2 Luker 24

11

Ikare pa Yekoyakim en aye Nebukadnejar, rwot me Babilon, obino omonyo lobo Juda, ci Yekoyakim odoko latice pi mwaka adek; lacen en oloke ojemo woko ikome. 2Ci Rwot Lubanga ocwalo buca mony pa jo Kaldaya, pa jo Ciria, pa jo Moab, ki buca mony pa jo Ammon; kalweny ikom jo Juda pi jwerogi woko ducu, kit mayam Rwot oloko ki i dog lutice ma lunebi. 3Meno ducu opoto ikom jo Juda pi cik pa Rwot, wek okwanygi woko ki inyime, pi bal ducu ma Manace yam otiyo, 4ki pi remo pa jo ma pe ki bal ma en ooyo i Jerucalem. Rwot pe otimo kica pi bal meno.

5Lok kom Yekoyakim mudonge ducu, ki gin mayam otiyo, kityeko coyone i Buk me Tekwaro pa Luker me Juda. 6Yekoyakim oto, ci kiyike kacel ki kwarine ci wode Yekoyakin aye oleyo katyene. 7Rwot me Ejipt pe dok onwoyo a ki i lobone, pien onongo rwot me Babilon otyeko mayo lobo woko ki i cinge, cake ki i nota ora me Ejipt o kwede wa i kulu Euprate ducu.

Yekoyakin rwot me Juda

(2 Tek 36:9-10)

8Yekoyakin ocamo ker ma mwaka me dite apar wiye aboro, ci obedo kaloc ki i Jerucalem pi dwe adek. Nying mine Nekocita, nya pa Elnatan me Jerucalem. 9En obedo katiyo gin manen marac iwang Rwot, kun lubu gin ducu mayam wone otiyo.

10Ikare meno aye lutic pa Nebukadnejar, rwot me Babilon, obino ki monye i Jerucalem, ci orumu woko. 11Rwot Nebukadnejar ocito i Jerucalem Ikare ma lutice gurumu wokoni. 122Ci Yekoyakin rwot me Juda oye miine kekene i cing rwot me Babilon, en kikome, ki mine ki lutice, ki rwodine, ki ludito ma i kale. Rwot me Babilon otweyo en i buc i mwaka me aborone me loce. 13Nebukadnejar otero jami ducu ma kikano i ot lim ma i Ot pa Lubanga i Jerucalem, ki lim ducu ma kikano i ot ker, ka otongo jami me jabu ma i Ot pa Lubanga ongidogi woko ducu, gin jami mayam Solomon rwot me Icrael otiyo, kit mayam Rwot Lubanga oloko. 14En bene otero jo me Jerucalem ducu, rwodi ducu, twoni oteka lweny ducu ma guromo alip apar, kacel ki ludiro tic mapatpat ducu ki lutet nyonyo i opii. Dano acel mo pe odong, kono jo ma lucan atika aye gudong i lobo pa Juda. 153Nebukadnejar otero Yekoyakin woko i opii wa i Babilon, kacel ki min rwot, mon pa rwot, luditone ki rwodi ma giloyo lwak ma i lobonu. 16Rwot me Babilon otero lwak opii ma gin ducu oteka lweny ma giromo alip abiro, ludiro tic mapatpat ki lutet ma giromo alip acel, gin ducu jo matego ma giromo mony. 174Rwot me Babilon dok oketo Matania ma omin won Yekoyakin obedo rwot ma oleyo katyene, ci oloko nyinge odoko Jedekia.

Loc pa Jedekia rwot me Juda

(2 Tek 36:11-16; Jer 52:1-3a)

185

Jedekia ocamo ker ma mwaka me dite pyere aryo wiye acel, ci obedo kaloc ki i Jerucalem pi mwaka apar wiye acel. Nying mine Kamutal, nya pa Jeremia me Libna. 19En obedo katiyo gin manen marac iwang Rwot, kun lubu gin ducu mayam Yekoyakin otiyo. 206Pi kiniga ma omako Rwot Lubanga matek ikom jo Jerucalem ki jo Juda, omiyo en oryemogi woko ki inyime.