2 Luker 25

Jerucalem opoto i cing jo Babilon

(2 Tek 36:13-21; Jer 52:3b-11)

11

Lacen Jedekia ojemo woko ikom rwot me Babilon. Ci i mwaka me abongwen me loce, i dwe me apar, inino dwe apar, en aye Nebukadnejar rwot me Babilon obino kwede ki monye ducu ikom Jerucalem, ci orumu gang woko, ka dok gutoro cel lobo orumu woko dyere. 2Kirumu Jerucalem kitmeno nio wa i mwaka me apar wiye acel me loc pa rwot Jedekia. 3Ikom nino dwe abongwen me dwe me angwen onongo kec odoko marac i Jerucalem, ma omiyo cam pe dok onen pi lwak. 42Ka gumuku but cel me taun woko, ci rwot ki lwak lulweny ducu gumol gulwi woko ki i dyewor, kun giwok ki i dog gang ma ikin cel aryo me Jerucalem, ma inget poto pa rwot. Ento pien jo Babilon onongo gurumu taun woko dyere, omiyo gucito gulubu yoo ma dok tung Araba. 5Ento mony pa jo Babilon guryemo kor rwot Jedekia, ci gumake wa i bar me Jeriko; ci monye guket woko ducu ki ikome. 6Ka gumako rwot Jedekia, ci gukelo en bot rwot me Babilon i Ribla, kama ongole iye kop. 73Ka gucako neko awobe pa Jedekia woko ki inyime ma wange neno, ka kikolo wange woko, ka kitweye ki nyor, kitere kwede wa i Babilon.

Muku Ot pa Lubanga

(Jer 52:12-30)

8I dwe me abic, ikom nino dwe me abirone, i mwaka me abongwen me loc pa rwot Nebukadnejar rwot me Babilon, en aye Nebujaradan ma ladit pa lugwok rwot, ma latic pa rwot me Babilon, odonyo kwede i Jerucalem. 9En owango Ot pa Lubanga woko, ki ot pa rwot, ki odi ducu matye i Jerucalem; dok bene owango odi ma pirgi tego woko ducu ki mac. 10Ki mony pa jo Babilon ducu, mayam gitye kacel ki ladit pa lugwok rwot, gumuku kicika cel murumu Jerucalem woko. 11Ci Nebujaradan otero lwak mayam gudong i taun madit, ki jo mayam gumine gigi ken gi bot rwot me Babilon, kacel ki lwak ma gudonge ducu i opii. 12Ento oweko lucan mogo gudong i lobo Juda wek gubed lugwok poto olok ki lupur ki kweri dyang. 134

Ci jo Babilon guturu wir mola aryo mayam gitye i Ot pa Lubanga, ki lutino gadigadi ki twon pipa me mola mayam gitye i Ot pa Lubanga, gungido woko ka gutero woko i Babilon. 145Gin bene gutero lwak agulu ducu, akwaya latokegu, magacgu ki atabo me odok eceta, jami mola ducu mayam kitiyo kwedgi i Ot pa Lubanga. 15Nebujaradan bene otero wee me wango mac, ki becengu mayam kitiyo ki jabu, ki ryal. 16Wir aryoni, ki twon pipa pii me mola acel, ki lutino gadigadi ducu, mayam Solomon otiyo pi Ot pa Lubanga, pek me mola ma oa ki ikom jami magi ducu dwong ma pe pime. 17Bor pa wir acel acel romo puti pyere aryo wiye abiro. I wigi yam kiketo iye lalukana me mola, kun borgi romo puti angwenangwen ki nucu. Ikom lalukana onongo kiketo iye obwo ki cal nyig okwer pomegranat, ma gin ducu kitiyogi ki mola, ma kirumu lalukana dyere.

Kitero jo me Juda i opii i Babilon

(Jer 52:24-27)

18Ladit pa lugwok rwot otero Ceraya bene ma ajwaka madit, ki Jepania, ajwaka me aryone, ki lukur dogola me Ot pa Lubanga gin adek. 19Ka dok okwanyo ladit maloyo lumony ki i dye gang, ki lumemba abic ma gin lumiitam bot rwot ma onongogi i dye taun; ki karan pa ladit me mony mayam coko jo me lobo pi lweny, ki jo pyere abic ikin wegi lobo ma ki nongogi i dye taun. 20Nebujaradan ladit pa lugwok rwot omakogi, oterogi wa i Ribla bot rwot me Babilon. 21Rwot me Babilon onekogi woko ducu; en onekogi i Ribla ma i lobo Kamat. Jo Juda yam ki kwanyogi woko ki i lobogi ci ki terogi i opii kitmeno.

Kiketo Gedilia obedo ladit me Juda

(Jer 40:7-9; 41:1-3)

22Nebukadnejar rwot me Babilon oketo Gedalia wod pa Akikam ma wod pa Capan me loyo jo mudong i lobo Juda, mayam owekogi gubwot. 23Ka ludito me mony ducu ma ikin gangi guwinyo ni rwot me Babilon otyeko keto Gedalia me bedo laloyo, ci gubino ki lwakgi bot Gedalia wa i Mijpa. Nyingi ene: Icmael wod pa Netania, Yokanan wod pa Karea, Ceraya wod pa Tankumet ma jo Netopa, ki Jajania wod pa jo Maaka. 24Gedalia ocako kwongo kwong botgi ki bot lwakgi ducu kun waco ni, “Pe wulwor ludito tic pa jo Babilon. Wubed i lobo, wutii bot rwot me Babilon, ci wubibedo maber labongo ayela mo.” 25Ento i dwe me abiro, Icmael wod pa Netania, wod pa Elicama, matye i kaka pa luker, obino kacel ki jo apar, ci gulwenyo ki Gedalia, guneko woko, kacel ki Lujudaya ki jo Babilon ma gitye kwede i Mijpa. 266Lacen lwak ducu, jo matino ki madito, ki ludito me mony gua gucito wa i Ejipt, pien gulworo jo Babilon.

Kigonyo Yekoyakin ki i buc

(Jer 52:31-34)

27Ikare me mwaka pyere adek wiye abirone nia ma ki tero kwede Yekoyakin rwot me Juda i opii, i dwe me apar wiye aryo, ikom nino dwe pyere aryo wiye abiro, en aye Evil-merodak, rwot me Babilon, otimo kica ki Yekoyakin rwot me Juda, ogonye woko ki i buc, i mwaka ma en ocamo iye ker. 28Ci obedo kalok kwede mot maber, oketo en obedo ikom madit makato ducu ma ikin kom pa luker ma onongo gibedo kwede i Babilon. 29Kitmeno omiyo Yekoyakin olunyu bongo buc mere woko, ci obedo kacam iwi meja pa rwot jwijwi, pi kare me kwone ducu. 30Pi miye gin me konye kwede, rwot me Babilon dok obedo kamiye lim me tic kwede jwijwi, pi kare ducu me kwo mere.