1 Luker 13

Lanebi ma oa ki i Juda ojuku Jeroboam

1Dano pa Lubanga mo oa ki i Juda ma Rwot ocwalo ki loke wa i Betel, kama Jeroboam onongo ocung iye kanget keno tyer kawango odok eceta. 21Dano meno ocako lok ki gero kun tito lok pa Lubanga ikom keno tyernu. Kun waco ni, “Ai keno tyer, keno tyer, Rwot owaco kuman ni, ‘Nen ba, kibinywalo latin laco i ot pa Daudi ma nyinge Yocia. Ajwaki me kabedo me woro Lubanga ma iwi godi ma gibedo kawango odok eceta ikomi en binekogi woko ikomi macalo gitum, ki cogo pa dano bene kibiwangogi ikomi.’” 3En omiyo lanyut inino meno kun waco ni, “Man aye bibedo gin ma nyutu ni Rwot aye oloko lok man: keno tyeri bimuke woko, ki buru ma i wiyeni bionye woko piny.” 4Ikare ma rwot Jeroboam owinyo lok ma dano pa Lubanga ma owaco ki tek kun loko bene ki gero ikom keno tyer man ma i Beteli, ci rwot oryeyo cinge ki i kanget keno tyer kun waco ni, “Wumaka danonu woko.” Ci bade ma oryeyo pi cimo danonu otugi tal woko cut, ma dolone wek odwog cen i kore oloye woko. 5Ki keno tyerni bene otugi muk woko, ki buru bene otugi uke woko piny nia ki iwi keno tyer. Kumeno lanyut me lok pa Rwot ma dano pa Lubanga otitoni ocobe kakare. 6Jeroboam owaco bot dano pa Lubanga ni, “Leg Rwot Lubangani kombedi, wek odwok cwinye, ka dong ileg pira, wek bada odole odwog ikoma kakare.” Dano pa Lubanga olego Rwot, ci bad rwot odole odwogo cen kakare, obedo kit macon ca.

7I nge meno rwot dok owaco bot lanebi pa Lubanga ni, “Bin dong wacit paco, wek i cit iywe kunu, ci abimiyi mot mo me pwoc.” 8Ento lanebi pa Rwot ogamo dog rwot ni, “Kadi bed i miya nucu jami ducu ma i odi kulu, pe abiye donyo i odi wan kwedi. Dok pe abicamo kwon kadi wa mato piigu ki i kabedo man; 9pien Rwot ocika kitmeno, ma en waco ni, ‘In pe ibicamo kwon kadi wa mato piigu ki kunu, dok pe ibidwogo cen ki yoo ma i cito kwede kunu.’ ” 10Kitmeno en okwanyo yoo mukene; pe odok cen ki yoo ma ocito kwede i Beteli.

11Onongo bene tye lanebi mo ma otii ma bedo i Betel. Awobene gucito gutite gin ducu ma dano pa Lubanga otiyo i Betel inino meno; ki lok ma oloko bot rwot bene gutito bot won gi. 12Ci won gi openyogi ni, “En kono okwanyo yoo mene?” Awobene gunyute yoo ma dano pa Lubanga ma oa i Judani odok kwede cen. 13Ci owaco bot awobene ni; “Wutwena kom me bedo iwi kana.” Gutwene kom me bedo iwi kanane, ci en obedo i wiye. 14Ocito kwede i kor dano pa Lubanganu ci ononge obedo ite yat kworo. Ka openye ni, “In aye i dano pa Lubanga ma oa i Judani?” Ci en ogamo ni, “An do!” 15Dok owace ni, “Bin wacit paco kacel kweda kacamo kwon.” 16Ento dano pa Lubanga ogame ni, “Pe myero adok kwedi cen, nyo adony kwedi wa i otwu, dok pe abicamo kwon kwedi kadi wa mato piigu i kabedo man; 17pien ceng Rwot oloko bota ma ocika matek ni. ‘In pe ibicamo kwon kadi wa mato piigu kunu, dok pe ibidwogo ki yoo ma icito kwede kunu.’” 18Lanebi ma otii ca ogamo doge ni, “An bene lanebi macalo in, dok lamalaika pa Rwot ociko an ki lok man ni; Rwot owaca ni, ‘Cit icidwog ki lanebi ca paco, en obin kacel kwedi wa i odi wek ocam kwon ka omat piigu.’” Ento onongo en obedo ka bwolo dano ca abwola. 19Ci lanebi ca odok cen kacel kwede, ci ocamo kwon i ode, ka omato piigu. 20Ikare ma gubedo kacam iwi meja, Rwot Lubanga oloko bot lanebi mutii ca ma omiyo lawote odwogo cen i odeni. 21Lanebi mutii ni ocako lok ki gero bot dano pa Lubanga ma oa ki i Juda kun wace ni, “Rwot owaco kuman ni, ‘In pe iworo dog Rwot, dok pe i mako cik ma Rwot Lubangani ociki kwede. 22Pimeno nen in i ye dwogo woko cen, dok icamo kwon ki bene imato piigu i kabedo mayam awaco ki in ni icit iye ento pe omyero i cam kwon kadi wa mato piigu! In dong pe kibiyiko komi i lyel pa kwariwu.’” 23Ka dong gutyeko cam ki mat, won ot otweyo kom me bedo iwi kanane pi lanebi ma en omiyo odwogo cen ni. 24Ka dano meno ocito, labwor mo orwate kwede i yoo, ci omake oneke woko. Kome obutu i yoo kun kana ocung kangete, ki labwor bene ocung kanget kom danonu. 25Dano ma gukato ki kangete guneno kom dano ma obutu i yoo, ki labwor ma ocung kanget kom danoni. Gubino gutito pire i taun madit ma lanebi mutii bedo iyeni.

26Ikare ma lanebi ma omiyo dano ca odwogo cen ni owinyo pire, ci owaco ni, “Meno aye dano pa Lubanga ma pe oworo lok pa Rwot; oweko Rwot omiye i cing labwor ma okaye oneke wokoni, kit macalo Rwot oloko kwede bote.” 27Ci owaco bot awobene ni, “Dong wutwe kom iwi kana,” ci gutweyo kom iwi kana. 28Ci lanebi ma otiini ocito onongo kom danonu obutu i yoo, kun kana ki labwor gucung kanget kome. Labwor bene pe omwodo kome, pe okayo kana bene. 29Lacen Lanebi ma otiini otingo kom dano pa Lubanga ni, oketo iwi kanane, ci okelo kome igange, wek gukum pire ka kiyik kome. 30Ka Lanebi meno oyiko kom dano pa Lubanga i lyele kikome; ci gukumu pire kun giwaco ni, “Can madit opoto ikomi do, omera!” 31Ka dong kityeko yiko kome, ci lanebinu ociko awobene ni, “Ka an dong ato, ci wuyika i lyel ma kiyiko iye kom dano pa Lubangani, wuket cogona kanget cogone. 32Pien lok ma en ogere kwede ma teki onongo lok pa Rwot ma oloko ikom keno tyer ma i Betel, ki ikom odi ducu ma i kabedo me woro Lubanga ma gitye i taun ducu ma i Camaria. Loke ducu bicobe kakare ada.”

33I nge lok man ma otime ni Jeroboam pe omedo ki weko kite maracuni. En dok omede ki keto ajwaki me tic i kabedo me woro Lubanga ma iwi godi ma okwanyogi ki ikin lwak ata. Teke onongo ngat mo keken ma mito bedo ajwaka, ci kwero en wek obed ajwaka cut, ci keto i ka woro Lubanga ma iwi godini. 34Kit tim macalo man aye odoko bal ikom jo me ot pa Jeroboam, ma omiyo ode kikwanyo woko nio ka kityeko woko liweng ki iwi lobo man.