek dano mo pe dok owang iye wode nyo nyare ki mac me gityer bot jok Molek. 11Ka dok omuku lwak cal aguragura mayam luker me Juda gudyero bot ceng, kama kidonyo kwede i Ot pa Lubanga, inget kicika pa Natan-melek, dano ma kikolo ma tiyo i ot pa rwot, ma idyekal me Ot pa Lubanga; ka owango gadigadi pa ceng ki mac. 123Lwak keno tyer mayam obedo iwi kicika mamalo me ot pa Akaj, mayam luker me Juda gutiyo, kacel ki keno tyer mayam Manace ocano idyekal aryo ducu me Ot pa Lubanga, magi ducu en omuku oreto woko piny, ongidogi woko matinotino, ci oonyogi i nota me kulu Kidron. 134Rwot Yocia dok obalo wang jogi ma iwi godi mayam gitye inget Jerucalem tung kunyango, kupiny me got me bal, ma en aye got Jeituni, mayam Solomon rwot me Icrael ogero pi Acitoret ma jok ma dako pa jo Cidon, pi Kemoc ma jok pa jo Moab, ki pi Milkom ma jok pa jo Ammon. 14Ka dok oturu wir jogi ducu ongido woko, ka otongo cal ma kicomo pi woro Acera ma jok ma dakoni, ka opongo kabedogi ki cogo kom dano wek pe dok obed mupore me woro lubanga mo keken i ye. 155

Keno tyer ma i Betel bene, ki wang jok mayam Jeroboam wod pa Nebat ocano, mayam omiyo jo Icrael gupoto i bal, keno tyer meno bene en Yocia omukugi woko kacel ki godi ma kicano ka ongidogi woko matino, ci orego odoko luru; ka dok owango cal jok Acera bene. 166Ka Yocia dok oloke, ci oneno lwak lyel iwi got; ci ocwalo dano okwanyo lwak cogo ma i lyel ducu, ci owangogi iwi keno tyer. Kitmeno en obalo kenone woko, ocobo ki lok pa Rwot mayam dano pa Lubanga otito kun nyutu kwede gin ma bitime anyim, ikare me karama ma Jeroboam onongo ocung inyim keno tyer. Ci rwot Yocia oloke oneno lyel pa dano pa Lubanga ma otito lok magi. 177Ci openyo ni, “Got ma ocung ca kicano me po ikom anga?” Ci jo me taun meno gutite ni, “Meno lyel pa dano pa Lubanga mayam oa ki i Juda, ma okwongo tito lok magi ducu madong ityeko cobogi ikom keno tyer man ma i Betel.” 18Ci Yocia ogamo ni, “Wek obedi; pe dano mo okwany cogone.” Ci guweko cogone, pe gugudu kacel ki cogo pa lanebi mayam oa ki i Camaria. 19Wa i taun ducu ma i Camaria, mayam luker me Icrael gugero, rwot Yocia omuku odi jogi ducu ma iwang jogi ma iwi godi ma onongo miyo kiniga mako Rwot. Yocia omukugi woko, ci otiyo ikomgi kit mayam otimo i Betel ducu. 20Dok oneko ajwaki ducu ma iwang jogi ma iwi godi, en onekogi iwi keno tyergi, ka owango cogo komgi iwi keno tyer meno ducu. Ci odok woko i Jerucalem.

Yocia okwero Karama madit me Kato

(2 Tek 35:1-19)

21Rwot Yocia dok ociko lwak ducu ni, “Wukwer Karama madit me Kato pa Rwot Lubangawu, kit mayam kicoyo i buk man me gicike.” 22Pe tye Karama me Kato mo ma kikwero madit kit man i Icrael, cake ki ikare pa lungolkop mayam giloyo Icrael, kadi wa ikare pa luker me Icrael nyo me Juda. 23Ento i mwaka me apar wiye aboro me loc pa Yocia en aye kikwero iye Karama me Kato pa Rwot madit i Jerucalem.

Alokaloka mukene ma Yocia okelo

24Kitmeno, Yocia ojwero lukor tipu woko, ki lujogigu, kacel ki cal jogi matinone ma dano gubedo kwede i pacogi, cal jogi mukenegu, ki gin me ki pyeda ducu ma gunen i lobo Juda ki i Jerucalem, wek emok lok me cik ducu mayam kicoyo i buk ma ajwaka Kilkia onongo i Ot pa Lubanga. 25Onongo yam pe tye rwot mo marom kwede ki ikin luker ducu ma gutelo nyime, ma kong oloke bot Rwot ki cwinye ducu ki tipu kome ducu, ki teke ducu kun lubu Cik pa Moses ducu; dok pe tye dano mo ma olubu ngeye ma obedo marom kwede.

26Kadi bed kumeno, cwiny Rwot ma opong ki akemo mager ikom Juda pi tim maracu pa rwot Manace onongo peya oware dok bene onongo en peya oloko tame. 27Rwot onongo owaco ni, “Abiryemo Juda bene woko ki inyima, kit macalo atyeko ryemo Icrael woko ki i nyimani, dok abikwero Jerucalem ma en aye taun madit ma ayeroni woko, kacel ki Ot pa Lubanga mayam aloko ikome ni nyinga bibedo kunu.”

To pa Yocia

(2 Tek 35:20—36:1)

28Lok kom Yocia mudonge ducu, ki gin mayam otiyo ducu, kityeko coyone i Buk me Tekwaro pa Luker me Juda.

29I karene en aye Parao Neko rwot me Ejipt ocito ki buca monye kakonyo rwot me Aciria i dog kulu Euprate. Ci rwot Yocia ocito kajuku mony pa jo Ejipt; ci Parao Neko ka onene, oneke woko cut i Megiddo. 30Ci lutice gutingo kome ki gadigadi nia ki i Megiddo, gutero i Jerucalem, ci guyike i lyele kikome.

Ludito me lobo Juda gukwanyo Yekoakaj wod pa Yocia guwiro ki moo, ci guketo en me bedo rwot, oleyo katyen wone.

Loc pa Yekoakaj rwot me Juda ki tone

(2 Tek 36:2-4)

31Yekoakaj ocamo ker ma mwaka me dite pyere aryo wiye adek, ci obedo kaloc i Jerucalem pi dwe adek. Nying mine Kamutal, nya pa Jeremia me Libna. 32En obedo katiyo gin manen marac iwang Rwot, kun lubu kit ducu mayam kwarine gutiyo. 33Parao Neko otweyo en woko i buc i Ribla i lobo Kamat, wek pe obed kaloc i Jerucalem, ci ongolo wel ajog ikom lobo Juda maromo talanta me ryal miya acel ki talanta me jabu acel. 348Parao Neko oketo Eliakim wod pa Yocia obedo rwot me leyo katyen wone Yocia ci oloko nyinge odoko Yekoyakim. Otero Yekoakaj wa i Ejipt, ci oto woko ki kunu. 35Yekoyakim yam omiyo ryal ki jabu meno bot Parao, ento kong ojogo ajog i lobone pi nongo wel lim ma Parao ociko. En ojogo ryal ki jabu ki bot wegi lobo, kun gamo ki bot dano acel acel muporo wel ma kingolo ikome me amiya bot Parao Neko.

Loc pa Yekoyakim rwot me Juda

(2 Tek 36:5-8)

369

Yekoyakim ocamo ker ma mwaka me dite pyere aryo wiye abic, ci obedo kaloc ki i Jerucalem pi mwaka apar wiye acel. Nying mine Jebida, nya pa Pedaya me Ruma. 37En obedo katiyo gin manen marac iwang Rwot kun lubu gin ducu mayam kwarine gutiyo.