1 Luker 8

Solomon okelo Canduk me Gicike i Ot pa Lubanga

(2 Tek 5:2—6:2)

11

Solomon ocoko ludongo pa jo Icrael ki ludito wi kakagi ducu, ma gin aye rwodi kaka ma i dogola pa kwarigi ducu ma gitye ikin jo Icrael. Ci gubino inyim rwot Solomon i Jerucalem pi kwanyo Canduk me Gicike pa Rwot ki i gangkal pa Daudi ma kilwongo ni Cion, wek kikel i Ot pa Rwot. 22Lwak jo Icrael ducu gucoke bot rwot Solomon ikare me kwero nino madito me dwe Etanim, ma en aye dwe me abiro. 3Ci ludongo ducu pa jo Icrael gubino, ka ajwaki pa Lubanga gucako tingo Canduk. 4Gutero Canduk i Ot pa Rwot, ki kema me rwate, kacel ki jami maleng ducu mayam tye i kema kunu ajwaki ki Lulevi aye gumakogi. 5Ci Solomon laloc me Icrael ki lwak ducu ma gucoke boteni gubino inyim Canduk pa Rwot, kun gitumu lwak romi ki twonigu mapol ma welgi pe kwane. 6Kitmeno ajwaki pa Lubanga gukelo Canduk me Gicike pa Rwot wa i kabedone kikome, i Kabedo Maleng Makato. Ci guketo piny ite bwom Lukerubi. 7Pien lukerubi guyaro bwomgi ka wi kabedo me Canduk wek guum wi Canduk woko, kacel ki tal latinge ducu. 8Tal latinge onongo giboco, omiyo wigi nen ki i Kabedo Maleng Makato ma i tyeloni, ento onongo pe kitwero nenogi ki woko; dok pud gitye kunu wa onyo. 93Gin mo onongo pe i Canduk, kono kidi aryo ma apada keken mayam Moses oketo iye i Koreb, kama yam Rwot oketo iye gicikene ki jo Icrael, ikare ma gia ki i lobo Ejipt. 104Ka ajwaki gukato woko ki i Kabedo Maleng Makato, ci pol obino opongo i Ot pa Rwot woko; 11pi eno omiyo ajwaki pe gutwero cung katiyo ticgi, pi pol meno ma onongo tye i Ot; pien deyo pa Rwot nongo opongo i Ot pa Rwot woko limuk. 125Ci Solomon olego kun owaco ni,

“Rwot yam oketo ceng i polo,

ento en owaco ni ebedo i pol macol licuc.

13Ageri dong ot ma ocudu malo,

wek obed kabedoni ma ibedo iye matwal.”

Lok pa Solomon bot lwak

(2 Tek 6:3-11)

14Ka dok rwot Solomon oloke bot lwak ma gucoke kun gucung mot, ci olego gum pa Rwot ikomgi. 15En owaco ni, “Kipak Rwot, Lubanga pa Icrael, ma dong cinge otyeko cobo gin mayam oloko ki doge bot wora Daudi, kun owaco ni, 166‘Nia wa ikare ma akwanyo jona jo Icrael ki i Ejipt, peya ayero taun madit mo ma i kaka ma i Icrael ducu pi gero iye ot mo, wek nyinga obed iye; ento ayero mera Daudi wek oloo lwaka jo Icrael.’ 177I karenu onongo wora Daudi obedo ki tam i cwinye me gero ot pi woro nying Rwot Lubanga pa Icrael. 18Ento Rwot aye owaco bot wora Daudi ni, ‘Kit macalo onongo dong tam tye i cwinyi me gero ot pi nyinga, itimo ber pi keto lok meno i cwinyi. 198Ento pe in aye ibigera ot; wodi ma ibinywalo aye bigero ot pi woro nyinga.’ 20Ci Rwot dong otyeko cobo gin ma en ociko; pien an dong atyeko leyo katyen wora Daudi, an dong abedo iwi komker pa Icrael, kit mayam Rwot ocikoni, dok atyeko gero Ot pi woro nying Rwot Lubanga pa Icrael. 21Dong atyeko keto iye kabedo pa Canduk pa Rwot matye iye Gicike ma Rwot con oketo ki kwariwa, ikare ma okwanyogi woko ki i lobo Ejipt.”

Lega pa Solomon

(2 Tek 6:12-42)

22Solomon dok ocung inyim keno tyer pa Rwot ki inyim lwak jo Icrael ma gucoke ducu, ci otango cinge malo okemo polo. 23Ci olego lega kuman ni, “Ai Rwot, Lubanga pa Icrael, pe tye Lubanga mo macalo in i loboni, kadi malo i polo nyo piny wa ite lobo, matye kagwoko gicikene macalo in, ma inyutu mar meri ma pe loke bot lutici ma gibedo kalubi ki cwinygi ducu. 24Ibedo kalubu gin mayam itito bot wora Daudi; eyo gin mayam i loko ki dogi, i cako dong tiyone ikare man ki cingi, ci icobo ducu maber. 259Ai Rwot, Lubanga pa Icrael, dong ilub gin mayam iciko bot latici Daudi ma wora, kun iwaco ni, ‘Pe ibibedo labongo danoni mo ma bibedo iwi komker me Icrael, teke awobeni gugwoko kitgi maber, kun gibedo ki kit kwo maber inyima kit ma in ibedo kwede i nyimani.’ 26Ai Lubanga pa Icrael, kombedi mi loki dong omok matek, kit mayam i loko bot wora Daudi ma latici. Ai Rwot, wek obed kumeno. 2710

Ento in Lubanga mono i twero bedo iwi lobo ni ada? Nen, kadi polo bene kulu mamalo tutwali pe romo in me bedo iye, ci ot ma ageroni tidine rom mene kono! 28Kadi bed kitmeno, an alegi iwiny legana, ma an latici, ki kit ma abako kwede doga, ai Rwot Lubangana; winy koko ki lega ma atye kalego inyimi tin. 2911 Wangi aye iwek obed twolo dyewor ki dyeceng benebene me neno tung botwa i Ot man, en aye kabedo mayam iwaco pire ni, ‘Ci an abibedo kunu,’ wek ibed kawinyo legana ma akelo boti kun waloke wakemo kabedo man. 30Dok iwiny legana ki lega pa joni jo Icrael ikare ma wabako dogwa, ma walego wakemo kabedo man atir. Eyo in dong ibed kawinyo bako dogwa ki i polo kama ibedo iyeni; ci ka dong ityeko winyone, dong iwek balwa, kit ma alegini.

31Kace dano mo otimo bal ikom ngat mo, ci kimiye okwong kwong pire, ka obino ce okwongo kwonge ki inyim keno tyeri ma i Ot man, 32ci in Lubanga iwiny ki i polo, ci itii gin ma mite. Ngol kop pa laticini, imii kop oloo dano ma otingo alii, kun iket gin ma en otimo i wiye kene, dok i mii dano ma pe obalo oloo kop kun itime ber ma oporo leng cwinye.

33Kace mony pa lumerok guloyo joni jo Icrael pi balgi ma gutimo ikomi, kace gungut, gudwogo boti, ci gucako tucu nyingi, ma gilego in ka gibako doggi boti i Ot man, 34ci in iwinygi ki i polo, iwek bal pa joni jo Icrael, ka dok idwokgi cen wa i lobo mayam imiyo bot kwarigi.

35Kace polo ocege woko, ma kot mo pe cwer pi lakit balgi mo ikomi, kace lwaki gucako lega kun gikemo in i kabedo man, kun gitucu nyingi, kun gungut ci gubwoto balgi woko ikare ma iketo can ikomgini, 36ci in Lubanga iwinygi ki i polo, iwek balgi, gin joni jo Icrael, dok ipwonygi ki kit yo maber ma myero gulubi; ci dong imii kot ocwer i loboni mayam imiyo bot lwaki ni obed meggi.

37Kace kec opoto i lobo, onyo kono two gemo aye opoto, nyo kace bel obware nyo odoko ocone, nyo ka bonyo aye opoto nyo okwil obino, nyo kace merok pa joni orumugi woko ki i ganggi mo, nyo kadi bed kit gemo ango, nyo kit two moni, 38kace lwaki gucako lego nyo bako doggi boti, kadi bed dano acel kok boti, nyo joni jo Icrael ducu, kun dano acel acel ngeyo kit atwom ma i cwinye, kace otango cinge kun en okemo Ot man; 39ci in Lubanga iwinygi ki i polo kama ibedo iye, iwek balgi, ci itii gin ma mite. Tim dano acel acel kit ma ingeyo kwede cwinye, ma rwate ki kit kwone ducu, pien in aye, in keni ingeyo kit cwiny pa dano ducu. 40Meno bimiyo gibedo kalwori nino ducu ma gibedo iye i lobo mayam imiyo bot kwariwa.

41Obed kitmeno bene kace larok mo, ma pe joni jo Icrael, obino kany ma oa ki i lobo mo mabor, kun obino pi yweka me nyingi; 42pien gibiwinyo pi nyingi ma diti, ki pi twero me badi ki kit ma iryeyo ki cingi pi konyo joni, onyo kace larok mo obino ce ocako lega ma okemo Ot man, 43ci in Lubanga iwiny ki i polo kama ibedo iyeni, i tim kit gin ducu ma laroki okok kwede inyimi, wek rok ma wi lobo ducu gunge nyingi, gulwori, kit ma lwaki jo Icrael gilworini, dok wek gunge maber ni, Ot man ma ageroni kilwongo ki nyingi me wori keken.

44Kace lwaki gucito kalweny ki lumerokgi i kabedo mo ducu ma icwalogi iye, kace gukelo legagi boti in Rwot ma gukemo gang man ma in iyero, ki Ot man ma agero pi woro nyingi ni, 45ci in iwiny legagi ki bako doggi ki i polo, imii giloc ka ineno ni lokgi tye atir.

46Kace gutimo bal ikomi, pien pe tye dano mo ma pe balo, kace kiniga omaki ikomgi, ci imiyogi i cing lamerok mo ma oyakogi ci oterogi i opii wa i lobo pa lumerokgi, kamabor nyo kamacok, ci iwiny legagi. 47Kace cwinygi otamo lok ki i lobo ma kiterogi iye i opiini, ce gungut ci gubako doggi boti ki i lobo ma gitye iye i cing luyakgi, kun gikok ni, ‘Wabalo, wangak woko ata, watiyo lwak balgu mapol,’ 48kace gungut ki tamgi ducu ki cwinygi ducu i lobo pa lumerokgi mayam oterogi i opii ni, kun dong gilego inyimi ma gukemo lobogi mayam imiyo bot kwarigi, ki gang ma nene iyero, ki Ot man ma agero pi woro nyingi ni; 49ci in Lubanga iwiny legagi ki bako doggi ki i polo kama ibedo iyeni, ci iye imii botgi gin ma gilego. 50Dok iwek bal pa joni ma gubalo ikomi pi tim aranyigi ducu ma gibalo kwede inyimi, imii kica omak jo mayam guterogi i opiini, wek kica ocak makogi ikomgi bene. 51Pien gin aye lwaki kikome, gin joni kikome mayam i kwanyogi ki i Ejipt, ma obedo calo ruk mac me teto nyonyo ma otwak me wangogi. 52Wek wangi onen kit bako dog pa latici, ki bako dog pa lwaki jo Icrael, cik iti ikomgi ikare ducu ma gikok boti. 53Pien yam dong ikoyogi woko pat ki ikin rok ma wi lobo ducu wek gubed joni kikome, kit mayam i tucu loke ki i dog latici Moses ikare mayam ikwanyo kwariwa woko ki i Ejipt, ai Rwot Lubanga.”

Lega me agiki

54Ka dong Solomon otyeko lego lega meno ducu kacel ki bako dogegu inyim Rwot, ci oa malo ki inyim keno tyer pa Rwot kama onongo en orumu iye conge, kun otango cinge malo okemo polo. 55Ka dong ocung, ci olamo gum ikom jo Icrael ma gucoke ducu kun dange ki dwone malongo ma waco ni, 5612“Kipak Rwot ma dong omiyo jone jo Icrael guywe, kit mayam ociko ducu! Ikom lok ducu mabeco mayam ociko ki i dog latice Moses, pe tye lok mo acel ma pe ocobo kakare. 57Rwot Lubangawa obed kwedwa kit mayam obedo ki kwariwani; pe obwotwa, pe otenywa ata, 58wek olok cwinywa odok ikome. Kitmeno wabilubu yone ducu, kun wagwoko lok ma en ociko, ki cike ducu mayam ociko ki kwariwa. 59Wek lok ma dong aloko ducu, ma abako ki doga inyim in Rwoti, obed cok inyim Rwot Lubangawa dyeceng ki dyewor, wek en otim pira ma an latice ni, ki pi lwake jo Icrael, gin matye atir inino acel acel. 60Meno bimiyo rok ma wi lobo ducu ngeyo ni, Rwot aye Lubanga kene; mukene peke. 61Wun wubed ki lengic ikom Rwot Lubangawa, wulub cik ma en oketo, kun wugwoko lok ma en ociko ducu macalo wutiyo tini.”

Kwero Ot pa Lubanga

(2 Tek 7:4-10)

62Ka dok rwot ki jo Icrael ducu gucako tyero gitum inyim Rwot. 63Solomon otyero gityer lakwe cwiny bot Rwot maromo twoni dyangi alip pyere aryo wiye aryo, ki romi alip miya acel ki pyere aryo. Rwot Solomon kacel ki jo Icrael ducu gukwero Ot pa Rwot Lubanga kitmeno. 64Inino meno bene Solomon okwero kabedo ma i cwiny dyekal matye inyim Ot pa Rwot. Otyero kunu gitum awanga ki gityer me moko kwon ki moo dwolo me gityer lakwe cwiny, pien keno tyer mola ma inyim Rwot onongo tidi tutwal, ma pe romo keto iye gitum awanga kacel ki gityer me moko kwon ki dwolo me gityer lakwe cwinygu.

65Kitmeno Solomon okwero nino madito ikare meno, kacel ki jo Icrael ducu. Onongo lwak gucoke mapol kun gua wa i yoo ma donyo i Kamat nio wa i laora kulu me Ejipt, ci gubedo inyim Rwot Lubangawa pi nino abiro. 66Ikom nino me aborone Solomon ocwalo lwak gudok woko tugi. Lwak gupwoyo rwot Solomon, ci gudok i pacogi ki yomcwiny madwong, ma igi okwe pi gin ducu mabeco ma Rwot Lubanga otimo pi latice Daudi ki pi lwake jo Icrael.