1 Luker 11

Bal pa Solomon me bwoto woro Lubanga

11

Rwot Solomon obedo kamaro mon mapol ma anyira rok mapatpat. Onyomo nya pa Parao, anyira Moab, anyira Ammon, anyira me Edom, anyira me Cidon ki anyira pa jo Kit. 22Onyomogi ki i rok mayam Rwot ojuku jo Icrael ikomgi kun waco ni, “Pe wubinyomo anyiragi, kadi wa gin bene pe gibinyomo anyirawu, pien ada miyo giloko cwinywu dok cen kalubu lubangagi.” Ento Solomon cwinye omaro anyiranu matek. 3En obedo ki mon miya abiro ma gin ducu anyira pa luker, ki mon mukene ma angeca miya adek; ci mone guloko cwinye woko ada. 4Ka Solomon dong otii woko, ci mone guloko cwinye odok ikom lubanga mogo mukene, omiyo pe obedo kalubu lok pa Rwot Lubangane, kit mayam wone Daudi obedo kwede. 5Solomon ocako lubu kit pa jok ma dako pa jo Cidon ma nyinge Acitoret, ki jok kipyeda pa jo Ammon ma kilwongo Milkom. 6Kitmeno Solomon otiyo gin manen marac iwang Rwot, pe dong otiyo gin ma Rwot mito ki cwinye ducu, kit mayam wone Daudi otiyoni. 7Solomon dok ogero wang jok me woro Kemoc ma jok kipyeda pa jo Moab, ki me woro Molek ma jok kipyeda pa jo Ammon; oketo wang jogigi iwi got ma inget Jerucalem tung kunyango. 8Obedo katimo kitmeno pi mone ducu me rok mukene ma giwango odok eceta dok gityero gitum bot lubangagi.

9Rwot okeco ikom Solomon, pien onongo cwinye dong oweko Rwot Lubangane woko, mayam onen bote tyen aryoni, 10mayam bene ociko Solomon ikom lok man kun waco bote ni pe olub kor lubanga mukene; ento en pe omako cik ma Rwot omiyeni. 11Omiyo Rwot owaco bot Solomon ni, “Kit macalo cwinyi tye kit man, ma ikwero mako gicikena ki cik ma aketo ma aciki kwede, an dong abimayo keri woko, amiyo bot latici. 12Ento pi woru Daudi miyo pe abitimo i kareni, ento abimayo woko ki i cing wodi. 13Kadi bed kumeno, pe abikwanyo keri woko ducu, ento abimiyo kaka acel bot wodi, pi nying latica Daudi, ki pi Jerucalem mayam ayero.”

Lumerok pa Solomon

14Rwot okelo merok ikom Solomon, Adad ma jo Edom ma obedo wat pa Luker me Edom. 15Onongo yam ikare ma Daudi obedo i Edom, Joab ma ladit me mony ocito kunu pi yiko kom dano ma kineko, ci oneko co ma onongo kunu woko ducu ma gitye i Edom. 16Ikare meno Joab ki jo Icrael gubedo kunu dwe abicel kulu, nio ka gutyeko co ma i Edom woko liweng. 17Ento kono do latin me ot ker pa jo Edom Adad aye kiringo kwede woko ki jo Edom mogo ma gin lutic pa wone wa i Ejipt. Ikare meno onongo Adad pud tidi. 18Gua woko ki i Midian gucito i Paran, ci gukwanyo co mogo ki i Paran gucito kwedgi i Ejipt bot Parao rwot me Ejipt. Parao omiyo ot bot Adad ki cam, wa ki but lobo bene. 19Adad olimo gum madwong ki bot Parao, Parao dok omiye onyomo ywere ma lamin dakone kikome ma dakeri, ma nyinge Tapanec. 20Lamin Tapanec onywalo latin laco ki Adad, nyinge Genubat, ci Tapanec omiyo Genubat odongo i ot pa Parao kun bedo kacel ki awobe pa Parao. 21Ento ka Adad owinyo ki i Ejipt ni Daudi dong oto, ma kiyike kacel ki kwarine, ki Joab ma ladit me mony bene otyeko to woko, ci Adad openyo Parao ni, “Wek dong aa woko ki boti, adok dong i lobowa.” 22Parao openye ni, “Gin ango ma pe i nongo kany ma omiyo imito dok woko i lobo tuwuni?” Adad ogamo ni, “Kong dong iwek acit mono.”

23Lubanga dok okelo merok mukene bot Solomon. Okelo Rejor ma wod pa Eliada, ma onongo yam oringo woko ki bot rwode Adadejer rwot ma i Joba. 24En ocoko lwak dano mapol ma gubedo bote, ci odoko ladit me buca mony pa luyak ki inge nek ma Daudi onekogi kwede. Gucito i Damaciko, gubedo kunu, ci guketo en obedo rwot i Damaciko kun loyo lobo Ciria. 25En obedo lamerok pa jo Icrael ikare pa Solomon ducu, obedo katimo tim aranyi kit mayam Adad timoni. En obedo lumone pa jo Icarel, kun cwinye dag jo Icrael adada.

Lok ma Lubanga oloko bot Jeroboam

26Dano mukene ma oilo cinge ikom rwot Solomon obedo Jeroboam wod pa Nebat, ma jo Epraim me Jereda. En yam obedo latic pa Solomon; mine nyinge Jerua ma nene cware oto. 27Jeroboam oryeyo cinge ikom rwot pi tyen lok man. Ikare ca onongo Solomon obedo ka gero Millo dok onongo mito ni, i ci ceg wang cel me gangkal pa wone Daudi kama yam kimuku wokoni ducu. 28Jeroboam onongo tye ki kero me kom ki bene obedo kwiri i dog tice. Ka Solomon oneno ni en latin awobi ma kome mit i tic, ci omiye dit me loyo tic muroni ducu pa jo me ot pa Yucepu. 29Ikare mo ma Jeroboam oweko Jerucalem okato woko, ci nen lanebi Akija ma Lacilo orwate kwede i yo, kun onongo Akija oruku bongo manyen. Gin aryonu onongo gitye mere ken gi i dye tim. 30Ci Akija olunyu bongo manyen ma Jeroboam oruku ikomeni, oyeco iye dul apar wiye aryo. 31Ka ocako lok ki Jeroboam kun waco ni, “Gam dul bongo apari i ter obed meri, pien Rwot Lubanga me Icrael owaco kuman ni. ‘Nen, an acok mayo ker woko ki i cing Solomon, ci abimiyo kaka apar i cingi. 32Ento en bidong ki kaka acel pi nying latica Daudi, ki pi Jerucalem mayam ayero ni, en aye gang mayam ayero ki ikin kaka ma i Icrael ducu me bedo mega. 33Pien Solomon dong otyeko bwota woko, ci ocako woro gire Acitoret ma jok ma dako ma jo Cidon giworo ni, ki Kemoc ma jok pa jo Moab, ki Milkom ma jok pa jo Ammon. En pe dong tye kalubu kora, pe dok tiyo gin manen atir i wanga, pe dok mako cik ma aketo, pe dong lubu cika kit mayam wone Daudi olubuni. 34Ento pe abikwanyo ker woko ducu ki i cinge kikome; abimiyo en bedo laloc ikare me kwone ducu, pi latica Daudi mayam ayero, mayam ogwoko cika ki cik ma aketo ducu. 35Ento abikwanyo ker woko ki i cing wode, abimiyo boti, gin kaka apari ducu. 36Ci abimiyo kaka mo acel bot wode, wek latica Daudi obed ki mac tara inyima jwijwi i Jerucalem, i gang mayam ayero me keto iye nyinga wek kiwora. 37Abiketo in Jeroboam ibedo rwot me Icrael, ci ibiloyo lobo ma cwinyi mito ducu. 38Kace ibiwinyo cika ma aciki kwede, ce i lubu yona, kun itiyo gin manen atir i wanga, pi gwoko cika ki gin ma aciko ducu kit mayam latica Daudi ogwokoni, ci abibedo kwedi; an aye abimiyo odi cung matek atika, kit mayam atimo pi Daudini, dok abimiyo jo Icrael i cingi. 39Abiketo can ikom likwayo pa Daudi, ento cane pe bibedo matwal.’” 40Ci Solomon otemo neko Jeroboam ento Jeroboam oa woko, oringo i Ejipt bot Cicak rwot me Ejipt, ci obedo gire i Ejipt nio ka Solomon oto.

To pa Solomon

(2 Tek 9:29-31)

41Lok kom Solomon mudonge ducu, ki gin ducu mayam otiyo, ki ryekone, kityeko coyone ducu i buk ma tito kwo pa Solomon. 42Kare ma Solomon oloyo kwede jo Icrael ducu kun bedo i Jerucalem oromo mwaka pyere angwen. 43Solomon oto ci oywe kacel ki kwarine, ka kiyiko i gangkal pa wone Daudi. Rekoboam ma wode aye oleyo katyene.