1 Luker 9

Rwot onen bot Solomon tyen me aryo

(2 Tek 7:11-22)

1Ikare ma rwot Solomon dong otyeko gero Ot pa Rwot, ki ode, ki odi mukene ducu ma onongo en mito gerogi, 21ci Rwot dok onyute bote i lek tyen me aryone, kit mayam onen bote i Gibeon ca. 3Rwot owace ni, “Atyeko winyo legani, ki bako dogi ma iketo inyima dok atyeko lonyo Ot man ma i geroni wek obed maleng. Dong aketo nyinga iye wek obed iye matwal; ki dok wanga ki cwinya bikemo kunu nino ducu. 4Dong ki tung boti, kace i bibedo ki kit kwo maber inyima macalo yam woru Daudi obedo kwede ni, kun ii leng dok cwinyi atir, ce dok ibitiyo gin ma aciko ducu kun i gwoko cik ma aketo, 52ci an Lubangani abimoko komkeri me loyo jo Icrael matwal, kit mayam aciko bot woru Daudini kun awaco bote ni, ‘Pe ibibedo labongo danoni mo ma bibedo iwi komker me Icrael.’ 6Ento kace in nyo likwayi wungak wuweko lubu kora, ma wukwero mako lok ma aciko ki cik ma aketo inyimwu, ce wukobo woko katiyo bot lubanga mogogu mukene kun wuworogi, 7ci miyo abityeko jo Icrael woko ki i lobo mayam amiyo botgini; dok abiloko wanga woko cen, pe dong abineno Ot man, ma dong alonyo obedo maleng pi nyinga ma kiworo iyeni; miyo nying jo Icrael bidoko carolok ki lok aboka ikin rok ducu. 83Ot man bidoko obur ma odure lipim; miyo dano ducu ma gibikato kangete gibiuru ki jwat kun giwaco ni. ‘Kit lok ango ma omiyo Rwot otimo loboni ki Ot man ki tim macalo man?’ 9Ka dok gibiwaco ni, ‘Pien gubwoto Rwot Lubangagi mayam okwanyo kwarigi ki i lobo Ejipt, ci gukobo ite loc pa lubanga mogogu mukene, dok gubedo kaworogi ma kun gitiyo botgi bene; en aye lok ma omiyo Rwot omiyo can man opoto ikomgi magwar.’”

Tic mukene ma Solomon otiyo

(2 Tek 8:1-18)

10Gero odi aryoni otero Solomon mwaka pyere aryo kulu me gerone, gin aye Ot pa Rwot ki ot me bedo pa rwot. 11Ikare meno rwot Kiram me Turo omiyo bot Solomon bao cedar ki bao ciprec, ki jabu bene kit ma en mito ducu. Lacen ka man dong otum, Solomon omiyo bot Kiram taun pyere aryo ma i lobo Galilaya. 12Ento ka Kiram oa ki i Turo ocito kaneno taun magi ma Solomon omiyo bote ni, ci oneno taun magi pe guyomo cwinye. 13Kiram owaco bot Solomon ni, “Omera, man kono kit taun ango ma imiya ni?” Kitmeno omiyo lobone kilwongo ni Kabul4 nio wa onyo. 14Kiram onongo yam ocwalo bot Solomon jabu maromo talanta miya acel ki pyere aryo.

15Man aye lok ikom tic muroni ma rwot Solomon omiyo kirono pi gero Ot pa Rwot, ode kikome, Millo, ki cel ma orumu Jerucalem, kacel ki taun madito magi; Kajor, Megiddo ki Gejer. 16Onongo Parao rwot me Ejipt yam ocito omako Gejer ka owango woko ki mac, ka dok oneko Lukaanan ma gibedo i taun madito meno ci omiyo bot nyare ma Solomon onyomo, wek obed mot me nyomgi. 17Ci Solomon ogero Gejer odoco, ka orono bene dano pi gero Bet-koron Mapiny, 18kacel ki Baalat, Tamar matye i tim me lobo Juda, 19ki taun madito ducu me kano cam mayam Solomon tye kwede, ki taun madito me gadigadine me mony, taun madito pa lulweny ma giringo ki aguragurane, ki kit gedo ducu ma Solomon omito gerogi i Jerucalem ki i Lebanon ki i lobo ma en loyo ducu.

20Likwayo pa jo ma pe gin jo Icrael mayam gubwot ci gudong i lobo ki ikom jo Amor, jo Kit, jo Perej, jo Kiv ki jo Jebuc, 21ma jwerogi woko liweng yam oloyo jo Icrael, gin aye Solomon oketo tic muroni iwigi macalo gin opii, kit macalo tyeni nio wa onyo. 22Ento Solomon pe omiyo jo Icrael gutiyo tic macalo opii: gin gubedo acikarine, ki ludito tice, ludito wi mony, lukapten, ludito maloyo gadigadi lweny, ki lulweny ma ringo ki aguragura.

23Ludito pa Solomon ma giloyo dog tic ducu onongo giromo miya abic ki pyere abic; gin aye guloyo lwak ducu ma gitiyo tic ducu.

24Nya pa Parao odak woko ki i gangkal pa Daudi, okobo i ode kikome ma Solomon ogero pire; ka dok lacen Solomon ogero Millo. 255

Solomon obedo katyero gitum awanga ki gityer lakwe cwiny tyen adek i mwaka acel acel, kun tyerogi iwi keno tyer ma kitiyo pi Rwot, ka dok owango odok eceta inyim Rwot. Ci Solomon otyeko tic me gero Ot pa Rwot kitmeno.

26Rwot Solomon omiyo kipayo lwak meli i Ejion-geber, matye cok ki Elot i dog Nam Makwar i lobo Edom. 27Ci Kiram ocwalo lutice ma gin lunam ma gungiyo tic ki nam wek guwot ki mel meno kacel ki jo pa Solomon. 28Gucito i Opir kaomo jabu ki kunu; gukelo maromo talanta miya angwen ki pyere aryo ci gudwogo kwede gumiyo bot rwot Solomon.