1 Luker 10

Rwot ma dako me Ceba olimo Solomon

(2 Tek 9:1-12)

11

Ikare meno rwot ma dako me Ceba owinyo pi yweka pa Solomon laloc madit me lobo Icrael, ci obino bote katemo wiye ki peny mogo matego. 2En obino i Jerucalem ki lwak jone madito ma gucom i kore, kacel ki kinagagu ma guyeyo angwece, ki jabu madwong tutwal, ki lutino godi me wel. Ka obino bot Solomon, ci openye ki kit peny ducu ma onongo tye i cwinye. 3Solomon odok i lapenye ducu; pe onongo tye lok mo wa ki acel ma okane ki bot rwot ma tucune oloye. 4Ka rwot ma dako me Ceba man oneno kit ryeko pa Solomon ducu, ki kit ot ma en ogero, 5oneno lwak cam ma iwi mejane, kabedo pa luditone, ki tic pa lutice ducu, ki bongigi, ki lutino kikopogu ma kipoko ki kong bwino i ot came, ki gitum awanga ma en tyero i Ot pa Rwot, ci tam otum woko ki i cwinye.

6Ci owaco bot rwot Solomon ni, “Lok ducu ma ikomi mayam kitero bota i lobona, ki lok ikom ryekoni, anongo ni loke tye kakare. 7Ento yam pe aye lok ducu ma kitero bota, nio ka abino aneno in ki wanga. Nen, pe kitita kadi wa nucune kulu, pien ryekoni ki lonyo meri kato lok dog ma kitero bota. 8Monni gitye ki yomcwiny kuman! Lutici ducu gitye ki yomcwiny marom mene, ma gin bedo kacung inyimi jwijwi kawinyo lok me ryekoni! 9Kipak Rwot Lubangani ma cwinye opwoyo in, ci oketi iwi komker me Icrael! Pien Rwot omaro Icrael matwal, en aye ma omiyo oketi ibedo rwot, wek ibed kangolo kop atir dok kakare.”

10Ka inge lok man en omiyo bot Solomon jabu madwong maromo talanta miya acel ki pyere aryo, ki lwak angwece mapatpat madwong tutwal, ki lwak lutino godi me wel. Angwece pe dok kimiyo madwong bot rwot Solomon marom ki ma rwot ma dako me Ceba omiyo bote.

11Dok bene mel ma Kiram ceng kelo ki jabu ma i Opir okelo bene ki bao me yat almug madwong tutwal, ki lwak godi matino me wel. 12Solomon omiyo kitiyo ki bao almug pi jengo ki kor Ot pa Rwot ki kor ot pa rwot me bedone, ka dong mukeneni en omiyo kiyubu ki jami woro ki gin me wer me pako Rwot. Kitiyo ki opuk ki nanga pa luwer. Kit bao me almug macalo meno pe dok kikelo i lobo, pe dok bene onen, nio wa onyo.

13Ka lacen rwot Solomon omiyo bot rwot ma dako me lobo Ceba jami ducu ma cwinye oparo dok nyo ogomo ci omine. Gin ma en openyo pire, med ki gin ma en Solomon oyubu pi miyo bote muporo lonyone.

Kitmeno rwot ma dako me Ceba ocako wote me dok i lobone kacel ki lutice ducu.

Lonyo pa Solomon ki ywekane

(2 Tek 9:13-28)

14Lwak jabu ma bino bot Solomon i mwaka acel acel peke onongo cok romo kilo alip pyere aryo wiye aryo, 15ma pe kiribo iye ma obino ki tung bot lucat wil ma paco ki me lobo ma woko, ki ma oa ki bot luker me lobo Arabia ki bot lulo dul lobo mapatpat me lobo Icrael. 16Rwot Solomon otiyo lwak kwot madongo miya aryo me jabu, ma kitetogi ki nyol; ikom kwot acel acel kimwono iye jabu ma peke cok romo kilo abicel. 17Dok otiyo lwak kwot ma tinone miya adek ma kitetogi ki nyol, kun kwot acel acel kiteto ki jabu ma peke cok romo kilo aryo. Solomon omiyo kiketogi i ot ma kilwongo ni Bunga me Lebanon.

18En dok otiyo komker madit me lak lyec, ci omwono kome woko ki jabu ma kiliyo maber. 19Komker meno onongo tye ki rwome abicel, ki inge komker, kiketo iye cal wi labwor. Kangete tungi ki tungi kiketo iye ka teno cing dano, ki cal labwor aryo gucung kanget bad kom me teno cing tungi ki tungi. 20Onongo tye bene cal labwor apar wiye aryo ma gucung i agiki rwom abiceli, tungi ki tungi. Pe tye kit komker mo mayam kitiyo ma cal ki meno ite ker ducu ma iwi lobo.

21Jami ducu mayam rwot Solomon mato kwede onongo tye me jabu keken, wa jami ducu ma kitiyo kwedgi i ot Bunga me Lebanon obedo me jabu ma kiliyo maber. Pe tye iye jami me ryal mo wa ki acel, pien ikare ca pa Solomon, pe tye ngati mo ma onongo tamo pi ryal ni obedo gin mo. 22Onongo en tye ki lwak mel ma dongone ma giwoto i nam kacel ki mel pa Kiram. Mel man madongoni ma kilwongo ni mel me Tarcic yam dwogo cen ka mwaka okato adekadek kun gikelo jabu ki ryal ki lak lyecgu, kacel ki ayomgu ki gunyagu.

23Rwot Solomon obedo ki dit makato luker ma iwi lobo ducu pi lonyone ki pi ryekone. 24Dano me rok ducu gubedo kayenyo kit yo me neno wang Solomon, ki pi bino bote wek giwiny kit lok me ryekone ma Lubanga oketo i cwinyeni. 25Dano acel acel otero mote bote, kun kitero jami me ryal ki me jabugu, me ginarukagu, me odok mura, angwece, aguragura ki kanagu mwaka ki mwaka. 262

Solomon ocoko gadigadi lweny ki lulweny ma giringo ki aguragura. Ci en obedo ki gadigadi lweny alip acel ki miya angwen, ki wegi aguragura alip apar wiye aryo. En oketo mogo ki ikin gi i taun madito me gadigadi lweny, ki mukene gubedo bote i Jerucalem. 27Rwot Solomon omiyo ryal odoko gin malam marom ki gweng gu i Jerucalem, dok yam okelo yadi cedar mapol ata marom ki olam ma i bar Cepela. 283En yam wilo aguragura ma a ki i Ejipt ki Kuc; ma lucat wile gamogi ki i Kuc i wel lim ma onongo kiyubu. 29Gadigadi lweny ma gia ki i Ejipt welgi onongo romo cekel me ryal miya abicel, ki aguragura acel wele cekel miya acel ki pyere abic; ka dok lucat wil pa rwot catogi bot luker ducu pa jo Kit ki bot luker me Ciria.