1 Luker 14

To pa wod pa Jeroboam

1Ikare meno two omako Abija wod pa Jeroboam. 2Jeroboam owaco ki dakone ni, “Cit iruk bongoni mapat wek pe ngat mo onen ni in i dako pa Jeroboam, ci i cit wa i Cilo. Akija ma lanebini tye kunu, en aye yam owaco bota ni abibedo rwot maloyo lwak man. 3Ber i tere mugati apar, ki capat bene, ki agulu moo kic, wek icit kwede bote, ci en bititi gin ma bitime ikom latin.”

4Dako pa Jeroboam otimo kitmeno, en oa ocito wa i Cilo ci ki kunu ocito odonyo i ot pa Akija. Akija onongo dong pe twero neno piny, pien wange dong ocor woko pi tiyone. 5Rwot Lubanga owaco bot Akija ni, “Nen ba, dako pa Jeroboam tye kabino boti. Obibino kapenyo dogi pi two pa wode, pien two omako malit.” Ci Rwot otito bote lok ducu ma omyero owac bot dakonu.

Ka dako meno obino, en onongo oloke odoko macalo dako ma oa ki kamukene. 6Ento ka Akija owinyo kor tyene ikare ma en bino kwede i dogolane, ci otugi jole ni, “Dony ba, in dako pa Jeroboam. Pingo i loke idoko macalo dako ma oa ki kamukene? Rwot ocika ki lok mapek ikomi. 7In idok icit itit bot Jeroboam ni, Rwot Lubanga pa Icrael owaco kuman ni, ‘An yam apilo wii aketi kwede i dit, ma kun akwanyi ki ikin lwak, ci aketi ibedo lalo lwaka ma gin jo Icrael. 8Yam amayo ker woko ki i ot pa Daudi, amiyo boti; ento in pe ibedo macalo latica Daudi mayam omako cika ducu, kun lubu kora ki cwinye ducu, dok tiyo gin manen atir keken i wanga. 9In aye dong itiyo bal ma okato jo ducu ma gukwongo nyimi, kun itiyo lwak lubanga piri keni, ki cal lubanga aliyagu ma omiyo kiniga omaka, dok ityeko bola woko i yo ngeyi. 101Pieno abiketo can ikom jo me odi, in Jeroboam, abineko co ducu ma i odi ma i lobo Icrael, opii wa ki anywali. Abijwero jo ma i odi ducu atyekogi woko liweng, kit macalo dano wango cet dyang nio ka owango okur woko liwengi. 11Danoni ducu ma gibito i taun madito, gwogi aye bimwodo komgi; ento dano ma gibito i dye tim ata, winyo aye bicamogi, an Rwot aye dong atyeko loko kitmeno.’”

12Ci Akija owaco bot dako pa Jeroboam ni, “In dong ia, icit i odi. Kace tyeni odonyo i taun, ci latin bito woko. 13Jo Icrael ducu gibikumu pire, ka kiyiko kome. En kene aye kibiyiko kome i lyel ki ikin jo pa Jeroboam, pien en kene aye ikin jo me ot pa Jeroboam ma Rwot Lubanga me Icrael onongo tye ki yomcwiny ikome. 14Rwot bikwanyo dano mo mukene ma bibedo rwot maloyo jo Icrael, en aye dano ma bityeko ot pa Jeroboam woko ikare meno. 15Lacen Rwot dok bipwodo Icrael nio wang ma kome myel calo lagada ma kwang iwi pii. En biputu jo Icrael woko ki i lobo man maberi mayam omiyo bot kwarigi, ci bikeyogi woko ata loka kulu Euprate, pien gumiyo kiniga omako Rwot pi payo cal jok ma dako ma kilwongo ni Acera. 16Rwot bibwoto Icrael woko pi bal pa Jeroboam ma en obalo, ka dok omiyo jo Icrael bene gubaloni.”

17Dako pa Jeroboam oa ocako wot me cito i Tirja. Ka en oo i dogola ote ci latin otugi to woko cut. 18Jo Icrael ducu gubino ka guyiko kome, ci gukumu pire kit mayam Rwot owaco i loke ki latice lanebi Akija.

19Lok kom Jeroboam mudonge ducu, ki kit ma olwenyo kwede i monygu, ki kit loce ducu, kityeko coyone i Buk me Tekwaro pa Luker me Icrael. 20Kare ma Jeroboam obedo kwede i loc oromo mwaka pyere aryo wiye aryo; ci oto, oywe kacel ki kwarine. Wode Nadab aye oleyo katyene.

Loc pa Rekoboam rwot me Juda

(2 Tek 11:5—12:15)

21Ikare meno Rekoboam wod pa Solomon obedo kaloyo lobo Juda. Rekoboam ocamo ker ma onongo mwaka me dite romo pyere angwen wiye acel, obedo kaloc i Jerucalem pi mwaka apar wiye abiro. Jerucalem en aye gang mayam Rwot oyero ki ikin kaka ma i Icrael ducu pi keto iye nyinge wek ki wor. Nying min Rekoboam aye Naama, ma en anyira Ammon. 22Jo Juda gutiyo gin manen marac iwang Rwot, ci gumiyo nyeko omake pi balgi ma gutiyo, ma okato bal mayam kwarigi gutiyo ducu. 232Gugero wang jogigi iwi godi, ki gucibo wir jogigu ki cal jok ma dako ma kilwongoni Acera ki iwi godi mabocone ducu, iwi cere, iwang ayweya, ki ma ite yadi ma potgi oluk. 243I lobogi onongo tye iye bene co ki mon ma lutim kwele ikom wadigi iwang jogi. Lwak gutiyo kit tim kipyeda ducu marom ki bal pa rok mayam Rwot oryemogi woko ki inyim jo Icraeli.

25I mwaka me loc pa Rekoboam me abice en aye Cicak rwot me Ejipt obino iye kalweny ikom Jerucalem. 264 En oyako jami ma kikano i ot lim pa Lubanga, ki jami ma kikano i ot lim pa rwot. Oyako lwak jami ki i lobo woko ducu kadi wa lwak kwot me jabu mayam Solomon otiyogi. 27Rekoboam dok otiyo lwak kwot mukene ma kakagi; man en otiyo ki mola ci omiyogi i cing ludito ma lugwok rwot, ma gigwoko wa dogola ot pa rwot. 28Ikare ducu ma nongo rwot cito i Ot pa Lubanga, lugwok en gimako kwot i cinggi, ka dok ki dwokogi kakagi i ot kicika pa lugwok rwot.

29Lok kom Rekoboam mudonge, ki gin ma en otiyo ducu kityeko coyone i Buk me Tekwaro pa Luker me Juda. 30Lweny obedo ikin Rekoboam ki Jeroboam kare mapol. 31Rekoboam oto oywe kacel ki kwarine ci kiyike kacel ki kwarine i gangkal pa Daudi. Nying mine Naama ma en obedo anyira Ammon. Ci wode Abijam aye oleyo katyene.