1 Luker 12

Jo Icrael ma Kumalo gujemo ikom Rekoboam

(2 Tek 10:1-19)

1Rekoboam ocito i Cekem, pien onongo jo Icrael ducu gumol gucito i Cekem kaketo en me bedo rwot. 2Ka Jeroboam wod pa Nebat owinyo pire, ci oa ki i Ejipt odok cen; pien onongo Jeroboam pud tye i Ejipt kama yam oringo iye rwot Solomon. 3Kicwalo lukwena kalwonge, ci Jeroboam ki lwak jo Icrael ma Kumalo ducu ma gucoke guwaco bot Rekoboam ni, 4“Woru oketo yec mapek ikomwa. In dong i lok tic matego ma woru omiyowa, ki yec mapeki ma en oketo ikomwani obed mayot, ci wan ducu wabibedo lutici.” 5Rekoboam ogamo doggi ni, “Kong wudok cen wubed kunu nino adek, ka dok wudwog bota kany.” Ci lwak gudok cen.

6Rwot Rekoboam ocako poro lok ki ludongo muteggi, mayam gicung inyim wone kamiye tam ikare ma en pud kwo, ci en openyogi ni, “Wun wumiya kit tam ango wek adok iye bot lwak man?” 7Gin guwaco ni, “Kace tin imito bedo latic pa lwak man kun itiyo pi konyogi, ci i lok botgi lok mabeco ikare ma ibidok iye i penygi, ci gin bene gibibedo lutici matwal.” 8Ento en obwoto tam pa ludongo muteggi woko, ocako dok kaporo lok ki awobe ma yalwake, ma gimiye tam. 9Openyogi ni, “Wun wumiya kit tam ango wek adok iye ki lwak man ma gulega ni, ‘Wek yec ma woru oketo ikomwa mapeki obed yot’?” 10Ci awobe ma yalwake guwaco ni, “Ibidok iye bot lwak ma gulegi kit man ni, ‘Woru yam omiyo yecwa odoko pek, ento in imii obed yot botwa;’ in ibidok iye ki gin kit man ni, ‘Nyig cinga kinong makato pyer wora. 11Dong abitiyo kit man: wora yam oketo yec mapek ikomwu, an dong abimedo bedo mapek; wora yam opwodowu ki del anino, an abipwodowu ki yib oton.’”

12Jeroboam ki lwak ducu gubino bot Rekoboam ikom nino me adeke, kit ma onongo rwot ocikogi. 13Rekoboam odok i lega pa lwak ki gero, pien onongo oweko tam, ma ludongo muteggi gumiye woko. 14Oloko kwedgi kit ma awobe con guyubu ire kun waco ni, “Wora yam omiyo yecwu odoko pek, ento an abimedo bedo mapek makato. Wora yam opwodowu ki del anino an abipwodowu ki odo layib oton.” 15Gin ma omiyo rwot Rekoboam pe omedo ki winyo lok ma lwak oloko, pien Rwot aye otiyo man, wek loke ocobe kakare mayam con en oloko bot Jeroboam wod pa Nebat kun ocwalo Akija lanebi ma jo Cilo ceng ocito ci otito boteni. 161

Inino meno jo Icrael guniang ni rwot pe owinyogi, ci lwak gudok iye bote ni,

“Wan watye ki wang pokwa ango ikom Daudi?

Pe watye ki dul mo ikom latin pa Yece.

Dong wan jo Icrael wadok i kemawa!

Wek Rekoboam dong oloo ot pa Daudi.”

Ci jo Icrael gupoke woko gudok i pacogi. 17Ento Rekoboam odong kaloyo jo Icrael ma gibedo i lobo Juda.

18Rwot Rekoboam dok ocwalo Adoram botgi, en ladit maloyo wi tic muroni, ci jo Icrael ma Kumalo gucele ki got guneke woko. Ci rwot Rekoboam orune oito i gadigadi lwenye oringo kwede woko wa i Jerucalem. 19Kitmeno jo Icrael ma Kumalo gujemo woko ikom luker me ot pa Daudi cake ki ikare meno nio kwede wa onyo.

20Ka jo Icrael guwinyo ni Jeroboam dong odwogo, ci gucwalo kwena gulwonge, ci en obino bot lwak ma gucoke, cut lwak gukete me bedo rwot maloyo jo Icrael ducu. Pe tye ngati mo ma dok olubu kor ot pa Daudi, kono kaka pa Juda keken.

Lok ma lanebi Cemaya otito

(2 Tek 11:1-4)

21Ka Rekoboam odwogo cen i Jerucalem, ci ocoko jo ma kiyero mabeco ki i kaka pa Juda ducu ki i kaka pa Benjamin, buca mony ma lulweny alip miya acel ki pyere aboro, pi lweny ki jo me ot pa Icrael ducu ma tung kumalo wek kidwok ker bot Rekoboam wod pa Solomon. 22Ento Rwot Lubanga dok oloko ki latice ma nyinge Cemaya kun waco ni, 23“Wac bot Rekoboam wod pa Solomon ma rwot me Juda, ki bot jo ducu me ot pa Juda, ki jo pa Benjamin, ki bot jo mukene ducu ni, 24‘Rwot owaco kuman ni, wun pe wubicito kalweny ikom lutuwu ma gin jo Icrael. Wek dano acel acel odok cen i pacone, pien lok man oa ki bota.’” Gin ducu guwinyo lok pa Rwot, ci gudok cen i pacogi, kit ma Rwot owaconi.

Jeroboam omiyo jo Icrael gubwoto woro Lubanga i Jerucalem

25Jeroboam ogero taun Cekem i lobo godi me Epraim, ci obedo kunu; ka dok oa ki kunu ocito ogero taun Penuel. 26Ka dok ocako lwodo lok ki i cwinye ni, “Kit matye ni, ker bidok woko cen i ot pa Daudi. 27Pien kace lwak gibedo kawire awira katyero gitum wa i Jerucalem kama Ot pa Rwot tye iyeni, ci bimiyo cwiny lwak man bidok woko ikom rwotgi Rekoboam ma rwot me Juda, ci miyo kibineka woko ka gidok bot Rekoboam rwot me Juda.” 282Kitmeno Jeroboam ocako yubu lok ci otiyo cal lutino twoni aryo me jabu, ka owaco bot lwak ni, “Wun dong wubedo kawire wa i Jerucalem tutwal, meno dong oromowu. Dong wunen lubangawu, wun jo Icrael, mayam en okwanyowu woko ki i lobo Ejipt.” 29Jeroboam oketo cal wod twon acel i Betel, ka dok oketo acel i Dan.

30Lok man odoko bal, pien jo Icrael gucako mol gucito bot wod twon acel matye i Betel, ki bot mukene matye i Dan. 31Jeroboam dok ogero odi me woro Lubanga iwi godi, kun keto iye ajwaki ma okwanyogi ki ikin lwak ata, ma pe gin jo Levi. 323Dok oketo nino madit obedo i dwe me aboro, ikom nino dwe apar wiye abic, marom ki nino madit ma bedo i Judani, ci ocako tyero gitum ikom keno tyer. Obedo katiyo kitmeno i Betel, kun tyero gitum bot cal lutino twoni ma en otiyoni. Dok oketo i Betel ajwaki ma okwanyo ki i kabedo me woro Lubanga iwi godi ma en oyubuni. 33Jeroboam ceng obino i Betel i dwe me aboro, inino dwe apar wiye abic, inino ma cwinye omokoni; ci oito malo kene ikom keno tyer kawango iye odok eceta inino madit pi jo Icrael ducu ma tung kumalo.